01/06/2026
AFP GIBARUGANG NAKALAS ANG 2 KA TRAINEE TUNGOD SA KAINIT SA PANAHON; PAMILYA NAGTUONG GIKULATA ANG MGA BIKTIMA
Patay ang duha ka trainee sa Philippine Army atol sa ilang military training sa Tarlac, ug karon gisusi na sa Philippine Army ang maong insidente aron matino ang tanang kahimtang nga hinungdan sa ilang kamatayon.
Ang mga namatay giila nga sila si Candidate Soldier (CS) Johndyl L. Lemosniro, 19 anyos, taga-New Corella, Davao del Norte, ug si CS Junel L. Flores, 24 anyos, taga-Lamitan City, Basilan.
Matod sa opisyal nga pahayag sa Training Command, nakasinati ang duha og grabeng komplikasyon sa panglawas tungod sa sobra nga pisikal nga kakapoy ilawom sa taas nga temperatura. Base sa medical certificates nga gipagawas sa mga doktor, sila gituohang naigo sa Exertional Heat Related Injury o heat stroke.
Gipadayag usab nga nakasinati sila og mga komplikasyon sama sa electrolyte imbalance ug grabeng epekto sa utok. Ang final diagnosis nagpakita nga ang duha namatay tungod sa brain complications ug swelling o encephalopathy nga direktang resulta sa severe heat stroke.
Sa dihang nakita ang ilang mga sintomas, gidala dayon sila sa ospital diin gihatagan og emerhensiyang medikal nga pag-atiman. Apan bisan pa sa mga paningkamot sa medical teams, wala na sila maluwas.
Subay niini, walay kabutangan ang gibati sa pamilya'g kabanay sa mga trainee tungod matud pa sa sobrang bun-og nga nahiagoman sa mga biktima diin ilang gibarugan nga dili sila mutoo nga heat stroke lang ang hinungdan ug ilang gilantaw nga namatay sa sobrang pagkulata ang duha.
Nagpadayon karon ang imbestigasyon diin giingon sa Philippine Army nga ilang susihon ang tanang detalye sa insidente aron masiguro nga masunod ang mga safety protocols ug mapanalipdan ang kaayohan sa mga trainee.
via Training Command/Facebook
