Ilonggo News Live Public Affairs

14/12/2025

TATLO ARESTADO SA BUY-BUST OPERATION SANG ICPO-CDEU SA RIZAL, LA PAZ



ILOILO CITY — Arestado ang tatlo ka mga kalalakihan sa buy-bust operation sang Iloilo City Police Office–City Drug Enforcement Unit (ICPO-CDEU) sa Zone 2, Brgy. Rizal, La Paz, las 8:34 sang gab-i, Disyembre 12, Biyernes.

Ginkilala ang mga gin-aresto nga sanday Landy Julit, 55 anyos, High Value Individual (HVI), mekaniko sang salakyan kag residente sang Brgy. Rizal, La Paz; Bert Alabado, 30 anyos, laborer, residente sang Paglanutan, San Lorenzo, Guimaras nga temporaryo nga nagapuyo sa Brgy. Rizal, La Paz; kag Melchor Claveria, 56 anyos, kasado, vendor kag residente sang Brgy. Tanza Bonifacio, City Proper.

Sa interview sang Ilonggo News Live kay Police Captain Roque Gimeno III, Officer-in-Charge sang ICPO-CDEU, ginpahayag sini nga malawig na ang ila monitoring sa mga suspek antes pa ginpatigayon ang madinalag-on nga operasyon.

Dugang pa ni Gimeno, nagahalin sa palibot sang distrito sang La Paz ang ilegal nga druga nga ginabaligya sang suspek sa iya mga parokyano nga nagagwa-sulod sa iya puluy-an.

Pahayag pa sang OIC, si Landy isa anay ka user sang ilegal nga druga kag sang ulihi, siya ang nagsalo sang aktibidad sang iya mga utod nga nalambot man sa ilegal nga operasyon sang droga.

Nabaklan ang subject person sang isa ka sachet sang ginapatihan shabu gamit ang ₱8,000.00 nga marked drug-bust money. Nakuhaan pa gid siya sang anum (6) pa ka sachet sang ginapatihan shabu nga nasulod sa iya coin purse nga nagaduag sang itom, nga nakuha sa iya natuo nga bulsa.

Ang kabug-aton sang tanan nga narekober nga ilegal nga druga nagalab-ot sa 100 gramos, nga may ginabana-bana nga standard drug price nga ₱680,000.00.

Subong nga tion, detained na ang tatlo ka suspek sa Iloilo City Police Station 2 (ICPS-2) kag magapangatubang sang kaso sa paglapas sa Republic Act 9165 ukon ang Comprehensive Dangerous Drugs Act of 2002.


Arnold Cantores Soqueña | Dec. 14, 2025

14/12/2025

14 KA BARANGAY OFFICIALS SA ILOILO CITY GINPASAKAAN KASO TUNGOD SA KALTAS SA AICS



ILOILO CITY — Nagpasaka na sang criminal kag administrative charges ang Department of Social Welfare and Development (DSWD) sa Office of the Ombudsman batok sa 14 ka barangay officials kag pila ka local government personnel sa Iloilo City bangud sa ginahingadlan nga iligal nga kaltas sa Assistance to Individuals in Crisis Situation (AICS).

Suno sa DSWD, ang mga akusado ginreklamo nga ginpwersa ang pila ka benepisyaryo nga magbalik sang P8,000 tubtob P9,000 halin sa P10,000 nga cash assistance nga dapat bug-os nga mabaton sang mga nagakinahanglan.

Ginsiling sang ahensya nga ang AICS isa ka national government program nga ginapatuman para sa mga indibidwal nga naga-atubang sang krisis pareho sang masakit, kamatayon sang pamilya, kalamidad, ukon iban pa nga emerhensya — kag wala ini sang bisan ano nga bayad ukon kaltas.

Samtang ini, ginpahayag sang DSWD nga padayon ang ila imbestigasyon kag handa sila maghatag sang proteksyon sa mga nagreklamo. Gindugang pa nga ang gobyerno magapadayon sa pagpanabat sang hustisya para sa mga biktima sang amo nga ilegal nga aktibidad.

Sa pihak nga bahin, nagpanawagan man si Iloilo City Lone District Representative Julienne “Jam-Jam” Baronda sang reforms sa pamaagi sang paghatag sang AICS agud malikawan ang pareho nga insidente indi lamang sa Iloilo City kundi sa bilog nga pungsod.

Ginapahanumduman sang DSWD ang publiko nga magreklamo gilayon kon may opisyal ukon indibidwal nga mangayo sang bayad, kaltas, ukon pabor kabaylo sang ayuda nga ginahatag sang gobyerno.

