20/05/2026
Kadagiti KAILYAN nga Taga Pao, Kasibu,NV
Tatta, agtitinnulong tayo gapu iti maysa a napateg unay a banag ti panangsalaknib iti daga, karayan, bantay, ken masakbayan dagiti annak tayo. Adu kadatayo iti agbuteng ken agdanag iti mapaspasamak a panagmina iti ili tayo. Ket gapu iti dayta, adda dagiti tattao nga agsao iti social media tapno maipakita da ti kinapudno ken ti pannakaitedda iti panangkontra kadagiti Pro mining nga agtultuloy a mangsuporta iti mina uray no maapektaran ti ili ken biag dagiti umili.
Ngem kakailian, saan a krimen ti agsao iti kinapudno. Saan a basol ti mangsalaknib iti daga nga nagtaudan tayo. Ti social media ket saan laeng a pagliwliwaan,isu met ti nagbalin a boses dagiti awan ti pannakabalin, pagtaengan ti kinapudno, ken dalan ti panagkaykaysa.
No adda dagiti opisyal nga nalinteg ken pudno iti serbisyo da, apay nga agbutengda iti post dagiti umili? No nalinteg ti aramid, saan nga agtalaw iti kritisismo.
Ti panagmina ket saan laeng a proyekto. Dayta ket isu ti mabalin a mangdadael iti karayan tayo, daga tayo, ken salun-at dagiti annak tayo inton sumaruno a tawen. Ti kuarta nga maala dagiti sumagmamano ket mabalin a temporaryo laeng, ngem ti pannakadadael ti kinatao ken kinapintas ti lugar tayo ket mabalin nga agnanayon.
Kaya kadakayo kakailian, agtalinaed tayo a natalged ngem natibker. Agkaykaysa tayo. Saan tayo nga agbuteng iti pannakaam-ames wenno pannakakaso no ti panagsasao tayo ket naibatay iti kinapudno ken panangsalaknib iti komunidad.
Laglagipen tayo:
Ti daga ket saan a tawid dagiti Pro-mining...tawid dayta dagiti annak tayo.
Ken ti timek dagiti umili ket saan a mabalin a maulimek babaen iti panangbuteng wenno panangikaso.
Agtitinulong tayo para iti nalinteg, nalinis, ken natalged a masakbayan ti Brgy. Pao ken amin a tattao iti Kasibu.
Viva ti umili! Viva ti agsupsuporta iti daga ken karbengan!
