20/01/2024
ENERO 21, 2024-DOMINGO
Ikatulo nga Domingo sa Ordinaryong Panahon
(KAPISTAHAN SA SR. STO. NIÑO - Proper Feast in the Philippines)
Holy Childhood Day (Sancta Infantia)
Week of Prayer for Christian Unity.
(White)
TEMA: SENYOR SANTO NIÑO, ANG BATANG JESUS.
Nganong daghan man kanato ang nahigugma sa Santo Nino? Unsa may nagdasig kanato sa paghimo’g debosyon sa Dios nga Bata?
Matag karon ug unya, makadungog kita’g “milagro” nga gihimo sa Santo Nino para sa mga tawo. Adunay mag-ingon nga naayo sila sa ilang sakit tungod sa panabang sa Dios nga bata. Gipatong kuno nila ang imahen sa Santo Nino diha sa parte sa ilang lawas nga nagdaot ug naayo sila. Aduna usay mag-ingon nga ang Santo Nino maoy ilang tigpanalipod panahon sa katalagman ug aksidente. Gipaatubang kuno nila ang Santo Nino sa sunog ug kini maoy nakapalong sa kalayo. Panahon sa dakong huwaw, adunay nagligo sa imahen sa Santo Nino ug dayon misugod kuno ang pag-ulan.
Usa sa dakong grasya nga nadawat sa mga Pilipino mao ang gasa sa Cristohanong pagtoo. Apan, importante kaayo nga makita nato ang dakong kalainan sa tinuod nga pagtoo (genuine faith) ug sa patoo-too (superstitious belief). Angay natong sabton nga ang Dios nagpakahimong bata dili aron nga mosunod siya sa atong kagustohan kondili aron nga kita makasunod sa iyang panig-ingnan. He became one like us so that we would become one like Him.
Diha sa unang pagbasa, si propeta Isaias nanagna nga adunay matawo nga bata para kanato nga magdala’g kahayag, kalinaw ug tinuod nga kalipay. Kining maong panagna nahataga’g katumanan diha ni Cristo. Siya ang gipadala gikan sa langit aron magdala’g kaluwasan sa mga tawo. Ang mosunod sa iyang lamdag o maayong panig-ingnan makabaton sa tinuod nga kalinaw ug kalipay.
Sa ikaduhang pagbasa, si San Pablo nagtudlo kanato nga kita nahimong mga sinagop nga anak sa Dios tungod kang Cristo. Unya, diha sa ebanghelyo, gipakita ni Jesus kanato unsa ang angay nga buhaton sa mga anak sa Dios. Sama kaniya, kita angay nga magpuyo uban sa Dios diha sa iyang panimalay o katilingban ug magtrabaho para Kaniya. Atong sundon ug tumanon ang iyang kabubut-on labaw sa tanan, bisan gani labaw sa atong pamilya.
Si Jesus miingon: “Kon dili kamo mausab ug mahisama sa usa ka gamay’ng bata, dili kamo makasulod sa Gingharian sa Langit”. Unsa may iyang gipasabot niini? Adunay daghang kinaiya ang usa ka bata, apan si Cristo buot nga mahimo kitang mapaubsanon sama sa usa ka bata. “Ang tawo nga magpaubos sama niining bata maoy ilhon nga labing dako sa Gingharian sa Langit.” Gisangyaw kini ni Jesus dili lamang sa pulong kondili sa buhat. Siya mismo ang unang nagpaubos sa iyang kaugalingon.
Usa sa pinakadakong babag sa atong pagsulod sa langit mao ang garbo o pagkamapahitas-on. Ang tawo nga garboso malimot nga ang tanang butang nagagikan sa Ginoo. Magtoo siya nga makab-ot niya ang kalampusan tungod sa iyang kaugalingong paningkamot. Tungod niini, dili siya makamaong magpatabang o magpasalamat kang bisan kinsa, bisan gani sa Dios.
Ang tawo nga mapahitas-on dili makamaong mangayo’g pasaylo. Dali ra niya makita ang mga sayop sa ubang tawo, apan dili ang iyaha. Bisan pa’g makita na niya ang iyang sayop, dili gihapon siya mangayo’g pasaylo tungod kay para kaniya kini magpakita sa kahuyang sa tawo.
Ang tawo nga garboso dili makamao’ng malooy. Tungod sa iyang pagkamapahitas-on, dili niya mabati ang kahimtang ug pag-antos sa ubang mga tawo. Dali ra siya maghukom, apan dugay nga magpasaylo tungod kay malimtan niya nga siya mismo adunay panginahanglan sa kalooy sa Ginoo.
Niining kapistahan sa Dios nga Bata, kita gipahinumduman ni Cristo sa pagpabilin nga masaligon sa panabang sa Dios Amahan, mapaubsanon, masinabtanon ug mapasayloon sa isigkaingon.
