05/06/2026
49 KA TAWO, DEDO SA KAUHAW SA TUNGA SANG DISYERTO; TRAK NGA GINASAKYAN, NAABERYA
Dedo ang 49 ka tawo matapos mauhaw sa isa ka maligwin nga bahin sang Sahara Desert sa Niger sang magub-an ang ginasakyan nila nga trak, suno sa mga otoridad sang Huwebes.
Suno sa Agadez governorate, kalakip ang mga biktima sa isa ka grupo nga papuli na gikan sa Mali para sa isa ka pagsaulog sang mga Muslim sang maubusan sila sang tubig.
Natabu ang insidente masobra 80 kilometros sa nakatundan sang Assamaka, isa ka panguna nga talabukan sa dolunan sang Niger kag Algeria nga malapit man sa Mali.
Nagub-an kuno ang salakyan sang grupo kag wala nakay-o sa pihak sang paghimakas sang driver, sang iya mga kabulig kag mga pasahero.
“Deprived of water and unable to repair the vehicle despite the efforts of the driver, his assistants and the passengers, the travellers found themselves trapped in the heart of a hostile environment where extreme temperatures and the absence of supply points make survival extremely difficult,” suno sa pahayag sang governorate.
Ginlubong naman sa mga mass grave ang mga napatay.
Duha ka tawo ang nakaluwas matapos maglakat sang masobra 50 kilometros agud malab-ot ang isa ka ginakuhaan sang tubig antes nagpadulong sa Assamaka kag ginpahibalo sa mga otoridad ang natabu.
Kilala nga ruta sang mga migrante nga nagapadulong sa Europa gikan sa magkatuhay nga pungsod sa Africa ang nasambit nga bahin sang disyerto, kon sa diin madamo na sang napatay sadto bangud sa tuman nga kauhaw kag kagutom.
