Kuya Motoph's Tv

10/07/2026

10/07/2026

TOP 2 PROVINCIAL MOST WANTED SA PAMPANGA, ARESTADO SA 4 NA KASO NG R**E

City of San Fernando, Pampanga —Swak sa rehas ang isang 22-taong-gulang na solar installer na itinuturing na Rank No. 2 Top Most Wanted Person sa buong lalawigan ng Pampanga matapos isagawa ang isang lehitimong operasyon ng Apalit Municipal Police Station, Pampanga Police Provincial Office, nitong Miyerkules ng umaga, Hulyo 1, 2026 sa Sitio Control, Brgy. Colgante, Apalit, Pampanga.

Bandang alas-10:10 ng umaga, bitbit ng mga kapulisan ang Warrant of Arrest upang isilbi sa suspek na may apat na mabibigat na kaso: 2 Counts ng Statutory R**e – Walang inirekomendang piyansa (No Bail). At 2 Counts ng R**e by Sexual Assault – May inirekomendang piyansa na nagkakahalaga ng ₱200,000 bawat kaso.

"Ang pagkakaaresto sa naturingang No. 2 Provincial Most Wanted Person ay malinaw na mensahe na walang puwang sa ating lipunan ang mga nanamantala sa mga menor de edad at kababaihan. Hindi titigil ang kapulisan hangga't hindi nabibigyan ng hustisya ang mga biktima," pahayag ng pamunuan ng Apalit MPS.

Kasalukuyang nakapiit ang akusado sa selda ng Apalit MPS habang inihahanda ang mga kaukulang dokumento para sa pagbabalik ng warrant sa korte.

10/07/2026

10/07/2026

WEEKLY OPERATIONAL ACCOMPLISHMENT REPORT
Covered Period June 20-26, 2026

10/07/2026

4 DRUG PERSONALITIES, TIMBOG SA MAGKAKAHIWALAY NA BUY-BUST OPERATIONS SA PAMPANGA

Pampanga – Apat na hinihinalang sangkot sa ilegal na droga ang naaresto sa magkakahiwalay na buy-bust operations na isinagawa ng iba't ibang police units ng Pampanga Police Provincial Office noong gabi ng Hunyo 29 hanggang madaling-araw ng Hunyo 30, 2026.

Sa Mexico, nadakip ng Station Drug Enforcement Unit (SDEU) ng Mexico Municipal Police Station ang isang 25-anyos na street-level individual (SLI). Nakumpiska mula sa kanya ang humigit-kumulang 3.21 gramo ng hinihinalang shabu na may Standard Drug Price na ₱21,828.00, kabilang ang marked money na ginamit sa operasyon.

Sa City of San Fernando, isang 42-anyos na street-level individual ang naaresto ng pinagsanib na operatiba ng Intelligence Unit at SDEU ng City of San Fernando Police Station. Nasamsam sa operasyon ang humigit-kumulang limang (5) gramo ng hinihinalang shabu na may tinatayang Standard Drug Price na ₱34,000.00.

Samantala, sa Sto. Tomas, isang 38-anyos na suspek ang nadakip ng SDEU ng Sto. Tomas Municipal Police Station. Narekober sa kanyang pag-iingat ang humigit-kumulang dalawang (2) gramo ng hinihinalang shabu na may Standard Drug Price na ₱13,600.00.

Sa San Simon naman, isang 19-anyos na lalaki ang naaresto matapos bentahan ng hinihinalang pinatuyong dahon ng ma*****na ang isang police poseur-buyer. Nakumpiska sa operasyon ang humigit-kumulang walong gramo ng hinihinalang ma*****na na may Standard Drug Price na ₱960.00.

Ang lahat ng naarestong suspek ay nahaharap sa kaukulang mga kasong paglabag sa Republic Act No. 9165 o ang Comprehensive Dangerous Drugs Act of 2002. Kasalukuyan nang nasa kustodiya ng kani-kanilang himpilan ng pulisya ang mga suspek habang isinasagawa ang kaukulang dokumentasyon at paghahanda ng mga kasong isasampa sa korte.

