02/08/2025
Nagpabutyag sang pagka dismaya ang mga mainstream media outfits sa Kabankalan, matapos nakaeksperyensya sang pagpakahuya samtang naga-cover sang celebrity night sa syudad, Agusto 2.
Ang 102.9 K5 News FM Kabankalan kag 99.7 Brigada News FM Kabankalan ang ginhitsapwera nga daw salin nga pagkaon sa plaza.
Ginpunggan ang mga ini nga makasulod sa naandan na nga "designated" nga lugar para sa mga media, kag ginpamangkot pa kon ngaa damo sila, apisar nga ang ila tuyo ang paghatag sang coverage para sa publiko.
Imbolbado sa pagpakahuya ang isa ka babayi nga ginkwestyon sila nga "MEDIA kamo? Ngáa kadamu sa inyo haw? — isa ka pamangkot nga ginpahayag nga may pagtaas sang tingog kag may pagduro sa ila.
Nakaangkon man sila sang kahuy-anan sang ginhambalan sila sang mga deployed force multipliers nga "TT, gwa kamo, reject kamo."
Wala pa sang pahayag halin sa organizers ukon sa mga otoridad parte sa isyu.*