Viva Senor Santo Nino!
Bishop Abet Uy
PASIUNA
Atong gisaulog karon ang kapistahan sa Sto. Niño nga duol sa matag kinabuhi sa Katolikong Pilipino. Kining maong kapistahan nagsugod sa bag-o pa nahimong Kristiyano ang atong nasud og padayon natong ginasaulog hangtod karon. Sa nag-inusarang paagi, atong ginahatagan ug bili ang atong kabataan, ang ilang mga kalisdanan ug mga paglaum.
Karong adlawa, ilabina niining santos nga Eukaristiya, mao ang maanindot nga higayon aron atong isalig ang atong mga kabataan sa proteksyon og giya ni Sto. Niño. Kaniya nga nahimong dakong kabahin sa atong kasaysayan ug kinabuhi, mag-amping ug magpangga sa atong mga kabataan ug magtudlo kanato diha sa maayong paggiya niini.
Unang Pagbasa (Is. 9: 1-6)
Atong madungog sa atong pagbasa karon ang isa ka propesiya mahitungod kang Jesus, ang Mesiyas nga naghatod ug kahayag ug gugma gikan sa Dios sa kalibutan nga nangitngitan sa kasal-anan
ANG PAGBASA GIKAN SA BASAHON NI PROPETA ISAIAS (Is. 9:1-6)
Dili na batio’g kasubo ang kaniadto nag-antus. Sa miaging panahon gipakaulawan niya ang Zabulon ug ang Neftali, apan sa umaabot nga mga adlaw himoon niyang nindot ang agianan latas sa dagat, ang yuta unahan sa Jordan, ang Galilea nga gipuy-an sa mga langyaw.
Ang katawhan nga kaniadto naglakaw sa kangitngit nakakita’g dakung kahayag; ang nagpuyo sa mangiob nga dapit gisidlakan na sa kahayag. Gipadaghan mo ang molupyo sa nasud, GINOO, nagmaya sila diha sa imong atubangan; sama sa pagmaya sa mga tawo inigkating-ani ug ingon nga maglipay ang mga tawo inigbahinbahin nila sa ilang inilog. Kay gigupok mo sama sa nahitabo sa Midian ang yugo nga iyang gisangon ug ang karga nga iyang gipas-an ug ang garoti sa nagdaugdaog kaniya.
Kay sunugon daw sugnod ang tanang sapatos sa mga sundalo nga nagpaingon sa gubat, ingon man ang tanang saput nga natumog sa dugo. Kay natawo alang kanato ang usa ka bata, gihatag kanato ang usa ka anak lalaki; ug siya ang magmando sa tanan, ug nganlan siya’g “Maalamong Magtatambag,” “Dios nga Gamhanan,” “Walay Katapusang Amahan,” “Prinsipe sa Pakigdait.”
ANG PULONG SA GINOO.
SALAMAT SA DIOS.
SALMO RESPONSORYO
(Ps. 97:1,2-3, 3-4,5-6)
T. Ang tanang katawhan sa kalibutan nakakita sa kadaugan sa atong Dios.
Awitig bag-ong awit ang GINOO, kay nagbuhat siyag katingalahang mga butang. Pinaagi sa iyang gahom ug balaang kusog, nakab-ot niya ang kadaogan.
T. Ang tanang katawhan sa kalibutan nakakita sa kadaugan sa atong Dios.
Gipahayag sa GINOO ang iyang pagdaug, gipaila niya sa kanasuran ang iyang makaluwas nga gahom. Gituman niya ang iyang mga saad sa katawhan sa Israel, uban sa walay paglubad nga gugma ug pagkamaunongon.
T. Ang tanang katawhan sa kalibutan nakakita sa kadaugan sa atong Dios.
Dayga ang GINOO dinuyogan sa mga alpa; pagtugtog ug mga honi diha sa alpa!
Bulhota ang mga trumpeta ug mga budyong ug singgit sa kalipay atubangan sa GINOO, ang atong hari!
T. Ang tanang katawhan sa kalibutan nakakita sa kadaugan sa atong Dios.
Ikaduhang Pagbasa (Eph. 1: 3-6, 15-18)
Sa usa ka pag-ampo nga puno sa pagdayeg ug pagpangaliyupo, gipadayag ni San Pablo ang pipila ka madasigon nga kamatuoran sa atong pagtuo.