Padayon ang kaso sa Ombudsman samtang ginahulat ang masunod nga mga legal nga tikang kontra sa mga akusado.

| Dec. 14, 2025

14/12/2025

WARRIORS GINALANTAW ANG POSIBLE NGA TRADE KAY DRAYMOND GREEN SA ESPN MOCK DEAL

NBA NEWS — Sa madugay nga panahon, indi mahuna-hunaan nga magsuksok sang lain nga uniporme si Draymond Green nga indi Golden State Warriors. Apang subong nga nagapanipis na ang championship window ni Stephen Curry, ginalantaw sang Warriors ang mas mabug-at nga desisyon para mapabakod ang ila roster — lakip na ang posibilidad nga i-trade ang ila dugay na nga defensive anchor.

Sa isa ka mock trade nga ginpahayag sang ESPN insiders, ginhalinan sang ideya nga ilisan si Green sang isa man ka batid nga depensador kag NBA champion — si Anthony Davis. Ang apat-ka-team trade ginlaragway man nga paagi para mahipos sang Warriors ang ila “disgruntled asset” nga si Jonathan Kuminga, nga padayon nga nabutang sa bangko sa rotation ni coach Steve Kerr.

Mga Detalye sang Mock Trade:

Warriors makabaton:

Anthony Davis

Mason Plumlee

Mavericks makabaton:

Draymond Green

Jonathan Kuminga

2026 first-round pick (halin sa Warriors)

Lakers makabaton:

Buddy Hield

Hornets makabaton:

Maxi Kleber

Dalton Knecht

Cash considerations (halin sa Lakers)

Mga Opsyon sang Warriors

Mabudlay gid nga desisyon para sa Warriors ang pagbuya kay Green, apang mahimo ini nga amo na lang ang paagi para mapaayo ang ila lineup palibot kay Curry kag Jimmy Butler III.

Bisan pa nga ang depensa sang Golden State nagapabilin nga isa sa pinakamaayo sa liga — No. 4 sa defensive efficiency — nagapakita sang kabudlayan ang ila opensa. Ang personal nga numero ni Green nagpanubo gid, kun sa diin ang 35-anyos nga forward may shooting splits nga 38% field goal, 33% three-point, kag 62% free throw sa 20 ka hampang.

Suno kay ESPN insider Kevin Pelton, si Davis amo ang klase sang “rim threat” nga dugay na ginapangita sang Warriors bilang roll man. Dugang pa, mahimo man makaminos sang gasto ang Golden State pinaagi sa multi-team deal, kun sa diin ginpadala si Buddy Hield sa ikatatlo nga team — sa sini nga senaryo, sa Los Angeles Lakers — para sabton ang kinahanglan nila nga shooting.

Mga Balita sa Draymond Green Trade

May yara man nagakalain-lain nga report parte sa posibilidad sang pag-trade kay Green, nga may $27.6 milyon nga player option para sa season 2026–27.

Suno kay NBA insider Jake Fischer, isa lang ka manughampang ang mahimo magtulod sa Warriors nga i-trade si Green — si Giannis Antetokounmpo.

Apang ginpahayag naman sang ClutchPoints reporter Brett Siegel nga wala gid plano ang Warriors nga i-trade si Green, bisan pa para sa duha-ka-beses nga MVP nga si Antetokounmpo. Suno sa iya, kinahanglan ang pagsugot ni Green mismo, pati na ni Curry kag coach Kerr, antes pa matabo ang amo nga desisyon.

Sa karon, padayon nga ginabantayan sang NBA community kun mangin matuod bala ang ini nga ESPN mock trade ukon magapabilin nga Warriors-for-life si Draymond Green.



Arnold Cantores Soqueña | Dec. 14, 2025

14/12/2025

“NONOY BOMBAY” DAKOP SA BUY-BUST OPERATION SANG SDET–ICPS-2, LA PAZ PNP



ILOILO CITY — Nadakpan si alyas “Nonoy Bombay” sa isa ka buy-bust operation nga ginpatigayon sang Station Drug Enforcement Team (SDET) sang Iloilo City Police Station-2 (ICPS-2) sa Zone 4, Brgy. Caingin, La Paz, Iloilo City, las 5:25 sang hapon sang Disyembre 12 (Biyernes).

Ang arestado ginkilala nga si Clark Justin Nava, 29 anyos, ginakabig High Value Individual (HVI), isa ka basketball referee kag residente sang nasambit nga lugar.

Sa interview sang Ilonggo News Live kay Police Captain Jeffrey Delgado, OIC sang ICPS-2, ginpahayag sini nga masobra duha ka semana ang ginhimo nga monitoring sang kapulisan antes ang madinalag-on ang operasyon.

Dugang pa ni Delgado, ginapatihan nga nagahalin sa distrito sang Jaro ang ilegal nga druga nga ginabaligya sang suspek sa iya mga parokyano.

Pahayag pa sang OIC, ginakabig nga drug den ang lugar bangud sang mga narekober nga drug paraphernalia sa hulot sang suspek, subong man santu sa ila monitoring nga madamo nga nagkalain-lain nga persona ang nagakadto sa lugar agud mag-“iskor” sang ilegal nga druga.

