31/10/2022
HALLOWEEN | YAWA², ABAT-ABAT BA O PARA SA MGA SANTOS?
Niadtong 7th century, si Papa Bonifacio IV mitukod sa kapistahan sa tanang mga Santos ug kini atong gitawag nga “All Saints Day”. Kining kasaulogan gisaulog kaniadto sa petsa 13 sa Mayo apan gibalhin sa November 1. Ang maong kasaulogan magsugod sa Octobre 31 sa gabie ug gitawag kini og gabie sa mga balaan o “Eve of the Hallows or Holy” o sa Scottish nga pinulungan gitawag kini og HALLOWEEN. Kining kasaulogan nagsentro sa pagprocession sa mga tawo nga nagsul-ot sa nagkalain-laing sapot sa mga santos nga ilahang giidulo.
Busa, kini diay ang saktong kahulugan sa pulong nga HALLOWEEN. Apan ang atong pagsabot sa Halloween karong panahuna dili naman lage mao. Imbis tudloan kita unsaon pagsunod sa kinabuhi sa mga santos lahi naman ang gipakita sa media karon. Imbis atong hisgutan ang kinabuhi sa mga santos panahon sa HALLOWEN, atong makita hinuon ang mga vampira, aswang, abat ug hadlok nga mga salida.
Kada tuig adunay magsaulog og Halloween party ug atong makita nga adunay magcostume og monster, demonyo, vampera, abat, dracula, ug ungo. Kini nakapalayo kanato sa tinuod nga kahulugan sa atong gisaulog.
Ang atong simbahan naningkamot pagpasabot sa tinuod nga kahulugan sa HALLOWEEN. Mao nga imbis costume sa mga ungo ug abat, gipahigayon sa atong simbahan ang gitawag og “Parade of Saints” diin ang mga tawo magcostume og mga santos isip pagpakita sa tinuod nga kahulugan sa HALLOWEEN uban sa panghinaot nga makat-onan nila ang hiyas sa mga santos nga ilang giidulo.
Kon, ikaw usa ka katoliko nga nakabasa niini karon, ayaw sayangi pagpasabot sa uban ang tinuod nga kahulugan sa HALLOWEEN.
Adunay post sa facebook nga nindot pamalandungan,
“Nagpablessing sa balay para mawala ang ungo, apan nagdecorate og ungo para sa Halloween.”
"Ganahan mn diay mag yawa² unyag mayawaan manawag og pari" 🤔
HAPPY HALLOWEEN NINYONG TANAN!
