21/03/2024
GOOD GRASS FARM, KAPARTNER KAN DA, TESDA ASIN 2D ALBAY PARA SA PAGTATAO NIN EDUKASYON SA TAMANG PAG-AAGRIKULTURA.
May total na 167 na indibidwal an nagtapos kaso hapon sa GOOD GRAS FARM, sa irarum kan programang RICE COMPETITIVENESS ENHANCEMENT FUND kan Department of Agriculture , katabang an TESDA asin 2D Albay.
An GOOD GRASS nasa irarum kan pamamahala kan V. ALA PALAY SEEDS GROWER AND DISTRIBUTOR na makukua sa laog kan HAPPY HOMES SUBDIVISION,PAWA, LEGAZPI.
Segun kay Ms. LINDY MACARAIG ALA, an registrar asin namamahala kan nasabing institusyon, igwa nin tolong klasipikasyon an mga kurso na saindang pig oopresir. Ini an RCEF- FFS na bukas para sa mga parauma nin paroy, Organic Agriculture Production NC2 asin COC leading to NC2.
Igwa nin tolong grupo na nagradwar sa RCEF -FFS na gikan sa Sto. Domingo,Albay asin sa mga barangay kan San Francisco, Banquerohan asin Bariis, katabang an PHILRICE asin City Agriculture Office.
An mga minasunod na kurso arog kan;
- Raise organic hogs
- Raise organic small ruminants
- Produce organic fertilizer
- Produce organic concoctions and extracts
an pinagpunduhan sa TESDA ni 2D Albay Cong. Joey Sarte Salceda.
Segun pa kay Ms. Lindy Macaraig Ala,padagos an saindang gigibuhon na expansion ta ngani na masirbihan an mga estudyante na mawot mag-adal sa saindang mga pa-trainings.
Nangapudan man sya sa gabos lalo sa mga kabataan na padagos na suportahan an agrikultura,dahil ini subuot an mayor na pinaggigikanan kan pagkabuhay kan mga tawo.
Naging bisita sa isinagibong pagradwar kan mga estudyante sa GOOD GRASS sinda Committee on Agriculture Chairman Coun. Ismael Buban IV, Coun. Ato Valladolid, PD Mariglo Sese kan TESDA Albay, Edmond Daen kan 2D Albay, Michael Satuito kan PHILRICE, asin mga personahes gikan sa City Agriculture.
Nasa ika- 4 na beses na nakapag-pagradwar nin grupo kan Organic Agriculture Production an GOOD GRASS asin ika-5 batch na man para sa RCEF-FFS.
//Alan Lopez Asaytuno - Oragon Birada Bicolandia