Ang magkakasunod na matagumpay na anti-illegal drug operations na ito ay nagpapakita ng matatag na dedikasyon ng Pampanga Police Provincial Office sa pagpuksa sa ilegal na droga sa ating mga komunidad. Patuloy nating paiigtingin ang ating mga operasyon laban sa mga nagtutulak at nagbebenta ng ipinagbabawal na gamot. Hinihikayat din natin ang publiko na patuloy na makipagtulungan sa pamamagitan ng pagbibigay ng impormasyon upang sama-sama nating mapanatili ang isang ligtas, mapayapa, at drug-free na lalawigan ng Pampanga, ani PCOL RICARDO M DAVID.

10/07/2026

SUSPEK SA ROBBERY AT DALAWANG CARNAPPING, TIMBOG SA AGARANG HOT PURSUIT OPERATION SA PAMPANGA

CITY OF SAN FERNANDO, Pampanga – Isang suspek ang naaresto ng mga operatiba ng City of San Fernando Police Station sa pakikipagtulungan ng Lubao Municipal Police Station matapos masangkot sa robbery at dalawang magkahiwalay na insidente ng qualified carnapping sa Barangay Santo Niño, City of San Fernando.

Ayon sa imbestigasyon, nahuling nagnanakaw ng cellular phone ang suspek sa loob ng isang apartment. Nang tangkaing pigilan ng mga residente, nagbunot ito ng patalim at tumakas. Sa kanyang pagtakas, sapilitan niyang inagaw ang dalawang motorsiklo mula sa magkaibang biktima gamit ang pananakot.

Dahil sa mabilis na koordinasyon at isinagawang hot pursuit operation, natunton at naaresto ang suspek sa Lubao, Pampanga. Nabawi rin ng mga awtoridad ang ninakaw na cellular phone at dalawang motorsiklo.

Mahaharap ang suspek sa kasong Robbery (Break-in) at dalawang bilang ng Qualified Carnapping sa ilalim ng Republic Act No. 10883.
Pinuri ng Pampanga Police Provincial Office ang maagap na pagtugon ng mga operatiba na nagresulta sa mabilis na pagkakaaresto ng suspek at pagbawi ng mga ninakaw na ari-arian, bilang patunay ng patuloy na dedikasyon ng kapulisan sa pagpapanatili ng kapayapaan at seguridad sa lalawigan.

Patuloy na hinihikayat ng Pampanga Police Provincial Office ang publiko na maging mapagmatyag at makipagtulungan sa kapulisan sa pamamagitan ng agarang pag-uulat ng anumang kahina-hinalang gawain upang sama-sama nating mapanatiling ligtas at mapayapa ang ating mga komunidad, ani PCOL RICARDO M DAVID.

09/07/2026

DALAWANG DAYUHANG IRANIAN, TIMBOG SA ARAYAT MATAPOS UMANONG MAMBUDOL AT MAGNAKAW SA MGA VENDOR

City of San Fernando, Pampanga – Dalawang dayuhang lalaki ang naaresto ng mga operatiba ng Arayat Municipal Police Station matapos silang ireklamo ng ilang tindera dahil sa umano'y panlilinlang at pagnanakaw sa loob ng Arayat Public Market noong Hunyo 25, 2026.

Ayon sa imbestigasyon, rumesponde ang mga pulis matapos makatanggap ng tawag mula sa market administrator hinggil sa kaguluhang naganap sa loob ng palengke. Sa pagdating ng mga awtoridad, napag-alamang isang vendor ang umano'y nabiktima ng modus ng mga suspek.

Batay sa salaysay ng biktima, nagpanggap na mamimili ang isa sa mga suspek at nagbayad gamit ang ₱1,000.00. Matapos mailagay ng vendor ang pera sa kanyang bag, hiniling umano ng suspek na ibalik ang ibinayad. Habang kinukuha ng biktima ang pera, sinamantala umano ng suspek ang pagkakataon upang makuha hindi lamang ang kanyang ibinayad kundi pati ang humigit-kumulang ₱3,000.00 na benta ng tindera. Nahuli umano ang suspek habang hawak pa ang perang pag-aari ng biktima, dahilan upang agad na humingi ng tulong ang mga saksi sa market administrator.

