21/09/2026
๐๐๐๐๐๐๐๐๐ | ๐๐ข๐ง๐ ๐ข-๐๐ข๐ง๐ ๐ข๐ก๐๐ง๐ ๐๐๐ง๐ฎ๐ง๐ฎ๐ฉ๐ข๐ฅ
Walang saysay ang pangakong pakinggan ang hinaing ng bayan kung sa mismong lansangan kung saan ito isinisigaw ay nangingibabaw ang takot sa pakana ng pamahalaan na magbingi-bingihan bilang taktika ng panunupil sa katarungan.
Matapos ang karahasang namayani sa ilang bahagi ng mga kilos-protesta noong nakaraang taon, naghanda ang National Capital Region Police Office (NCRPO) ng mahigit 15,000 pulis para sa mga nakatakdang protesta sa Metro Manila ngayong Setyembre 21, kasabay ng ika-54 na anibersaryo ng deklarasyon ng Batas Militar. Bagamaโt tungo sa kaligtasan ang hangarin ng naturang ahensya, hindi maikakaila na tila isang taktika lamang ito upang mapatahimik at masupil ang pagtutol ng sambayanan sa patuloy na nangyayaring katiwalian sa pamahalaan.
Kaakibat ng paggunita ng Batas Militar ang muling pagladlad ng kilos-protesta at panawagan ng Bagong Alyansang Makabayan (BAYAN) hinggil sa Luzon Economic Corridor (LEC), Pax Silica, at kontrobersiya sa flood control projects. Sa harap ng paniniil ng administrasyong Marcos sa mga kilos-protesta, malakas ang giit ng grupo na hindi dapat maputol ang tinig ng sambayanan.
Limampuโt apat na taon na ang lumipas mula nang ideklara ang Batas Militar, ngunit tila hindi pa rin tapos ang pakikibaka para sa karapatang magsalita. Sa bawat paggunita, muling bumabalik ang tanong kung tunay bang natuto ang pamahalaan sa kasaysayan kung sa kasalukuyan ay kailangang ipaglaban sa lansangan ang karapatang magpahayag at pakinggan.
Subalit, sa kabila ng pagsisikap ng taumbayang bumoboses upang ma-ipaglaban ang hustisyang matagal nang ipinagkakait, nananatiling bingi at kibit-balikat ang mga nasa kapangyarihan sa sigaw ng sambayanan. Isang malinaw na pahiwatig ito kung gaano kaduwag ang pamahalaan sa pagharap sa pananagutan ngunit napakalakas ng loob na gamitin ang kapangyarihan upang patahimikin ang mga tinig na humihingi ng katarungan.
Mabilis namang dumepensa si Undersecretary Claire Castro ng Presidential Communications Office (PCO) na pinakikinggan daw ni Pangulong Ferdinand Marcos Jr. ang hinaing ng publiko. Aniya, puro masama at negatibo lamang daw ang nakikita ng mga tao kaya hindi na sila nakukuntento.
Subalit, hindi ba sumasagi sa kanilang isip na ang sarili nilang mga kapalpakan at kawalan ng aksyon ang nag-uudyok sa taumbayan upang mag-isip nang ganito? Sa halip na ituon ang sisi sa publiko, suriin muna ng pamahalaan kung naaayon ba ang kanilang mga ikinikilos.
Walang mangyayari kung panay hinaing lamang ang mananatiling maugong at walang pagbabagong tumutugon. Ang pagtatalaga ng libu-libong kapulisan sa lansangan ay isang panapal na lunas sa malalim na sugat ng lipunan. Hindi kayang harangan ng hanay ng mga pulis ang lumalalang galit ng publiko sa mga pambansang usapin, mula sa korapsyon hanggang sa pananamantala sa kaban ng bayan.
Hindi sapat ang paulit-ulit na salita bilang panakip-butas habang nananatiling salat sa konkretong aksyon. Tungkulin ng gobyerno na tuldukan ang mga kasunduang naghahasik ng kapahamakan, siyasitin ang mga anomalya sa pondong pambansa, at itaguyod ang katapatan sa pamumuno.
Kung tunay na bukas ang tainga ng pamahalaan sa hinaing ng bayan, huwag nitong ipinipinid ang espasyo ng malayang pagpapahayag sapagkat ang pananaig ng bingi-bingihang taktika ng panunupil ay lalo lamang magtutulak sa mamamayan na ipaghiyawan ang sigaw para sa katarungan at tunay na pagbabago.
๐๐ช๐ฃ๐ถ๐ฉ๐ฐ ๐ฏ๐ช ๐๐ฐ๐ณ๐ฆ๐ฏ ๐๐ข๐ด๐ข๐บ๐ข๐ฐ, ๐๐ถ๐ฏ๐ฐ๐ฏ๐จ ๐๐ข๐ณ๐ต๐ถ๐ฏ๐ช๐ด๐ต๐ข
