07/06/2026
Lasing na estudyante ng criminology, binigyan ng show cause order, 90-araw na suspensyon ng lisensya
Nagpalabas ang Land Transportation Office (LTO), sa ilalim ng pamumuno ni LTO Chief, Assistant Secretary Markus V. Lacanilao, ng Show Cause Order (SCO) laban sa driver ng isang Suzuki Hatchback na sangkot sa viral road rage incident na kumakalat sa social media.
Batay sa viral video, makikita ang umanoโy komprontasyon sa pagitan ng driver ng isang Suzuki Hatchback at ng driver ng isang truck sa kahabaan ng Vergara Highway sa Cabanatuan City, Nueva Ecija. Ayon sa ulat, ilang beses umanong hinampas ng driver ng Suzuki Hatchback ang truck at nagpakita ng agresibong pag-uugali sa kasagsagan ng insidente.
Lumabas din sa ulat na ang driver, na umanoโy isang estudyante, at ang mga kasama nito ay nasa impluwensya ng alak nang maganap ang insidente.
Bukod sa naturang insidente, lumitaw din sa social media ang isa pang viral video na nagpapakita sa kaparehong indibidwal na umanoโy sangkot sa isang hiwalay na insidente sa Gapan City, Nueva Ecija. Batay sa ulat, nahuli naman itong nag-counterflow at kalaunan ay nasangkot sa pisikal na pananakit sa isa pang motorista.
Dahil dito, inatasan ng Intelligence and Investigation Division (IID) ang sangkot na rehistradong may-ari at ang driver na humarap sa tanggapan nito upang magpaliwanag kaugnay ng mga posibleng paglabag, kabilang ang Reckless Driving, Driving While Under the Influence of Alcohol, at pagiging Improper Person to Operate a Motor Vehicle.
Kasalukuyang isinasailalim din sa masusing imbestigasyon ang isa pang viral video may kaugnay sa sangkot na indibidwal upang matukoy kung may mga karagdagang paglabag na maaaring isampa laban sa kanya.
โLalo tayong nababahala dahil hindi lamang iisang insidente ang iniuugnay sa sangkot na driver. Ang paglitaw ng isa pang viral video na umanoโy agresibo at marahas na pag-uugali ay nagpapakita ng posibleng pattern ng kawalang-disiplina sa kalsada. Ito ang dahilan kung bakit kinakailangang masusing imbestigahan ang kaso at tiyaking mapapanagot ang sinumang mapatutunayang lumabag sa batas,โ ani Lacanilao.
Samantala, isinailalim ng LTO sa 90-day preventive suspension ang driverโs license ng sangkot na driver, habang inilagay naman sa alarm status ang Suzuki Hatchback. Inatasan din ang driver na isuko ang agad kanyang driverโs license.
Pinaalalahanan ni Assistant Secretary Lacanilao ang lahat ng motorista na ang kaligtasan sa lansangan ay nakasalalay sa disiplina at responsableng pag-uugali ng bawat isa. Aniya, mahalagang pairalin ang paggalang sa kapwa road users at mahigpit na sumunod sa mga batas-trapiko upang maiwasan ang mga insidenteng maaaring magdulot ng panganib sa publiko.