Sa isinagawang imbestigasyon, lumutang pa ang dalawa pang vendor na nagsabing nabiktima rin sila ng kaparehong modus. Isa sa kanila ang nawalan ng pera matapos umanong makuha ng suspek ang kanyang ibinayad kasabay ng naunang naibigay na sukli, habang ang isa naman ay nawalan ng humigit-kumulang ₱7,000.00 na kita mula sa kanyang tindahan.

Nahaharap ang dalawang dayuhang suspek sa kasong Estafa sa ilalim ng Article 315 at Theft sa ilalim ng Article 308 ng Revised Penal Code.

MAGING MAPAGMATYAG! Pinapaalalahanan ang lahat sa mga market vendors na maging alerto laban sa mga modus ng panlilinlang at pagnanakaw. Bantayang mabuti ang inyong pera at mga personal na gamit, at huwag mag-atubiling humingi ng tulong sa mga pulis kung may kahina-hinalang insidente. Ligtas na komunidad ay nagsisimula sa isang mapagmatyag na mamamayan, ani PCOL RICARDO M DAVID, Provincial Director, Pampanga Police Provincial Office.

26/06/2026

WEEKLY OPERATIONAL ACCOMPLISHMENT REPORT
Covered Period June 13-19, 2026

26/06/2026

JUNE 22, 2026
LIGTAS BALIK-ESKWELA 2026
OPERATIONAL SECURITY MEASAURES OF PAMPANGA PPO

26/06/2026

2 TIMBOG, ₱4.5-M HALAGANG FROZEN MEAT PRODUCTS NASAMSAM SA BACOLOR

LUNGSOD NG SAN FERNANDO, Pampanga – Dalawang indibidwal ang naaresto habang tinatayang 40 toneladang iba't ibang frozen meat products na nagkakahalaga ng humigit-kumulang ₱4.5 milyon ang nasamsam sa isinagawang joint inspection at enforcement operation sa isang meat processing facility sa Brgy. Calibutbut, Bacolor, Pampanga.

Pinangunahan ng RSOG-RID3, katuwang ang FDA Regional Field Office 3, NMIS Region 3, BPLO, Municipal Sanitary Office, Municipal Agriculture Office ng Bacolor, at Bacolor Municipal Police Station, ang operasyon matapos matukoy na umano’y nagpapatakbo ang establisyimento nang walang kinakailangang License to Operate mula sa Food and Drug Administration (FDA).

Sa isinagawang inspeksyon, nakumpiska ang iba't ibang frozen na karne ng baka, baboy, at manok, kung saan ang ilan ay natuklasang expired at maaaring magdulot ng panganib sa kalusugan ng publiko.

Nahaharap ang mga naarestong suspek sa kasong paglabag sa Food Safety Act of 2013 at Meat Inspection Code of the Philippines. Samantala, isinailalim sa kustodiya ng RSOG-RID3 ang mga nakumpiskang ebidensya para sa kaukulang dokumentasyon at disposisyon, habang pansamantalang ipinasara ang pasilidad para sa karagdagang imbestigasyon at kaukulang aksyon ng mga kinauukulang ahensya.

‘Pinaaalalahanan ng Pampanga PPO ang lahat ng food manufacturers, processors, at distributors na mahigpit na sumunod sa mga itinakdang batas at regulasyon sa kaligtasan ng pagkain. Ang pagtiyak sa kalidad at kaligtasan ng mga produktong pagkain ay mahalaga upang mapangalagaan ang kalusugan at kapakanan ng mamamayan.’ Ani PCOL DAVID

Ang matagumpay na operasyong ito ay patunay ng patuloy na pagtutulungan ng mga law enforcement at regulatory agencies sa pangangalaga ng kalusugan ng mamamayan, pagpapatupad ng food safety standards, at mahigpit na pagsugpo sa mga paglabag sa umiiral na batas.