Kampus Konek, Isulan National High School, Sultan Kudarat, Isulan (2026)

26/02/2025

𝗜𝗦𝗣𝗢𝗥𝗧𝗦 𝗕𝗔𝗟𝗜𝗧𝗔 | NDI Warriors nagreyna kontra NDD Blazing Tigresses; dinungisan ang undefeated record

Nagpamalas ng mga kalkuladong ispayk at pamatay na service ang Notre Dame of Isulan (NDI) Warriors laban sa Notre Dame of Dukay (NDD) Blazing Tigresses sa dikdikang 23-25, 25-23, at 25-19 sagupaan, sapat na upang mantsahan ang malinis ng record ng Tigresses sa ginanap na RSPC Quarterfinals Friendly Match sa Narra Park, ika-26 ng Pebrero.

Kasabay ng matinding sikat ng haring araw ay siyang determinasyon ng dalawang koponan na manaig laban sa katunggali, ibinandera ng Warriors ang kulay berde habang dilaw naman ang sa Blazing Tigresses.

𝗣𝗮𝘂𝗻𝗮𝗻𝗴 𝗚𝗮𝗹𝗮𝘄
Mainit ang naging palitan ng puntos sa unang set ng laban sa pangunguna ni Shairish Usop para sa NDI na nagpakawala ng mga atakeng hirap depensahan ng kalaban ngunit hindi rin nagpahuli ang NDD agad na gumawa ng perpektong counterattack na siyang mano-manong isinulat ng mga batang mamamahayag..
Kayod-marinong hinabol ng Tigresses ang kalamangan ng Warriors sa dulong bahagi ng set habang ang kaninang lamang na Warriors, ngayon ay nakabuntot na hanggang sa matapos ang set.

𝗣𝗮𝗴𝗯𝗮𝘄𝗶 𝗻𝗴 𝗞𝗼𝗻𝘁𝗿𝗼𝗹
Pagsabak ng ikalawang set ay patuloy lang ang pagpapaulan ng Warriors ng matatalas na service na nagresulta ng maraming service aces.

Hindi naman nagpaiwan ang Tigresses at umatake nang makakuha ng magandang firstball na pinangunahan ni Christine Gabo na naging sakit sa ulo para sa Warriors.
Sa huling bahagi ng set ay napakaliit lang ng agwat subalit sa tulong ng magaling na playmaking ni Jahleel Baun na nagpahirap sa kalaban ay nagawang masikwat ng Warriors ang ikalawang set, 25-23.

𝗛𝘂𝗹𝗶𝗻𝗴 𝗚𝗮𝗹𝗮𝘄
Hindi na nagpatumpik-tumpik pa ang Warriors at agad na nagpakitang-gilas nang nagbigay ng service ace si Baun at ang pipe attack ni Usop na sinabayan ng ilang miscommunication errors upang makuha ang maagang kalamangan sa set.
Tila nagbago ang ihip ng hangin ng sa panig ng Warriors ay si Rocelle Lyka Dequina na ang nag serve dahil unti-unting bumitaw sa kalabit ng Tigresses ang Warriors nang gumawa ito ng 7-0 run, 14-8.

Ginising ng down the line attack ni Gabo ang Tigresses at gumawa ng mini-run ngunit agad itong naapula ng crosscourt spike ni Dequina upang ibigay ang match point sa Warriors hanggang sa isang service error ang nagtapos sa laban, 25-19.

26/02/2025

𝗜𝗦𝗣𝗢𝗥𝗧𝗦 𝗘𝗗𝗜𝗧𝗢𝗥𝗬𝗔𝗟 | Tagumpay: Kalusugang Pisikal at Mental

Puso, Pawis, Luha. Ilan lang sa mga kinakailangan ng isang atleta para sa pagkamit ng tagumpay, ngunit sa pag-usbong ng panahon ay unti-unting nabibigyang-pansin ang kalusugang pangkaisipan o mental health. Dagdag pa ng pagod sa araw-araw na pag-eensayo at ang mainit na mata ng publiko, nagiging hadlang pa ito sa pagkamit ng tunay na halaga ng mga larong pampalakasan: ang kasiyahang nakukuha sa paglalaro nito, manalo man o matalo.

