07/02/2026
TUNGHAYAN: Napuno ng tuwa at malikhaing pagtatanghal ang iba’t ibang bahagi ng kampus sa huling araw ng Augustinian Jubilation noong Enero 31, 2026.
Namukod-tangi sa mga programa ang Faculty Variety Show ng High School Department na itinanghal sa Bulwagang Santo Tomas ng Villanova at ang programang Kalokalike ng Faculty, Administrative Staff, and Maintenance Personnel Association (FASAMPA) na ginanap sa Grade School Covered Court (GSCC) kung saan ibinida ng mga g**o ang kanilang husay at diwang masining sa entablado.
Tampok ang talento at sigla, namayagpag sa Colegio San Agustin-Makati (CSA) Gymnasium ang mga piling mag-aaral ng hayskul sa kanilang pagganap sa taunang Battle of the Bands. Muling kinilala rito ang bandang Astra mula sa Baitang 12 na nanatiling kampeon sa ikatlong pagkakataon.
Pinagtibay naman ang pagkakaisa ng mga mag-aaral mula Baitang 7, 8, 11, at 12 sa kani-kanilang Batch Hour na nagsilbing lunan ng sama-samang paggunita sa pangunguna ng kani-kanilang mga konseho.
Sa ritmo ng galing at estratehiya sa palakasan, nagpakitang-gilas ang mga manlalaro ng Baitang 7 at 8 sa kanilang tagisan sa Interbatch Volleyball habang ang koponan naman ng Baitang 9 at 10 ang nagharapan sa Interbatch Basketball.
Bilang pagninilay at pagpapaalala ng pananampalataya, isinagawa bilang pagtatapos ng Augustinian Jubilation 2025-2026 ang Infinite Love sa CSA Gymnasium para sa lahat ng mga mag-aaral at kaguruan ng hayskul sa isang sama-samang pananalangin bilang isang pamayanan.
Caption ni Joaquim Concepcion
Larawan nina Sophia Oro, Autumn Carreon, Jodie Rodriguez, Liusea Gundayao, Renee Sison, at Chloe Tiu
