14/09/2025
Ano ang Kahulugan sang Yellow Alert Level sa atun Power Grid?
Kung ikaw nagapuyo sa Visayas kag nagakabalaka sa imo kuryente sa bulan sang Septyembre, pwes may yara ka sang rason nga magkahangawa.
Ina bangud humalin Agosto 1-6 subong nga tuig, nag-issue ang National Grid Corporation of the Philippines sang yellow alert sang makapila ka beses.
Para sa indi eksperto sa mga termino pag-abot sa power industry, ang yellow alert warning nagakahulugan, “Isa na gid lamang ka aberya daku nga problema ang matuga sini sa grid.”
Sang Agosto 5, diri makit-an nga ang available power supply yara lamang sa 2,528 megawatts apang ang peak demand yara na sa 2,475 megawatts. Tuman ka dyutay sang allowance nga nabilin. Daw kaangay lang nga nagadrive ka sang salakyan kag ang unod sang imo tanke lapit na gid lang maubos. Sarang ka pa man makapauli, apang tion nga magpugok ang trapiko, daku ini nga problema.
Ginkumpirma sang Department of Energy ang ginakulbaan sang kadam-an: 14 ka mga power generating facilities ang nag shutdown sa amu nga adlaw, rason kun ngaa 385 megawatts ang nadula sa Visayas grid, santang 5 ka iban pa ang may minimal nga operasyon.
Amo man ang nangin sitwasyon sa Mindanao, sa diin 11 ang nag offline nga mas nag padaku pa gid sang problema.
Indi gid lamang ini sang Agosto nagluntad. May mga power plants nga guba na nga daan humalin pa sang bulan sang Abril. Ang masakit pa, may 6 ka mga power plants ang madugay na nga wala naga gana tuig 2023 pa.
Duha na ina ka tuig nga may daku nga nabuhin sa power supply apang tubtob subong yari gihapon kita nga nagahulat ini nga makaayo.
Samtang, may yara man sang anum ka mga planta nga naga gana apang below capacity ang gina hatag nga kuryente. Nagakahulugan, may 744 pa ka megawatts nga kulang sa target nga power supply agud makabig ini nga bastante.
Gani ano ang kahulugan sini para sa aton nga mga ordinaryo nga pumuluyo?
May duha gid lang ini ka butang: Una, daku ang posibilidad sang rolling brownouts tion nga may stress sa grid. Ikaduha, kung may power shortages maka pasaka ini sa power rate.
Sa subong, ano ang mga generation kag transmission charges sa inyo bill? Nagataas ini bangud ang presyo sang unstable system ang ginapasa sa mga konsumidor.
Ang aton ginakabalak-an, ang makit-an nga pattern. Ang apat ka yellow alert sa isa ka semana indi makabig nga normal.
Ini sila red flags nga nagapabutyag nga ang power sector indi estable.
Apang tubtob san-o kita sarang nga mabuhi sa kapareho sini nga sistema?
Kung wala sang pagbag-o, daku ang epekto sini sa mga negosyo, pumuluyo kag iban pa nga konsumidor nga nagakinahanglan sang supply sang kuryente nga indi man matam-an sa balayran sini.
Tion na nga indi naton pag-kabigon nga ang yellow alerts isa gid lang ka technical advisory. Dapat atun maintindihan nga ini sila isa ka warning sign nga ang grid sarang na maguba. Kun indi maghulag ang gobyerno, mga regulator, kag power companies, makaluluoy kita nga mga konsumidor nga amo ang magaabaga sang pagtaas sang presyo sini.