Isa sa mga pangunahing suliranin ay ang stigma na bumabalot tulad ng takot sa pagkatalo, ang pangangailangang mapanatili ang mabuting imahe sa mata ng tao, at ang mga injury na kanilang natamo. Mahalaga na sa kanilang daan tungo sa paggaling ay nabibigyan sila ng supporta at mas napapatibay pa ang kanilang mga isipan. Isa lang ang manlalaro ng balibol na si Shairish Usop ng Notre Dame of Isulan sa mga taong nakaranas ng anxiety at burnout sa paglalaro na patunay na kailangan rin bigyang-diin ang mental health ng mga atleta gaya nang kanilang pagpapahalaga sa kanilang pisikal na kalusugan.

“Mahalaga ang mental health para sa aming mga atleta dahil tulad ng aming physical health, hindi kami makakapaglaro ng maayos at maipakita ang aming best performance,” ani Usop.
Malungkot isipin na kung patuloy itong balewalain ay isang karera nanaman ang masasayang. Sa bawat kayod tungo sa panalo ay huwag kalimutang magpahinga at pangalagaan ang kanilang mga sarili dahil ang tunay na tagumpay ay ang kanilang kakayahang manatiling matatag sa kabila ng mga pagsubok.

26/02/2025

𝗜𝗦𝗣𝗢𝗥𝗧𝗦 𝗟𝗔𝗧𝗛𝗔𝗟𝗔𝗜𝗡 | Bola, Buhay, Tagumpay

Bump. Set. Spike. Ganyan umiikot ang mundo ng volleyball—mabilis, puno ng diskarte, at gagawin ang lahat para lang maitaas ang bola. Sa bawat pagsalo ng bola, may dalang pangarap; sa bawat set, may tiwala sa kakampi; at sa bawat malakas na spike, may matinding determinasyong lampasan ang hamon ng laro. Simple mang tingnan, kinakailangan sa larong ito ang puso, diskarte, at tiyaga upang makamit ang tagumpay.

Sa Pilipinas, isa ang volleyball sa mga pinakatanyag na palakasan. Mula sa masisiglang laro sa barangay hanggang sa mga prestihiyosong collegiate at professional leagues, hindi maikakaila ang lumalagong pagmamahal ng mga Pilipino sa sport na ito. Ang UAAP at NCAA ay nagsisilbing entablado para sa mga kabataang atleta na nangangarap makapasok sa propesyonal na liga tulad ng Premier Volleyball League (PVL). Bukod sa kasikatan ng mga manlalaro, ang suporta ng mga tagahanga ay patunay na ang volleyball ay hindi lamang isang laro kundi isang inspirasyon para sa marami.

Sa masigasig na probinsya ng Sultan Kudarat, isa lang si Sairish Usop sa mga taong lubos na napamahal sa paglalaro ng volleyball. Bata pa lang siya ay mahilig na siyang sumali sa mga paligsahan sa kanilang bayan, dala ang pangarap na balang araw ay makilala sa larangang ito. Sa bawat pagsasanay, hindi lang pisikal na lakas ang kanyang pinagyayaman kundi pati ang disiplina at dedikasyong kinakailangan upang makamit ang tagumpay.

“Gusto kong maglaro ng volleyball kasi dito ko nararamdaman na buhay na buhay ako—parang bawat rally, bawat spike, at bawat panalo ay patunay na kaya kong lampasan ang kahit anong challenge sa buhay.”

Sa kabila ng kasikatan, hindi pa rin mawawala ang mga hamon sa larangan ng volleyball sa bansa. Kulang ang mga pasilidad sa maraming lugar, at hindi lahat ng batang nangangarap maging atleta ay may sapat na oportunidad upang maipakita ang kanilang talento. Gayunpaman, patuloy ang pagsisikap ng iba’t ibang organisasyon upang maiangat ang antas ng kompetisyon at mas marami pang kabataan ang mahikayat na lumahok sa sport. Sa huli, ang volleyball ay hindi lamang tungkol sa laro—ito ay tungkol sa pagsusumikap, pagkakaisa, at pangarap na kayang abutin sa tamang tiyempo at tiyaga.

