27/02/2025
Ang pagpalangga sang isa ka iloy, bisan sa kabudlayan, wala gid sing makatupong. Humalin pa sa iya pag busong, ang gugma niya wala nagduha-duha—nagapadayon bisan sa tunga sang ano man nga kabudlayan.
Sa kada pitik sang orasan, ang gugma sang isa iloy wala naga ka-punaw. Bisan pa distansya ang paga estoryahan, ang iya pagpalangga magapabilin nga wala sang kataposan.
Isa sa mga nagpamatuod sini si Nenita Vicente, 65-anyos, balo, kag may siyam ka mga kabataan, taga Sitio Tuburan, Barangay Carol-an, syudad sang Kabankalan.
Isa siya ka tipikal nga iloy—wala nagapangayo sang pasidungog, kundi nagapadayon sang simpli nga pagpangabuhi.
Sa interview sang Brigada News FM Kabankalan kay Nenita, bisan sa iya edad, padayon siya nga nagabaligya sang mga ulutanon sa plaza sang nasambitan nga syudad — Margoso, Repolyo, Talong, Kamatis, Alugbati, kag iban pa.
Ang masubo, ang mga utan nga ginabaligya niya, ginakumpra niya lang sa mga kaupod nga manugbaligya sa merkado, kag gamay lang ang ginansya.
Ini ang iya inadlaw-adlaw nga pangabudlay. Suno sa iya, sa merkado na lang siya nagakatulog, bangud siya na lang ang nagapangabuhi, kay ang tanan niya nga kabataan ang may kaugalingon na man nga pangabuhi.
Apang bisan pa nga malayo sila, indi matakos ang kasubo nga iya ginabatyag. Ang pagkahidlaw sa iya mga anak ang nagahatag sa iya dugang nga pin-ot sa tagipusuon.
Isa lang ang iya ginahandom: nga makumusta siya kag makabati sang balita halin sa iya mga kabataan, agud mahibaluan man niya ang ila sitwasyon.
Pahayag ni Nenita, ginalingaw niya ang iya kaugalingon sa pagbaligya sa merkado kag pag-zumba sa plaza, para mabulong ang iya kahidlaw sang kaugalingon nga kabataan.
Dugang pa niya, wala siya nahatagan sang tsansa nga makastorya ang iya mga Kabataan nga yara sa iban nga bahin sang Negros Occidental, may yara man sa luwas sang probinsya, kag ang iban yara lang man sa ila barangay.
Suno pa sa iya, nagapanghulam siya sang cellphone sa iya mga kilala agud makontak lamang ang mga ini, apang wala gid siya nahatagan sang kahigayonan nga maka-estorya.
Apisar sa iya kabudlayan, padayon siya nga naga-laum nga maga abot ang adlaw nga makita niya ukon mabati-an ang mga tingog sang iya mga kabataan.
Ang estorya ni Nenita ang nagapamatuod nga ano man kalayo ang distansya, ang gugma sang isa ka iloy ang magapadayon, bisan ano kabudlay kaya antuson para sa kabataan.*
