03/08/2025
Lalaki Patay Matapos Ginbuno Sa Namatyan Sa Cabatuan; Suspek Padayon nga Ginaayam
by: Reynold Arca
Patay ang isa ka lalaki matapos ginbuno samtang nagahampang sang baraha sa isa ka namatyan sa Barangay Lutac, Cabatuan pasado alas-10 sang Domingo sang gab-i, Agosto 3.
Ginkilala ang biktima sa alyas Carmelo, samtang ang suspek naman ginkilala sa alyas Tito, pareho residente sang nasambit nga barangay.
Suno kay Police Lieutenant Vito Bastiero, deputy chief of police sang Cabatuan Municipal Police Station, pareho nga naka-inom ang duha sang nagluntad ang insidente. Nagahampang sila sang baraha sa namatyan sang una nga nagkumod si Carmelo sa suspek, kabangdanan nga nagsugod ang mainit nga diskusyon.
Gindala pa sa Ramon Tabiana Memorial District Hospital ang biktima apang gindeklarar siya nga dead-on-arrival bangud sa madalom nga samad nga naangkon.
Matapos ang krimen, gilayon nga nagresponde ang mga kapulisan kag nagpadulong sa balay sang suspek nga malayo sa main road. Suno sa utod ni Tito, nabatyagan niya nga may tawo nga nagsulod sa ila balay antis pa mag-abot ang mga pulis.
Sa pagpangusisa, narecover sang otoridad sa sulod sang balay sang suspek ang kutsilyo nga may mantsa sang dugo, nga ginapatihan amo ang gingamit sa pagpangbuno.