26/02/2025

𝗟𝗔𝗧𝗛𝗔𝗟𝗔𝗜𝗡 | Guhit ng Kalayaan

Mainit ang sikat ng araw, ngunit mas mainit ang bagong uso sa lansangan. Maluluwag na pantalon, malalaking t-shirt, makukulay na sapatos, at salaming may bagsik—ito ang bumabalot sa silweta ng kabataan. Sa bawat kanto, sa bawat eskinita, lumalakad sila na may kumpiyansa, dala ang istilong tinaguriang “geng-geng.” Isang pormang hindi lang basta kasuotan, kundi isang paninindigan.

𝗚𝗮𝗹𝗮𝘄 𝗻𝗴 𝗠𝘂𝘀𝗶𝗸𝗮, 𝗧𝗶𝗻𝘁𝗮 𝗻𝗴 𝗞𝘂𝗹𝘁𝘂𝗿𝗮
Nag-ugat sa tunog ng kalsada at sining ng masa, ang “geng-geng” ay nagkaroon ng puwang sa puso ng kabataan. Ayon sa mga ulat, lumakas ang kilusan sa TikTok, kung saan ang hashtags na at ay umani ng milyun-milyong views. Ang salitang “geng-geng” ay hango sa salitang “gang”— hindi naghahanap ng gulo kundi naghahabi ng isang makabagong estilo ng henerasyon.

𝗨𝘀𝗼 𝗼 𝗣𝗮𝗻𝗶𝗻𝗶𝗻𝗱𝗶𝗴𝗮𝗻
Hindi lang ito simpleng kasuotan, kundi isang rebolusyon sa pananamit. Ayon sa mga eksperto sa moda, ito ay pinaghalong hip-hop at modernong Pinoy streetwear, isang simbolo ng pagsasanib ng luma at bago. Habang patuloy ang takbo ng uso, isang bagay ang tiyak—ang “geng-geng” ay hindi lang istilo, kundi kwento. At sa bawat pormang isinusuot, may tinig na gustong marinig: “Ito ako, at malaya akong ipakita ito.”

26/02/2025

𝗟𝗔𝗧𝗛𝗔𝗟𝗔𝗜𝗡 | Mukha ng laya: Sandata ng Bayan,
Laban ng Katotohanan

Tahimik ang umaga habang naglalakad ako sa makipot na daan, kung saan matatagpuan ang tahanan ng mga salitang may saysay at lalim. Sa bawat yapak, kasama ang kwentong minsan nang isinulat, ng mga peryodistang tinuring na ilaw sa madilim na paligid. Sa papel at tintang ginamit nilang sandata, naramdamanan ko ang tapang na hindi kailanman nawala. Sa bawat pahinang binuklat, naramdaman ko ang tibok ng mga pusong naglakas-loob na tumindig, sa mundong madalas ay nagpapatahimik sa mga sumisigaw ng totoo’t matuwid.

𝗦𝗮 𝗟𝗶𝗸𝗼𝗱 𝗻𝗴 𝗣𝗹𝘂𝗺𝗮 𝗮𝘁 𝗧𝗶𝗻𝘁𝗮
Hindi lang tinta ang bumabaha sa pahayagan, kundi pawis at dugo ng mga nagsusulat ng katotohanan. Si Marcelo H. del Pilar, sa panulat ay hindi bumitaw, pagpapalaya sa bayan, kanyang ipinangakong sigaw. Hanggang ngayon, tulad ng diwa niyang dalisay, may mga peryodistang handang magsakripisyo’t di magpapatinag. Sila ang nagsilbing liwanag sa dilim ng kasinungalingan, pilit hinahawi ang ulap para sa liwanag ng katotohanan. Ayon sa Reporters Without Borders, ang Pilipinas ay nasa ika-132 puwesto ng mga pamahayagang nangunguna upang isawalat ang tapat at totoong serbisyo sa sangkatauhan, pruweba ng patuloy na laban sa malayang pahayagan.

