25/05/2026
Congratulations!
3 ka graduates sang JBLFMU – Arevalo nag-sideline bilang mascot agud makatapos sa pag-eskwela
Iloilo City – Sa likod sang makalilingaw nga performance bilang mascot, nagapanago ang estudyante nga nagapangabudlay, nagasakripisyo, kag naga-antos agud makatapos sa pag-eskwela kag amat-amat nga malab-ot ang handom.
Ini ang istorya sang tatlo ka mga graduates sang John B. Lacson Foundation Maritime University (JBLFMU) – Arevalo nga kanday Kenneth Makino sang Aglalana, Passi City; Reymart Ibañez sang Onop, Miagao; kag Chris Daniel Sustituedo sang Bagumbayan, Sultan Kudarat.
Nag-graduate sila sa kurso nga Bachelor of Science in Marine Transportation (BSMT).
Una nga nag-sideline bilang mascot si Ibañez sang first year college siya agud masuportahan ang iya pag-eskwela sa kolehiyo.
Sang second year college sila, ginpatigayon ni Ibañez si Makino agud mag-sideline man. Ulihi nga nakasulod si Sustituedo sang third year college na sila nga ginpatigayon man ni Ibañez.
Ginsaysay sang tatlo nga daku ang nabulig sang ila sideline agud may pang-allowance kag galastuhon samtang naga-eskwela. Suno pa sa ila, indi na nila kinahanglan nga magpangayo sang kuwarta sa ila mga ginikanan sa baylo, sila pa kon kaisa ang nagahatag.
Sa kada events, lain-lain nga sakripisyo ang ila ginahimo agud mapalipay ang mga tumalan-aw ilabe na ang kabataan. Suno kay Ibañez, nagakadula ang ila kakapoy kon makita nga napalipay ang mga tumalan-aw.
Sa pihak sini, wala man nila ginapabay-an ang ila pag-eskwela.
“Daku gid nga bulig ang part-time namon especially, financially kay mahal ang tuition tapos kon kaisa kulang ang allowance, may baraydan. Daku ini nga bulig kag indi na namon kinahanglan maghambal nga, ‘Ma, may kulang ko basi may extra ka diyan,’ kundi waay dun kami nagahambal kay may kuwarta na kami. Imbes nga i-ayo namon, ubrahan na lang namon,” suno kay Makino.
“Dapat magpursige kag ipakita gid ang ‘the best nga kaya nila.’ Iba-iba ang sitwasyon kag makaya gid [ang kada problema]. Kon ano ang handom, dapat ipursige gid kay subong mabudlay kon wala ti handom kay kabudlay sang pangabuhi subong nga tiyempo,” suno kay Ibañez.
“Kon ano ang handom mo, pangitaan mo sang paagi nga maabot gid na. Same sa amon, naga-sideline sa pag-eskwela gani sa iban nga nabudlayan, makaya man na nila,” suno kay Sustituedo.
Bisan naka-graduate na sila, magapadayon gihapon kanday Makino, Ibañez, kag Sustituedo sa pag-sideline bilang mascot agud may gastuhon sila samtang nagaproseso nga makasakay sa barko. — Aksyon Radyo Iloilo
Ariel J. Solacito | May 24, 2026
Source: Public View
