06/08/2025
400 Sako ng Bigas, Ipinamahagi sa Mga Biktima ng Bagyong Crising, Dante at Emong
Agosto 6, 2025–Jade Hall, Mabalacat City—isang makataong hakbang ang isinagawa ng Mabalacat Public Market Vendors Association at Mabalacat Public Market Vendors Multi-Purpose Cooperative sa pamamagitan ng kanilang relief operation para sa mga kababayang nasalanta ng sunod-sunod na kalamidad na dulot ng Bagyong Crising, Dante at Emong. Umabot sa 400 sako ng bigas, tig-5 kilo bawat isa, ang kanilang naipagkaloob.
Sa ginanap na programa sa Jade Hall ng Mabalacat City, personal na tinanggap ni Mayor Atty Gerald Guttrie Aquino ang donasyon at tiniyak sa publiko na ito ay mapupunta sa mga tunay na biktima ng kalamidad.
“Rest assured, ang mga sako ng bigas na ito ay ipamamahagi sa mga nangangailangan sa tulong ng City Social Welfare Department Office sa pamumuno Ms. Josephine B. Tanglao. Lubos ang pasasalamat ko sa ating mga market vendors at cooperatiba na patuloy ang malasakit sa kapwa,” pahayag ni Mayor Aquino.
Panunumpa ng Bagong Sk Chairperson ng Barangay Cacutud
Sa parehong araw at lugar, isinagawa rin ang panunumpa sa tungkulin ni Hon. Merry Joyce P. Cunanan bilang bagong Sk Chairperson ng Barangay Cacutud, kapalit ng dating Sk Chairperson Patricia Acorda na ngayon ay nahalal bilang City Councilor ng Mabalacat City.
Ang panunumpa ay pinangunahan ni Mayor Aquino at kinatawan ng DILG sa harap ng dating Sk Chairperson Acorda at miyembro ng komunidad.
Tulong, Kahit may Kakulangan sa Pondo
Bagamat humaharap sa mga limitasyon sa pondo ang pamahalaang lungsod, hindi ito naging hadlang sa patuloy na pagbibigay ng serbisyong makatao at tuloy-tuloy na suporta sa Mabalaqueño sa ilalim ng pamumuno ni Mayor Atty Gerald Guttrie Aquino. Kabilang sa mga pangunahing programang ipinagpapatuloy ng lungsod ang legal assistance, burial, financial aid, at medical assistance para sa kapus-palad nating kababayan. Sa kabila ng kakulangan sa pondo, naisakatuparan pa rin ito sa tulong ng malikhain at responsableng pamumuno ng alkalde, at sa matibay na ugnayan sa pagitan ng lokal na pamahalaan at ibat ibang sektor ng komunidad.
Suporta mula sa Urban Poor Federation
Kabilang din sa mga dumalo sa nasabing programa ang mga kinatawan ng Urban Poor Federation of Mabalacat City. Tinalakay ang mga programa ng lungsod para sa mga komunidad ng mga informal settlers, kabilang ang pabahay, hanapbuhay, at serbisyong medical.
Sa kabila ng mga hamon at kakulangan sa pondo, nanatiling aktibo ang ating pamahalaan, mga samahan ng vendors, at mga organisasyong sibiko sa pagbibigay ng tulong at pag-asa sa mamayan ng Mabalacat City.
