92.7 Spirit FM Infanta

02/09/2026

02/09/2026

GENERAL NAKAR DISTRICT JAIL, IPINAMALAS MAAGANG SERBISYONG MEDIKAL

Agarang tumugon ang General Nakar District Jail (GNDJ) sa pangangailangang pangkalusugan ng isang residente na nakaranas ng pagkahilo at pananakit ng balakang.

Sa ilalim ng pamumuno ni JCINSP Harry C. Ballon, Warden ng GNDJ, pinangunahan ni JO3 Valencia, Jail Unit Nurse, ang pagbibigay ng paunang lunas sa residente. Isinagawa niya ang agarang pagsusuri sa kondisyon ng pasyente sa pamamagitan ng pagkuha ng blood pressure at oxygen saturation gamit ang pulse oximeter.

Matapos ang paunang assessment, nagbigay rin si JO3 Valencia ng angkop na gamot para sa pagkahilo bilang paunang lunas habang patuloy na minomonitor ang kalagayan ng residente.

Ayon sa pamunuan ng General Nakar District Jail, layunin ng agarang pagtugon na matiyak ang kaligtasan at mabigyan ng wastong paunang serbisyong pangkalusugan ang mga nangangailangan ng tulong.

Dagdag pa, ipinakita ng insidenteng ito ang patuloy na pagtupad ng General Nakar District Jail sa mandato nitong magbigay ng maagap, makatao, at may malasakit na serbisyo, hindi lamang sa mga Persons Deprived of Liberty (PDLs) kundi maging sa mga miyembro ng komunidad.

Patuloy umanong isinusulong ng Bureau of Jail Management and Penology (BJMP), sa pamamagitan ng BJMP Regional Office Calabarzon, ang kultura ng kahandaan at malasakit sa paglilingkod sa publiko sa anumang pagkakataon. | via Camille Soriano

02/09/2026

01/09/2026

PRELATURA NG INFANTA, NANAWAGAN NG KAPAYAPAAN AT KATARUNGAN SA GITNA NG SIGALOT SA NUEVA VIZCAYA

Naglabas ng isang solidarity statement ang Prelatura ng Infanta sa pangunguna ni Bishop Dave Dean Capucao, bilang pakikiisa sa mga komunidad na apektado ng lumalalang tensiyon kaugnay ng pagmimina sa Kasibu, Nueva Vizcaya.

Sa pahayag, ikinabahala ng Prelatura ng Infanta ang mga ulat ng komprontasyon, pagkakasugat, pag-aresto, at pangamba ng mga residente dulot ng hidwaan sa lugar. Binigyang-diin nito na ang buhay ng bawat tao—kabilang ang mga magsasaka, katutubong pamayanan, manggagawa, alagad ng batas, at mga opisyal ng pamahalaan—ay may likas na dignidad at nararapat igalang.

Nanawagan din ang Simbahan sa pamahalaan, mga law enforcement agencies, at lahat ng sangkot na panig na pairalin ang pagpipigil, pangalagaan ang karapatang pantao, at isulong ang dayalogo sa halip na karahasan sa pagresolba ng sigalot.

Iginiit din ng Prelatura ang kahalagahan ng pangangalaga sa kalikasan at paggalang sa karapatan ng mga katutubong pamayanan, kabilang ang kanilang malaya, nauna, at may sapat na kaalamang pakikilahok sa mga desisyong may kinalaman sa kanilang mga lupang ninuno.

Nag-ugat ang kasalukuyang isyu sa pagtutol ng ilang residente, mga katutubong Bugkalot-Ilongot, at mga grupong pangkalikasan sa isinasagawang mineral exploration ng North Luzon Mineral Resources Corporation (NLMRC). Ayon sa mga tumututol, maaaring maapektuhan ng proyekto ang kanilang mga lupang ninuno, kagubatan, pinagkukunan ng tubig, at kabuhayan. Dahil dito, nagtayo ang mga residente ng mga community barricade upang pigilan ang pagpasok ng mga kagamitan at suplay para sa operasyon ng kumpanya.

Sa mga nagdaang linggo, ilang insidente ng komprontasyon ang naitala sa lugar na humantong sa pagkakasugat at pag-aresto sa ilang indibidwal, habang patuloy namang nananawagan ang iba't ibang sektor ng mapayapang pag-uusap at paggalang sa karapatang pantao.

Sa pagtatapos ng kanilang pahayag, hinimok ng Prelatura ng Infanta ang lahat ng mananampalataya na ipagdasal ang Nueva Vizcaya at ang pagkamit ng katarungan, pagkakasundo, at pangmatagalang kapayapaan, kasabay ng panawagang tiyaking ang pag-unlad ay hindi isinasakripisyo ang dignidad ng tao at ang pangangalaga sa kalikasan. | via Camille Soriano

01/09/2026

PAMAHALAANG BAYAN NG INFANTA, QUEZON, NAGLAHAD NG MGA NAGAWA AT MGA PLANONG IPATUTUPAD SA ULAT SA BAYAN 2026

Nag-ulat ang Pamahalaang Bayan ng Infanta sa Ulat sa Bayan 2026, kung saan inilahad ang mga nagawa ng kasalukuyang administrasyon at ang mga planong ipatutupad para sa patuloy na pag-unlad ng bayan.

Naging panauhin sina General Nakar, Quezon Mayor Alfredo Pujeda at Bokal Sam Nantes. Dumalo rin ang mga opisyal at kawani ng lokal na pamahalaan, barangay health workers, mga kinatawan ng Sandatahang Lakas, Philippine National Police, Bureau of Fire Protection, mga magsasaka, mangingisda, mga mamumuhunan, at marami pang iba.

