27/01/2026
Patay ang isang asawa matapos pagsasaksakin ng kaniyang mister sa loob ng kanilang tahanan sa Purok 4B, Barangay 23-C, Quezon Boulevard, Davao City.
Batay sa ulat, kinilala ang biktima na si Reajie, 27 taong gulang, habang ang suspek ay kinilalang si Yusop, 38 taong gulang, isang tricycle driver na pareho silang residente ng nasabing lugar.
Lumabas sa paunang imbestigasyon ng mga awtoridad na habang natutulog ang biktima ay bigla na lamang itong pinagsasaksak ng kaniyang asawa nang maraming beses, na naging sanhi ng kanyang agarang pagkamatay.
Ayon pa sa impormasyon, nagalit umano ang suspek matapos niyang matuklasan na may relasyon sa social media ang kanyang asawa.
Nabatid na naitakbo pa ang biktima sa pagamutan ngunit idineklara na itong dead on arrival ng doktor.
Agad namang naaresto ng mga awtoridad ang suspek na kasalukuyang nakapiit at nakatakdang sampahan ng kasong pagpatay.
Samantala, nasugatan din ang ina ng suspek na kinilalang alyas Manie, 70 taong gulang, matapos nitong tangkaing pigilan ang kaniyang anak.
Narekober ng mga awtoridad sa lugar ng krimen ang isang kutsilyo na pinaniniwalaang ginamit ng suspek sa insidente.
