03/10/2026
πππ-ππππ ππ ππππ πππππ ππ ππππππ π, πππππππππππ ππππ πππππππππ πππ πππππππππ ππ πππ ππππ β ππππ
Nasabtan sa Iligan City Waterworks System (ICWS) ang kahasol ug kasagmuyo sa mga konsumidor nga nakasinati gihapon og hinay nga agas sa tubig bisan human na ma-repair ang tubo sa may NSC Checkpoint niadtong Septiyembre 21.
Gipasabot sa ICWS nga gilimitahan sa 40 turns ang pag-abli sa main valve sa System 3 aron makontrol ang pressure sa tubig sulod sa mga tubo ug malikayan ang posibleng pagbuto niini.
Sa pagkakaron, anaa sa 127 pounds per square inch (PSI) ang pressure sa tubig. Matod sa ICWS, kon dugangan pa ang pag-abli sa valve, posibleng molapas sa 130 PSI ang pressure, nga mahimong mosangpot sa pagkaguba pag-usab sa mga tubo ug mas dugay nga pagkabalda sa suplay sa tubig.
Padayon nga gimonitor sa ICWS ang pressure sa tubig aron masiguro nga magpabiling luwas ang operasyon sa sistema samtang nagpadayon ang mga lakang aron mapalambo ang agas sa tubig.
Sa pagkakaron, gibanabanang 70 hangtod 80 porsyento sa mga konsumidor ang nakadawat na og igong suplay sa tubig. Nagpadayon usab ang paghatod og tubig pinaagi sa ICWS water lorries ngadto sa mga lugar nga nakasinati gihapon og hinay o walay agas.
Gipadayon usab sa ICWS ang pagsusi ug pag-troubleshoot sa mga linya sa tubig, ilabina sa mga lugar nga posibleng adunay airlocks nga nakaapekto sa pressure ug agas sa tubig. Gilauman nga moarang-arang ang suplay sa mga apektadong lugar human masulbad ang mga problema sa linya.
Samtang nagpadayon ang mga pagpaningkamot, giawhag sa ICWS ang mga konsumidor nga magtinabangay pinaagi sa maampingong paggamit sa tubig, pagsunod sa mga pahimangno ug pagreport sa mga problema pinaagi sa saktong mga channel aron matagan kini og angay nga aksyon.
Gipasalamatan sa ICWS ang pagsabot ug kooperasyon sa publiko ug gipasalig nga magpadayon ang pagmonitor, pag-ayo sa mga problema ug pagpatuman sa mga lakang aron mabalik ang mas lig-on ug kasaligan nga suplay sa tubig alang sa mga konsumidor.
Oktubre 3, 2026 | CEC
