14/07/2026
BARANGAY CHAIRMAN, HAHARAP SA PATONG-PATONG NA KASO MATAPOS UMANONG SAPILITANG I-TAKEOVER ANG PINAGTATALUNANG RESTO-RESORT SA LUMBAN, LAGUNA
Nakahanda nang sampahan ng patong-patong na kasong kriminal ang iang Barangay Chairman sa Lumban, Laguna at ilan niyang mga kasamahan matapos umano'y sapilitang i-takeover ang isang restaurant at resort na pagmamay-ari ng isang realty and developer corporation, dakong gabi nitong Sabado, July 11.
Ayon sa ulat, pinangunahan umano ng kapitan ang mahigit 100 katao sa pagpasok sa naturang property kung saan winasak ang bakod at security guard post, dahilan upang masugatan ang tatlong security guard at maagaw ang dalawang service firearm na dinala umano sa barangay hall.
Agad na nagsagawa ng operasyon ang Lumban Municipal Police Station sa tulong ng SWAT team dakong alas-6:00 ng gabi nitong Linggo, July 12, at muling nabawi ang kontrol sa lugar habang naaresto ang siyam na kalalakihan at tatlong kababaihan na ngayon ay nakadetine sa Lumban Lock-up Facility.
Ayon sa isa sa mga naaresto na nagpakilalang team leader na kilala sa alyas na "Wahib," pinangakuan umano sila ng kapitan ng lupa sa loob ng property at naniwala silang legal ang pagmamay-ari nito, kaya sumama sila sa operasyon.
Natuklasan din ng mga awtoridad na nawawala ang ilang mahahalagang kagamitan kabilang ang mga two-way radio, construction tools, at humigit-kumulang ₱83,000 na nakalaan para sa sahod ng mga security guard, habang inihayag naman ng chief security guard na inambaan pa umano ng itak at kalaunan ay tinutukan ng isang baby armalite ang mga guwardiya bago tumakas ang kapitan kasama ang ilan niyang mga tauhan.
Matatandaang nagkaroon ng matagal nang alitan sa pagmamay-ari ng naturang resto-resort, kung saan pumanig ang korte sa realty corporation at naipatupad ang pagpapaalis sa kapitan sa property, habang nananatili namang nakabinbin ang kanyang apela at patuloy pa ring pinaghahanap ng pulisya ang barangay chairman.
Video : Jun Amor
