03/04/2025
📌 Ang Kolehiyo De Heneral Santos: Usa ka Kahigayonan, Dili Usa ka Babag
Ang Davao City nailhan nga usa sa mga dakbayan nga adunay daghang dagkong unibersidad ug kolehiyo sama sa Ateneo de Davao University (AdDU), University of Mindanao (UM), Mapúa Malayan Colleges, Holy Cross of Davao College (HCDC), San Pedro College (SPC), ug University of the Philippines – Mindanao (UP-Min).
Niadtong 2020, pinaagi sa usa ka ordinansa, gitukod sa Davao City ang City College of Davao. Bisan tuod ug aduna na kini nga lokal nga kolehiyo, nagpadayon gihapon ang ilang lokal nga scholarship program nga gitawag og Educational Benefit System Unit (EBSU). Kini nagapakita nga ang city college ug ang scholarship program puwede magtinabangay imbes nga mag-ilog sa suporta ug pondo.
Sa laing bahin, ang Cagayan de Oro niadtong 2023 usab nagtukod sa City College of Cagayan de Oro, apan nagpadayon gihapon ang ilang lokal nga scholarship program. Kini usa ka ebidensya nga ang city college ug ang scholarship program dili magkabangga, kondili magtinabangay aron mas daghan ang mahatagan og kahigayunan sa edukasyon.
Sa daghang highly urbanized cities sa Pilipinas nga dugay nang adunay local city colleges, nagapadayon gihapon ang paglambo sa ilang pribadong mga eskwelahan. Busa, nganong lahi man ang panan-aw sa ubang mosupak sa Kolehiyo De Heneral Santos?
📌 Ang MSU, EduKaR, ug ang Katuyuan sa Kolehiyo De Heneral Santos
Adunay mga nagaingon nga dili kinahanglan ang Kolehiyo De Heneral Santos kay mas angay daw palapdon ang EduKaR. Apan unsa ang mahitabo sa mga kabatan-onang dili maka-avail sa EduKaR? Dili ba mas maayo nga hatagan silag laing kapilian?
Daghang residente sa GenSan ang dili makasulod sa MSU tungod kay adunay standard nga ginasunod ug kinahanglan pa pasaron ang entrance exam. Kini nagapakita nga dili tanan makabenepisyo sa MSU.
Ang katuyuan sa Kolehiyo De Heneral Santos mao ang paghatag og kahigayonan sa mga dili kaya makasulod sa MSU ug sa ubang kolehiyo tungod sa taas nga standard o sa kalisod sa bayronon. Ang kadaghanan sa mga kurso nga i-offer sa kolehiyo kay mga TESDA courses, aron dili makigkompetensya sa mga existing courses nga gina-offer sa ubang kolehiyo. Ang intensyon dili ang pag-kompetensya, kondili ang paghatag og laing opsyon sa edukasyon.
Adunay suporta sa mga pribado ug state colleges pinaagi sa EduKaR, apan base sa survey, daghan gihapon ang out-of-school youth sa GenSan. Ang kolehiyo makatabang nga makab-ot nila ang equal footing sa pagpanarbaho pinaagi sa teknikal ug bokasyonal nga kurso.
📌 Pagpalambo sa Edukasyon: Suportahan, Dili Babagan
Tinood nga dako ang gasto sa pagtukod sa usa ka kolehiyo. Apan tungod sa dako nga pagsalig sa mga senador ug kongresista sa mga Pacquiao, dali ra makapangayo og pondo alang sa pagpabarog niini. Hilabi na kung magmadaugon sila Manny Pacquiao, Ton Acharon, ug ang 1-Pacman Partylist, mas daghan pa ang puwedeng mahibubo nga pondo alang sa edukasyon sa atong siyudad.
Sa pagkakaron, aduna na’y ordinansa nga unang requirement sa CHED ug adunay Technical Working Group nga nagtuon sa feasibility ug mga proseso para matuman ang proyekto.
📌 Ang Konklusyon: Dili Babagan, Kondili Suportahan
Ang pagtukod sa Kolehiyo De Heneral Santos dili makadaot, kondili makahatag og dugang kahigayunan sa atong kabatan-onan.
Ang pangutana karon:
NGANONG BABAGAN ANG USA KA PROYEKTO NGA MAKAPALAPAD SA EDUKASYON UG MAKAHATAG OG KAHIGAYUNAN SA LABAW PANG MGA ESTUDYANTE?
Pili-on nato ang solusyon, dili ang pagpugong sa kahigayunan!
