15/05/2020
141 KA BARANGAY SA SARANGANI PROVINCE GIPANG-APURAN OG TAG-DYES MIL KA PESOS (P10K), DOSE (12) KILOS NGA TUNA FLAKES, MGA SINAKONG BUGAS UG FACE MASKS ALANG SA MGA BARANGAY FRONTLINER
Gikalipay ug gipasalamatan sa mga barangay kapitan sa 141 kabuok barangay sa probinsya sa Sarangani ang gipang-apud apod nga ayuda sa Provincial Government sa Sarangani alang sa ilang mga barangay frontliner.
Kagahapong adlawa, natapos sa pagtuyok sila Governor Steve Chiongbian Solon sa tanang lungsod sa Sarangani Province kauban ang pito (7) ka mayor alang sa maong barangay frontliner aid distribution kung diin ang matag barangay ang nakadawat og tag-Dyes Mil ka pesos (P10K), dose (12) kilos nga tuna flakes, duha (2) ka sakong bugas, ug singkwenta (5) ka face mask, may muabutay pa nga mga vitamin supplements aron magpabiling baskog samtang anaa sa pag-monitor panahon sa curfew ug sa pagpatuman sa barangay checkpoint.
Kuyog usab sa Gobernador sa paglibot ang pwersa sa Sangguniang Panlalawigan nga padayong naka-abag sa mga lakang, sila Vice Governor Elmer De Peralta ug ang tanang board member, sa pagsuporta nila Senador Manny ug Congressman Ruel Pacquiao. Gani, gibutyag ni Governor Solon nga adunay ayudang pinansyal ang lauman sa mga municipal LGU gikan sa Kapitolyo sa Sarangani human nga nahatag na ngadto sa kada lungsod ang Tres Milyones ka pesos (P3M) maoy gitabang sa mga kabarangayan, lakip na ang Bayanihan Grant to Municipalities.
Segun nila Malapatan ABC President Umbra Pangolima, Glan ABC President Isidrito Cañete, Kiamba ABC President Edilberto Rocapor ug Alabel ABC President Rose Mae Salway-Orlino, dakong tabang ang gihatag sa Kapitolyo kanila human nga mag-duha (2) ka bulan na silang naghatag og konsumo sa ilang mga barangay tanod, BHW ug volunteers masiguro lang nga dili masudlan sa misteryoso nga Coronavirus ang ilang mga lugar.
Mapasalamaton pud sila Malungon Mayor Tessa Constantino, Glan Mayor Vivien Yap, Kiamba Mayor Bogi Martinez ug Maasim Mayor Zyrex Pacquiao sa pag-alalay kanila nila Governor Solon. Magpabilin matud pa nga hugot nilang bantayan ang border area sa Malungon ug Glan gumikan nagpadayon pa nga nanakod ning panahuna ang Coronavirus didto sa Davao Region.
Ang dose (12) kilos nga tuna flakes panud-an sa kada barangay ang donasyon gikan sa Alliance Select Foods International, usa ka homegrown international seafood company, kung diin ni-donar kini og usa ka panel truck nga tuna products tungod tinguha sa management nga makatabang sa mga frontline worker sa Sarangani.
Malipayon usab ang mga kabarangayan tungod sinakong bugas ang gipanghatag sa mga panimalay. Sa gi-promisa ni Alabel Mayor Nonoy Salarda sa pakig-meeting niini kang Governor Solon, nakadawat na niagi pang semana ang matag pamilya sa Alabel og tag-usa (1) ka sakong bugas kadtong dili mga benipisyaro sa 4Ps ug SAP sa DSWD. Susama usab ang gibuhat ni Maitum Mayor Bryan Reganit nga nagsugod sa iyang pagpanghatag kagahapong adlawa, gipakapinan pa kini og mga grocery. Mao pud ang nahitabo sa Malapatan sa pamunuan ni Mayor Jun Sumbo, ilang gipakapinan og tray sa mga itlog ang gipanghatag nila nga sinakong bugas.
Gikalipay na lamang ni Governor Solon ang iyang pagtigum sa mga kapitan tungod subli niining napadayag ang dakong papel sa mga barangay official katambayayong ang mga purok chairman aron magpabiling COVID-free ang Sarangani Province.