𝗧𝗶𝗻𝗶𝗴 𝗻𝗮 𝗛𝗶𝗻𝗱𝗶 𝗠𝗮𝗽𝗮𝗽𝗮𝘁𝗮𝘆
Sa lumang gusali, larawan ng matatapang ang nakapinta, tulad nina Gerry Ortega at Percy Lapid, na buhay ay inalay para sa paglilingkod. Ang kanilang mata’y may pangakong iniwan— na katotohanan kailanma’y ‘di mapapatahimik, kahit pagsubok ay walang patid. Sa tinta ng tapang, pluma’y hindi masisira, sa bawat pahina, kalayaan ay muling iwinawagayway.

𝗣𝗮𝗺𝗮𝗻𝗮 𝗻𝗴 𝗞𝗮𝘁𝗮𝗽𝗮𝗻𝗴𝗮𝗻 𝗮𝘁 𝗞𝗮𝘁𝗼𝘁𝗼𝗵𝗮𝗻𝗮𝗻
Bilang mambabasa at manunulat, pamana nila’y aking dala, sa bawat titik at pangungusap, layunin ay hindi lang magkuwento, kundi magmulat. Sa mundong puno ng panlilinlang, may tinig na hindi matitinag, may mga pusong susulat ng tama at totoo, kahit kapalit ay sakit at dusa sa dulo. Sa tinta ng katotohanan, kalayaan ay di masusugpo, dahil sa bawat patak ng pluma, may sigaw na bumubuo: “Ang bayan ay mananatiling malaya, habang may naninindigan para sa tama!”

26/02/2025

𝗟𝗔𝗧𝗛𝗔𝗟𝗔𝗜𝗡 | Huling Patak ng Tinta

Mataimtim ang kanyang titig sa papel, nanginginig ang kamay sa pagsulat ng salitang maaaring magpagalit sa makapangyarihan. Isang mamamahayag ang pinatahimik—hindi dahil sa kasinungalingan, kundi dahil sa katotohanang nais niyang ipaglaban. . Ayon sa Committee to Protect Journalists, mahigit 99 na mamamahayag sa Pilipinas 2023 ang pinaslang sa bansa mula 1992 hanggang 2023, patunay na may mga kwentong sinusubukang ilibing ng dahas.

𝗧𝗶𝗻𝘁𝗮 𝗟𝗮𝗯𝗮𝗻 𝘀𝗮 𝗕𝗮𝗹𝗮
Banta ng dahas, paninira, at takot—lumipas ang mga taon, pero hindi nawala ang mga aninong nagmamasid, naghahanap ng paraan upang pigilan ang mga nagsusulat ng katotohanan. May mga ulat na hindi inilathala, may mga pahayagang sapilitang ipinasara. Ngunit tulad ng sinabi ni Gem Avanceña, may mga kwentong hindi maaaring talikuran—dahil ang hindi pagsasalita ay isang uri ng pagtalikod sa katotohanan.

𝗦𝗮 𝗟𝗶𝗸𝗼𝗱 𝗻𝗴 𝗕𝗮𝘄𝗮𝘁 𝗣𝗮𝗵𝗶𝗻𝗮
May istoryang handang pagbayaran ng buhay—hindi dahil sa kagustuhang mamatay, kundi dahil sa paniniwalang may dapat lumaban upang ang katotohanan ay manatili. At sa huli, maaaring manahimik ang isang mamamahayag, ngunit hindi kailanman ang kwentong iniwan niya.
“Kapag ang tinta’y nagtagumpay, kahit anong bala’y walang saysay.”