Nauna ring nagbigay ng ulat ang mga miyembro ng Sangguniang Bayan ng Infanta kaugnay ng kanilang mga nagawa at mga programang isinulong sa kani-kanilang mga larangan. Kabilang dito sina Maxiel Rodrigo Mortiz, Laiza Ramos, Cherry Macasaet, Sherwin Avellano, Mario Louie Cuento, Anlo, Cuento, Ronald Yu at Timothy John Junteral. Nagbigay rin ng ulat sina PPLB President Noel Turgo at PPSK President Tim Borreo at Vice Mayor Mannie America.

Sa kaniyang ulat, binigyang-diin ni Mayor LA Ruanto ang mga hakbang ng administrasyon sa ilalim ng Lingap Agenda, kabilang ang pagpapatupad ng Zero Kickback Policy, pagsasaayos ng sistema ng pamahalaan, at pantay na paghahatid ng serbisyo publiko.

Sa sektor ng edukasyon, sinabi ng alkalde na nagsagawa ang lokal na pamahalaan ng Education Summit matapos lumabas sa datos ng DepEd na kulang ang mga silid-aralan at mababa ang antas ng pagbasa ng mga mag-aaral. Dahil dito, sinabi niyang hindi lamang aasa ang lokal na pamahalaan sa pondo ng National Government at magsasagawa ng locally funded na pagpapatayo at pagkukumpuni ng mga classroom. Inilunsad din ang Executive Order No. 24 o ang programang "Ang Teacher Ko, Nanay at Tatay Ko" upang palakasin ang partisipasyon ng mga magulang sa pagkatuto ng mga bata.

Kabilang din sa mga planong ipatutupad ang rehabilitasyon ng Infanta Commercial Center o ICC, pagtatayo ng modernong fishport, bagong slaughterhouse, pampublikong sementeryo, at mga pasalubong center na inaasahang lilikha ng kabuhayan at magpapalakas sa ekonomiya ng bayan.

Sa usapin ng kapayapaan at kaayusan, sinabi ng alkalde na ipagpapatuloy ng pamahalaan ang mahigpit na kampanya laban sa kriminalidad at ilegal na droga. Aniya, mas nanaisin niyang maghigpit kaysa malagay sa panganib ang buhay ng mga mamamayan. Kinilala rin ang mga natamong pagkilala ng Infanta PNP sa crime clearance at crime solution efficiency.

Sa pangangalaga sa kalikasan, ipinagmalaki ng alkalde ang Eco-Resiklo Program, na nakatulong sa pagbawas ng basurang dinadala sa landfill sa pamamagitan ng recycling. Binigyang-diin din niya na ang pangangalaga sa kalikasan ay mahalagang bahagi ng pagpapaunlad ng bayan.

Ibinahagi rin ang Vision Statement ng Infanta, na binuo kasama ang Municipal Development Council at iba't ibang sektor ng lipunan. Layunin nitong gawing isang progresibo, inklusibo, at napapanatiling bayan ang Infanta at maisakatuparan ang matagal nang JICA Master Plan na maging sentro ng komersyo.

Sa pagtatapos ng programa, nagpasalamat si Mayor LA Ruanto sa suporta ng iba't ibang sektor ng komunidad at hinikayat ang lahat na makiisa sa patuloy na pagpapaunlad ng bayan. Nagbigay rin ng pagtatanghal ang Quezon Pride bilang bahagi ng programa. | via Camille Soriano | Video courtesy to Municipal Government of Infanta.

01/09/2026

01/09/2026

31/08/2026

UNANG TAON NG PAGLILINGKOD BILANG OBISPO NI BISHOP DAVE DEAN CAPUCAO, IPINAGDIWANG KASABAY NG FAREWELL MASS PARA SA RELIKYA NI SAN JUAN DELA CRUZ

Ipinagdiwang noong August 28, 2026 sa Saint Mark's Cathedral sa Infanta, Quezon ang unang taon ng paglilingkod bilang obispo ni Bishop Dave Dean Capucao, kasabay ng farewell mass para sa relikya ni San Juan Dela Cruz, na nakatakdang maglakbay sa susunod nitong destinasyon sa Dumaguete.

Ayon kay Bishop Capucao, isinabay ang paggunita sa kaniyang unang anibersaryo bilang obispo sa pagdiriwang na nakatakda sana sa darating na Sept. 5 dahil aalis siya patungong Roma sa Setyembre 1, 2026 upang dumalo sa isang kurso para sa mga bagong obispo.

Sa kaniyang homiliya, binigyang-diin ng obispo na ang pagdiriwang ay hindi tungkol sa kaniyang sarili o sa kaniyang mga nagawa, kundi isang pasasalamat sa katapatan ng Diyos.

Aniya, sa loob ng isang taon ng kaniyang paglilingkod, naranasan niya ang paggabay ng Diyos at natutuhan niyang makinig, makibahagi sa kagalakan at paghihirap ng sambayanan ng Diyos. Patuloy din niyang isinasabuhay ang diwa ng kaniyang motto na "Sentire Cum Ecclesia," na nangangahulugang pakikidama sa buhay ng Simbahan.

Ibinahagi rin niya ang inspirasyon mula kay San Juan Dela Cruz, na nagtuturo na ang bawat tunay na alagad ni Kristo ay daraan sa paglilinis o purification. | via Camille Soriano