Nabaklan ang suspek sang isa ka sachet sang suspected shabu gamit ang ₱3,000.00 nga buy-bust money. Sa paghinakop, nakuhaan pa gid siya sang siyam (9) pa ka sachet sang suspected shabu nga nasulod sa brown nga poyo kag nakuha sa isa ka transparent solid plastic box sa iya hulot.

Ang kabug-aton sang tanan nga narekober nga ilegal nga druga naglab-ot sa 55 gramos nga may estimated standard drug price nga ₱374,000.00.

Nakahunong subong ang suspek sa custody sang ICPS-2 kag magapangatubang sang kaso sa paglapas sa Republic Act 9165 ukon ang Comprehensive Dangerous Drugs Act of 2002.

| Disyembre 14, 2025

Jongjong Labto
Arnold C. Soqueña

13/12/2025

CONGRATULATIONS TO OUR NEWLY PROMOTED PNP PERSONNEL

Malipayon nga ginahatag sang Ilonggo News Live ang mainit nga pagdayaw, pagpanginbulahan kag pagkilala sa aton mga kapulisan nga bag-o lang napromote sa Philippine National Police, ilabi na kina PSSGT MARK P. MORALES kag PCPL. JING N. BALAGOSA.

Ang inyo himpit kag matutum nga pagserbisyo, padayon nga pagpanikasog, kag indi matandog nga dedikasyon sa publiko nga serbisyo amo ang ginhalinan sang inyo gin-angkon nga promosyon. Isa ini ka pagkilala sa inyo mga sakripisyo, disiplina, kag kahandaan nga magserbisyo sa katawhan bisan pa sa peligro kag kabudlayan sang trabaho.

Sa inyo pagsulod sa mas daku nga responsibilidad kag pamuno, kabay pa nga magapadayon kamo sa pagpabilin sang integridad, pagrespeto sa kasuguan, kag pagpamatood sang katarungan sa tagsa ninyo ka assignment. Kabay pa nga mangin inspirasyon kamo sa inyo mga kaupod kag mangin ehemplo sang matuod nga alagad sang katawhan.

Ginapasalamatan namon ang inyo walay untat nga pagpanikasog agud mapabaskog ang kalinong, kahimtangan kag seguridad sang pumuluyo. Padayon ninyo nga ipabutyag ang mataas nga estandard sang propesyonalismo kag pag-alagad nga ginapasanyog sang Philippine National Police.

Mabuhay ang aton kapulisan! Mabuhay ang Philippine National Police!






Arnold Cantores Soqueña | Disyembre 13, 2025

13/12/2025

HAIR STYLIST NGA SI SAN PEDRO NADAKPAN SA BUY-BUST SA BRGY. LOBOC, LAPUZ



ILOILO CITY — Nadakpan ang isa ka hair stylist sa ginpatigayon nga buy-bust operation sang Station Drug Enforcement Team sang Iloilo City Police Station-8 (ICPS-8) sa Brgy. Loboc, Lapuz, las 7:08 sang gab-i sang Disyembre 11, Huwebes.

Ginkilala ang suspek nga si Ritchie Boy “Nonoy” San Pedro, 34 anyos, hair stylist, kag residente sang Brgy. Sta. Cruz, Arevalo.

Sa interview sang Ilonggo News Live kay Police Captain Lester Oliveros, Officer-in-Charge sang ICPS-8, ginpahayag sini nga nagdangat sa duha ka semana ang ila monitoring antes ginpatigayon ang madinalag-on nga operasyon.

Suno pa kay Oliveros, nagahalin sa City Proper ang iligal nga droga nga ginabaligya sang suspek sa iya mga parokyano. Temporaryo man nga nagarenta si San Pedro sa distrito sang Jaro, malapit sa parlor nga iya ginatrabahuhan.

Dugang pa sang OIC, any time ginabayaan sang suspek ang iya trabaho agud idul-ong ang mga order nga iligal nga droga.

Nabaklan si San Pedro sang isa ka sachet sang ginapatun-an nga shabu gamit ang ₱1,100.00 nga buy-bust money. Sa paghinakop sa iya, nakuhaan pa gid ini sang walo (8) ka elongated sachet sang ginapatihan nga iligal nga droga nga nasulod sa isa ka coin purse nga nakuha sa iya shoulder bag.

Ang kabug-aton sang tanan nga narekober nga iligal nga droga ang ginabulubanta nga 4 ka gramo, nga may estimated standard drug price nga ₱27,200.00.

Yara na sa kostodiya sang Iloilo City Police Station-8 ang suspek kag magapangatubang sang kaso sa paglapas sa Republic Act 9165 ukon ang Comprehensive Dangerous Drugs Act of 2002.

| Dec. 11, 2025

Arnold Cantores Soqueña
Jongjong Labto

12/12/2025