26/02/2025

𝗘𝗗𝗜𝗧𝗢𝗥𝗬𝗔𝗟 | Tinta ng mamamahayag: hindi lalayag

𝗞𝗮𝘀𝗶𝗸𝗮𝘁𝗮𝗻𝗴 𝗪𝗮𝗹𝗮𝗻𝗴 𝗟𝗮𝗺𝗮𝗻
Wala siyang dalang tanong na naghuhukay ng kasagutan, wala siyang dalang paninindigan kundi sariling pangalan. Sa isang press conference na dapat sana’y para sa mga lehitimong mamamahayag, isang influencer na tinaguriang “Thailand Girl” ang inimbitahan. Isang personalidad na ang puhunan ay kasikatan, hindi kredibilidad. Hindi siya isang mamamahayag, walang pagsasanay sa masusing pagsisiyasat, ngunit tila ba binibigyan siya ng parehong plataporma ng mga tagapagdala ng balita.

𝗣𝗲𝗹𝗶𝗸𝘂𝗹𝗮 𝗻𝗴 𝗞𝗮𝘀𝗶𝗻𝘂𝗻𝗴𝗮𝗹𝗶𝗻𝗴𝗮𝗻
Sa mata ng isang mamamahayag, ang paghahanap ng katotohanan ay hindi isang pagsasayaw sa harap ng kamera. Ito ay pagsuong sa panganib, pagsalunga sa agos, at paglaban sa kasinungalingan. Pinalitan ng mga clickbait ang masusing pagsisiyasat, at sa isang iglap, ang mga opinyong walang batayan ay nagiging tila katotohanan. Mas malawak pa ang epekto nito sa kabataan, na ngayon ay lumalaking mas pinaniniwalaan ang viral kaysa sa beripikadong impormasyon. Isang minahan ang Social Media ng mga haka-haka, at sa sobrang ingay ng mundo, natatabunan ang boses ng totoong peryodismo.

𝗟𝗮𝗯𝗮𝗻 𝗻𝗴 𝗞𝗮𝗯𝗮𝘁𝗮𝗮𝗻
Kung sino ang maingay, siya ang pinakikinggan. Kung sino ang sikat, siya ang pinaniniwalaan. Ganito na ba kababaw ang ating kamalayan? Binura ng milyon-milyong tagapanood ang tinta ng peryodista, mas mahalaga na ngayon kung ano ang uso kaysa sa kung ano ang totoo. Ngunit sa kabila ng lahat, patuloy ang peryodista sa pagsagwan upang magpahayag, sapagkat kung ang tinta nila’y di lalayag, ito ay tuloyang mababahag.

26/02/2025

𝗞𝗢𝗟𝗨𝗠 | Sa likod ng tinta

Sa bawat halalan, ang pangalan ng mga kilalang angkan ay laging nasa balota, tila ba walang lugar para sa mga bagong plataporma. Hindi parin mawari na sa kabila ng hindi katanggap-tanggap na nararanasan ng mga Pilipino sa kamay ng mga politiko nanatili paring matatag ang political dynasty sa bansang ito.

Kapansin-pansin din ang political dynasty sa probinsya ng South Cotabato kung saan ilang kilalang pamilya sa iba’t-ibang bayan ay patuloy na nangangalakad. Tinaguriang makapangyarihan ang mga pamilyang ito hindi lamang sa larangan ng politika kundi pati narin sa kanilang kayamanan.

Nakasaad naman sa Section 10 ng Republic Act 10742 o Sangguniang Kabataan Act of 2015, ang pagbabawal ng pagtakbo sa SK ng may mga kaanak sa pamahalaan. Gayunpaman, kaisipan parin kung bakit isinawalang bahala ang batas bagama’t alam ng bawat Pilipinong mambabataas na nagreresulta ito ng tiwaling serbisyo.

Panahon na upang magising ang mga Pilipino na ang political dynasty ay anay sa lipunan. Mahalagang matanto ang paghalal ng kwalipikado at tapat sa gobyerno. Kaya sa mga susunod na halalan, bumoto ng tama, bumoto nang tama, para hindi masabihang BOBO ‘to.

Kampus Konek

26/02/2025

26/02/2025

26/02/2025

26/02/2025

26/02/2025

26/02/2025

26/02/2025

26/02/2025

Address

Website

Alerts

Shortcuts

Share

Category