ANG PAGBASA GIKAN SA SULAT NI SAN PABLO NGADTO SA TAGA-EFESO (Eph. 1:3-6, 15-18)
Magpasalamat kita sa Dios ug Amahan sa atong Ginoong JesuCristo nga nagpanalangin kanato sa tanang espirituhanong gasa sa langit diha sa atong pagkahiusa kang Cristo. Sa wala pa buhata ang kalibutan gipili na kita sa Dios aron maiya diha ni Cristo, aron mabalaan kita ug mawalay sala sa iyang atubangan. Tungod sa iyang gugma, daan nang gibut-an sa Dios nga sagupon niya kita nga mga anak pinaagi ni JesuCristo mao kini ang iyang gikahimut-an og tuyo. Daygon nato ang Dios tungod sa iyang labihang pagtagad kanato pinaagi sa iyang hinigugmang Anak!
Tungod niini, sukad sa pagkadungog ko nga mituo kamo sa Ginoong Jesus ug nahigugma sa tanang katawhan sa Dios, wala akoy hunong sa pagpasalamat sa Dios tungod kaninyo. Gihinumdoman ko kamo sa akong mga pag-ampo, ug naghangyo ako sa Dios sa atong Ginoong JesuCristo, ang Gamhanang Amahan, nga hatagan unta kamo sa Espiritu nga maghimo kaninyong maalamon ug magpadayag sa Dios kaninyo aron makaila kamo kaniya. Naghangyo usab ako nga malamdagan unta ang inyong salabutan aron masayod kamo unsa ang paglaum nga alang niini gitawag kamo. Ug hinaut usab unta nga masayod kamo sa kahupong sa mga panalangin nga gisaad niya sa iyang katawhan.
ANG PULONG SA GINOO.
SALAMAT SA DIOS.
ALELUYA (Jn. 1:14,12)
T. Aleluya.
Ang pulong nahimong tawo ug mipuyo uban kanato. Sila gihatagan Niya sa katungod nga nga mahimong mga anak sa Dios.
T. Aleluya.
ANG PAGBASA GIKAN SA EBANGHELYO SUMALA NI SAN MARCOS (Mk. 10:13-16)
May pipila ka tawo nga nagdala og mga bata ngadto kang Jesus aron sila hikapon niya, apan gikasab-an sila sa mga tinun-an. Sa pagkaalinggat ni Jesus niini, nasuko siya ug miingon sa iyang mga tinun-an, “Paaria kanako ang mga bata. Ayaw silag did-i kay ang Gingharian sa Dios ila sama niining mga bata. Timan-i ninyo kini: ang dili modawat sa paghari sa Dios sama sa usa ka bata, dili mahisakop niini.” Unya iyang gipangugos ang mga bata, gitapion ang iyang mga kamut kanila, ug gipanalanginan sila.
ANG EBANGHELYO SA GINOO.
DAYGON IKAW, O CRISTO
The Creed is said.
KATILINGBANONG PAG-AMPO
P. Mga igsuon atol niining pagsaulog nato sa kapistahan sa Sto. Niño, sa tumang pagpaubos atong ihalad sa atong maloloy-ong Amahan ang atong mga pag-ampo ug panginahanglan. Ug sa matag pangaliyupo kita motubag: GINOO, PAMATI-A KAMI.
1. Alang sa mga nagdumala sa atong Simbahan nga unta ang hiyas sa pagkamapaubsanon maoy maghari sa ilang galamhan sama sa ehemplo nga gipakita ni Cristo ang Maayong Magbalantay sa iyang panon. Mag-ampo kita sa Ginoo.
2. Alang sa mga nagdumala sa atong nasud nga ang pagkamatinud-anon ug pagkamaubsanon ni Cristo maoy ilang sumbanan diha sa ilang paghimo og balaod sa pagprotekta sa mga kabataan ug pagpatunhay sa tinuod nga kalinaw, kaangayan ug hustisya. Mag-ampo kita sa Ginoo.
3. Alang sa tanang mga ginikanan nga unta ipadayag nila ang pagkamapaubsanon diha sa ilang pagtuman sa ilang kaakuhan sa paghigugma ug pag-agak sa ilang mga anak subay sa Diosnong pagtulon-an. Mag-ampo kita sa Ginoo.
4. Alang sa mga kabataan ug mga kabatan-onan nga unta mamahimo silang mapaubsanon ug masunoron sa ilang mga ginikanan kinsa naghatag kanila sa maayong mga panig-ingnan pinasikad sa mga Kristohanong pagtulon-an. Mag-ampo kita sa Ginoo.
5. Alang kanatong mga masalaypon nga unta makaamgo kita kanunay sa atong mga kalapasan ug dili kita magpanuko sa pagdawat kanunay sa
Sakramento sa Pakig-uli diha sa makanunayon natong pagpangumpisal. Mag-ampo kita sa Ginoo.
P. Langitnong Amahan tudloi kami sa pagpaubos sa among kaugalingon aron sayon alang kanamo ang pagdawat ug pagpasidungog Kanimo sa mga grasya nga among nadawat pinaagi ni Cristo among Ginoo sa kahangturan. Amen.
