08/08/2026
STAR AMAZING BALITA โญ๏ธโญ๏ธโญ๏ธ
Lottery ticket nga nakadaog sang kapin P69 million, aksidente nga nahaboy sang bettor sa basurahan
Kwarta na, nangin basura pa? Isa ka bettor sa Italy ang halos madulaan sang masobra 1 million euros ukon kapin P69 million matapos sini aksidente nga mahaboy ang lottery ticket sa basurahan.
Suno kay Roberto Nicola Toscano, direktor sang waste collection company nga Sanb, nagbakal ang bettor sang MillionDay ticket para sa draw sang Hulyo 31 gamit ang iya paborito nga numero: 2, 4, 8, 10, kag 51.
Matapos i-scan ang ticket sa isa ka tyangge, naggwa sa screen ang mensahe nga โnon-payable.โ
Gilayon sini nga ginhaboy ang ticket sa basurahan sa pagpati nga wala ini may nadag-an.
Apang, sa ulihi, nadiskubrehan sang bettor nga siya ang nakakuha sang jackpot.
Ginpaathag sa iya nga ang mensahe nga โnon-payableโ ang nagakahulugan nga tuman ka dako sang premyo kag indi ini sarang nga i-claim sa mismo nga store kun diin niya gin-scan ang lottery ticket.
Gilayon nga nagbalik ang pamilya sa tyangge apang ulihi na ang tanan bangud nakolekta na ang mga basura.
Nagpangayo sila sang bulig sa Sanb, nga gilayon man nagpatigayon sang operasyon agud matumod kun ano nga garbage truck ang nagkuha sa mga basura gikan sa tyangge.
Nangin mabudlay ang pagrekober sang ticket bangud indi basta-basta na lamang nga buksan ang mga unod sang truck sa posibilidad sang kontaminasyon.
Gani nagpakig-angot ang Sanb sa isa ka kompaniya sa Bari nga may ikasarang nga mag-sort sang mga basura.
Matapos ang maid-id nga pagpangita, madinalag-on nga narekober sang mga trabahante ang lottery ticket kag yara pa ini sa maayo nga kondisyon.
Suno kay Toscano, ginhikap niya ang ticket sa paglaum nga makahatag man ini sang swerte sa ila nga grupo.
Matapos ang operasyon, nagbakal sang scratch-off ticket ang mga empleyado kag lunsay nagdaug sang $57.62 ukon kapin P3,000.
Ini ang pamatuod nga kun kaisa, ang kwarta ang makit-an sa mga lugar nga wala mo ginalauman, bisan pa sa tumpok sang mga basura.
By Bombo Mary Cris Alob
