21/09/2026
MORE Power Gin-abi-abi Ang Pagkakas sang VAT sa Systems Loss; Samtang, DOE Secretary Garin Nagpabutyag nga Power Generation Companies Ang Balasulon sa Problema sa Kuryente sa Visayas
Iloilo City – Nakakita sang kasanag sa tunga sang madulom nga sitwasyon sa Visayas si MORE Power President kag CEO Mr. Roel Castro matapos ginkakas sang Bureau of Internal Revenue ang VAT sa systems loss agud bisan paano mahagan-hagan man ang pagbakho sang mga pumuluyo sa mataas nga power rate dala man sang pagsaka sang generation charges.
Ini bisan pa porsyon gid lamang ini sang kabug-usan nga bulanan nga bill sang mga konsumidor.
"This is a welcome move by the government especially by the Bureau of Internal Revenue by removing the VAT on system loss. We have to understand, this is a certain percentage of a certain percentage. We have to be thankful that goverment acted on this quickly so consumers can realize the reduction as soon as possible,” suno pa kay Castro.
Apang ang systems loss ang isa gid lamang ka portion sang problema sang power industry. Sa adlaw-adlaw nga monitoring sang National Grid Corporation of the Philippines, makit-an ang pagnubo man sang power supply gikan sa mga power generators. Magaresulta sa mas mataas nga power generation cost ang padayon nga kakulang sang power supply.
Positibo si Castro nga mangin operational sa gihapon ang mga power generators agud mahagan-hagan man ang problema sa Visayas ilabi na gid sa Panay.
"We are really optimistic na dapat babalik siya. As per DOE, may babalik ng September. May different dates na nandoon per official. Hopefully the soonest possible time yung baseloads mabalik man lang," suno pa kay Castro.
Sa pila ka semana, ginaulan sang reklamo ang MORE Power, Negros Power kag Bohol Light gikan sa nagkalain-lain nga sektor bangud sa pagpatuman sang MLD.
Ginmando sang National Grid Corporation of the Philippines ang manual load dropping agud malikawan ang pag collapse sang grid tuga sang kakulang sang supply gika sa mga generators.
Sa pihak sang malapnagon nga information dissemination, gin-ako ni Castro nga kutob sa mga distribution utilities kaangay sang MORE Power kag Negros Power ang masami sang mga reklamo.
Nagpabutyag naman si DOE Secretary Sharon Garin nga indi sala sang mga distribution utilities ang estado sang power supply sa pungsod sa subong.
Sa iya interview sa DZMM, ginpaathag ni Garin nga may kapaltahan ang generation kag transmission sector sa power situation sa subong. Maluwas sini, may mga problema man nga nagtuhaw sa subong nga kun tani sarang ini nasolusyonan may may 10 na ka tuig ang nakaligad.
"No, they receive what they can receive. They try naman. Iba naghahanap ng paraan. Distribution is the least guilty in this place," suno pa kay Garin.
Nagalaum naman si Castro nga kung patigayunon ang inquiry, may madesisyunan nga short-term kag long-term solution para sa Visayas.
Base sa collective data nga ginrelease sang DOE kag NGCP, Therma Visayas Units 1 kag 2 ang sarang mangin operational subong nga Setyembre, samtang ang PEDC naman lakip ang iban pa nga mga base load generation ang mahimo makabalik sa katapusan sang Oktubre.
Tion magbalik sa operasyon ang nasambit nga mga planta, posible mangin estable na ang supply sang elektrisidad sa Visayas grid.
