28/08/2026
TINGNAN: Nagsagawa ng isang Solidarity Night ang mga mamamahayag mula sa iba’t ibang publikasyon mula sa Timog Katagalugan, mga mag-aaral, at mga progresibong samahan ng UPLB bilang paggunita sa nalalapit na National Press Freedom Day, ngayong gabi ng Biyernes, Agosto 28 sa harap ng Nora C. Quebral Hall.
Naging lunsaran ng diskusyon ang aktibidad hinggil sa makatotohanang lagay ng pamamahayag sa panglokal at pambansang antas sa kasagsagan ng patuloy na paglala umano ng impunidad at pasismo laban sa mga kinatawan ng midya.
Nagbigay din ng kanya-kanyang pahayag ang mga kinatawan ng mga pangkolehiyong organisasyon ng College of Development Communication(CDC), kabilang ang CDC Freshman Council, UP Alliance of Development Communication Students, UPLB Development Communicators’ Society, UP Community Broadcasters’ Society, Gabriela Youth - CDC, at Tanglaw.
Kabilang din sa nagbahagi ng kanilang mga sentimyento ang mga alternatibo at iba pang pahayagan sa pamantasan kagaya ng Altermidya, The Staple, UPLB Perspective, at Southern Tagalog Exposure.
Mas lalo ring pinalalim ang pagtingin at pagninilay ng mga kalahok sa programa sa pamamagitan ng isang kultural na pagtatangal ng Umalohokan Inc. ng kantang “Pagtapak sa Ulan,” at ang pagbikas ng Panday Sining - CEM sa tulang pinamagatang “Ang mga walang pangalan” ni Jose Lacaba.
Lalagumin naman ang programa sa pamamagitan ng isang candle lighting ceremony upang alalahanin at bigyang-pugay ang mga martir ng sambayanan kabilang ang community journalist na si RJ Ledesma, gayundin ang iba pang biktima ng umano’y pasistang estado.
📝: Reign Aoalin
📸: Reign Aoalin at Leonard Magadia
