12/06/2026
๐๐ถ๐ต๐ฎ๐บ ๐ ๐๐น๐ฎ ๐๐ฎ ๐๐ฎ๐ธ๐ถ๐น๐ฎ๐ป๐ด ๐๐๐๐ฎ๐ด
๐๐ด๐ช๐ฏ๐ถ๐ญ๐ข๐ต ๐ฏ๐ช ๐๐ถ๐ญ๐ช๐ข ๐๐ฆ๐ญ๐ข๐ฆ๐ป
๐๐จ๐ช๐ฏ๐ถ๐ฉ๐ช๐ต ๐ฏ๐ช ๐๐ช๐ข๐ฎ ๐๐ข๐ค๐ฒ๐ถ๐ฆ๐ด ๐๐ฆ ๐๐ฐ๐บ๐ข
Sa aking minamahal,
Naaalala mo ang araw na 'to?
Nakatatak na 'to sa'yo bago pa man ako dumating, bago kita makilala.
Mananatiling nakatatak sa'yo kahit wala na ako, walang hanggan sana.
Salamat dahil pinayagan mo akong maging parte ng buhay mo.
Patawad dahil kailangan mong matanggap ang liham na ito.
Sino ba ang may kasalanan? Sino ba ang nagkulang?
Ako ba na umalis? O ikaw na naiwan?
O baka tayo?
Sinabi ko naman na sa'yo noon na paglilingkuran kita balang araw, 'di ba?
At saksi ka sa mga araw na pumapalya ako't bumabangon.
Sa mga gabing tumatangis ako't nagdarasal.
"Pakiusap, para po sa akin.
Para po sa kanya.
Para po sa amin."
Mahalaga ka sa akin.
Alam kong alam mo 'yan.
Alam kong alam ko 'yan.
Pero hindi ko na alam ngayon.
Dinidinig naman ata ang dasal ko, subalit naubusan na ako ng mga salita para muling bumulong.
Sabi nila nakakapagod ka raw ipaglaban.
Mahirap ka raw mahalin.
Ngunit kung seryoso ko itong sasagutin,
alam kong wala kang kasalanan.
Perlas ka nga ng Silangangan.
Puno ka ng lahat ng magagandang bagay sa mundo.
Maraming handang mamatay para sayo.
Pero tila ikaw na ang pinapatay nila ngayon.
Ako'y mananatiling ako kahit saan magpunta.
Pinag-aagawan pa nga ng mga bansa.
Dahil kakaiba raw kung mag-alaga, kakaiba ang mga nagagawa.
Kakaiba kung magmahal.
Ngunit bakit 'di kita maalagaan? Bakit para sayo'y wala akong magawa man lamang?
Kahit pa mahal kita.
Gusto kitang ipagtanggol. Ipaglaban. Palayain sa sistemang gahaman. Ngunit wala akong lakas.
Kaduwagan bang lumisan dahil takot akong maiwan sa ganitong kalagayan?
Pasensya na kung 'di ko matutupad ang pangakong sa'yo ako tatanda,
kung sa mga Lunes ay โdi na kita maaalayan ng kanta,
kung isa akong manggagawang walang magawa.
Isang Pilipinang pilipit na.
Totoo, napakarami namin noon na nasa sa'yo.
Huwag mo sanang sisihin ang sarili mo kung wala nang natira.
Hindi mo kasalanang patuloy kang binabahiran.
Salamat at patawad, Pilipinas.
Walang mali sayo. At sa susunod na buhay, sa pagkakataong sapat na ang tapang ko, pipiliin ko muling maging Pilipino.
Pipiliin ko pa ring maging sa'yo.
Pipiliin ko nang manatili sa'yo.
Pero sa ngayon, malaya ka na
mula sa pag-ibig ko.
Nagmamahal,
Dakilang Duwag
