15/09/2025
O, PAG-IBIG NA MAKAPANGYARIHAN SA UP LOS BAÑOS NGAYONG SETYEMBRE
“Isang postmodern na pagtatanghal ng pag-ibig at kabayanihan . . . (na) umuugnay sa kasalukuyang manonood na Pilipino (tungkol sa isang rebolusyong sumisibol sa pag-ibig)….” Ito ang husga ni Romano Cortes Jorge nang kanyang mapanood ang O, Pag-ibig na Makapangyarihan. Wika pa niya, “Ang produksyong ito ay nararapat na i-tour sa buong bansa.”
Magtu-tour na ang nasabing dula ng Tag-ani Performing Arts Society matapos ang matagumpay na pagtatanghal nila sa IBG-KAL Theater sa University of the Philippines sa Diliman nitong Pebrero at Marso. At ang unang destinasyon ay ang D.L. Umali Auditorium sa UP Los Baños sa: September 12 – 7 PM; September 13 – 2. 30 PM at 7 PM; September 14 – 2.30 PM at 7 PM.
Sa produksyong ito na nagmamarka sa ika-150 kaarawan ni Gregoria “Oryang” de Jesus (9 May 1875 – 15 March 15 1943), sinasariwa ng Tag-ani Performing Arts Society ang maalimpuyong pag-iibigan nina Oryang at Andres Bonifacio. Isinasadula nito ang isang kubling pangyayari sa kanilang love story. Ang resulta ay isang modernong dula sa kapaligiran ng namumuong rebolusyong antikolonyal ng ating mga ninuno tungo sa pagluluwal ng ating bansa.
Gaya ng alam natin, si Oryang ang nagpanimula at naging bise-presidente ng women’s chapter ng Katipunan. Lakambini ang mapagmahal na taguri sa kanya sa lihim na organisasyong rebolusyonaryo na ipinundar ni Andres Bonifacio, na naging kabiyak niya.
Sinopsis at katuturan ng O, Pag-ibig na Makapangyarihan
Taong 1893, wala pang isang taon ang Katipunan, ang lihim na organisasyong rebelde na sinimulan ng anim na aktibistang pangahas, sa pamumuno ni Andres Bonifacio. Bagaman abala siya dito, nagawa pa rin niyang manligaw sa dalagitang si Oryang.
Dahil nga agwat sa edad – siya’y 29 na taong gulang at si Oryang ay 18 – at sa duda ng mga magulang sa katauhan niya, ang dalagita ay matinding pinagbawalan ng kanyang mga magulang. Anuba’t sinuway ni Oryang ang mga magulang, isang bagay na hindi ginagawa noong panahong iyon. Nang maalaman ng mga magulang, si Oryang ay sapilitan nilang dinala sa isang bahay at doon ay idinitine. Walang kaalam-alam si Andres sa sinapit ng kasintahan.
Subalit gaya ng winika ni Balagtas may 57 taon na ang nakakaraan, , “O, Pag-ibig na makapangyarihan, kapag ikaw ang nasok sa puso nino man…” And the rest, wika nga, is history, at ang history ay ang ating romantikong dula sa konteksto ng namumuong Rebolusyong 1896.
Kung paanong pinalaya ni Oryang ang sarili na humantong sa kanilang muling pagkikita at pagpapaksal nila ni Andres ang dramatic arc ng O, Pag-ibig na Makapangyarihan. Subalit ito’y hindi basta love story ng sinaunang panahon; ito’y tungkol rin sa walang maliw na pag-ibig sa bayant, ng pagsalunga sa alon ng konserbatismo at bulag na pagsunod sa kinagawian, ibig sabihin, ito’y tungkol sa birtud ng kriikal na pag-iisip.
Tila Ang O, Pag-ibig na Makapangyarihan ay mabigat at mapanglaw. Hindi po. Sa totoo lang, ang dulang ito ng Tag-ani ay magaan at pilyang pagsasabuhay ng romansa noong panahong kolonyal na anuba’t nasangkot sa himagsikan at may kaugnayan sa ating panahon.
Huwag palagpasin ang pambihirang dulang ito. Mabibili ang tiket online at sa mismong tanghalan.
The Staple is an official Media Partner of the event.
