https://www.facebook.com/112802097843389/

REKTA Taliba, Sumapang Matanda, Malolos (2026)

21/08/2026

Bayanihan tungo sa pagbangon sa San Miguel, Bulacan

(Ulat ni: Rommel Manahan)

SAN MIGUEL, Bulacan- Pinangunahan ni Mayor John "B**g" Alvarez ang bayanihan sa paghahanda at pamimigay ng relief goods para sa mga residenteng biktima ng habagat at kalamidad sa bayang ito.

Katuwang ang mga kawani ng Pamahalaang Bayan, mga operatiba ng PNP at mga volunteer workers, isa-isang inihanda ang mga family food packs na ipamamahagi sa mga komunidad sa San Miguel kung saan ang ilan sa mga barangay ay nakaranas ng mga pagbaha sanhi ng sunod-sunod na mga pag-ulan nitong nakaraang linggo.

Hangad ng liderato ni Mayor B**g Alvarez na mabiyayaan ang lahat ng mga karapat-dapat bigyan ng ayuda ng pamahalaan upang sa gayon ay magkaroon sila ng karagdagang maihahain sa mesa habang nasa estado ng pagbangon sa kalamidad.

Nabatid na may pangamba pa ang ilan sa mga San Migueleño dahil may posibilidad na magkaroon muli ng masamang panahon alinsunod na rin sa inilabas ng PAGASA na muling iiral ang habagat sa susunod na linggo.

Target ng San Miguel LGU na isaayos ang lahat ng ' precautionary measures ' upang masiguro ang kaligtasan ng bawat indibidwal na residente rito lalo na ang mga nasa low-lying areas.

Sinisikap rin ng Pamahalaang Bayan na maihanda ang mga food packs at huwag itong magkulang bagkus masuplayan ang lahat ng nangangailangan upang umalalay sa kanila sa gitna ng pagsubok at kalamidad. #

📸 Mayor John B**g Alvarez FB Page

21/08/2026

Bawat bayan makikinabang program ng Bagong Pilipinas, ibinaba sa Bulacan

(Ulat ni: Rommel D. Manahan)

NORZAGARAY, Bulacan- Matapos ideklara at isailalim sa State of Calamity ang buong lalawigan dahil sa mga pinsalang dulot ng mga pagbaha at kalamidad, pinangunahan nina Gob. Daniel R. Fernando, Bise Gob. Alex C. Castro at mga kawani ng Pamahalaang Panlalawigan ng Bulacan ang pamamahagi ng bigas na kasalukuyang programa ni Pangulong B**gbong Marcos na ibinababa sa bawat bayan at komunidad sa Pilipinas.

Kahapon Agosto 20, 2026 , inilatag ng Bulacan LGU sa pangunguna ni People's Governor Daniel Fernando ang Rice Distribution Program ni PBBM sa bayan ng Norzagaray kung saan 7,138 residente ang nabiyayaan.

Nagtipon-tipon ang mga recipients mula sa ibat-ibang barangay sa apat na inihandang venue ng Pamahalaang Bayan ng Garay na sinimulan sa San Mateo Covered Court, kasunod ang Minuyan Covered Court, Bitungol Covered Court at ang huli ay sa Tigbe Covered Court.

Bunsod ng banta ng krisis sa enerhiya kung kaya't minarapat ni Pangulong Marcos na mamahagi ng tig-10 Kilo bigas sa mga mamamayan bilang tulong sa pang -araw-araw na pangangailangan.

"Ito po ay mula rin naman sa buwis ninyo na ibinabalik lamang sa pamamagitan ng mga ganitong uri ng programa bilang pagtugon ng Pamahalaang Nasyunal sa inyong pangangailangan" pahayag ni Gob. Fernando.

"Kami po sa Pamahalaang Lokal ay tagapaghatid lamang ng mga programa mula sa kanila upang sa gayon ay maayos at maingat na maipamahagi ito" giit pa ng Gobernador.

Agad din tinimbang sa harapan ng mga tao ang mga sako ng bigas upang masiguro na tama ang 10kilos na timbang ng mga ito.

Labis ang pasasalamat ng mga nabiyayaang Bulakenyo dahil nagkaroon sila ng karagdagang maisasaing lalo na at nangangamba pa ang marami sa kasalukuyan na may mga bagyo pang tatatama sa bansa at tiyak na mangangailangan sila ng pagkain sa mesa.

Nabatid na naka-iskedyul ngayong araw ang Rice Distribution Program sa mga bayan ng Pandi at Angat at nakatakda na ring ipamahagi ang mga bulto ng sako ng bigas sa iba pang mga bayan sa lalawigan sa mga susunod na araw. #

18/08/2026

Pinaigting na relief operation sa bayan ng Hagonoy

(ni: Rommel Manahan)

HAGONOY, Bulacan- Dalawang barangay ang biniyayaan ng tulong at ayuda ng lokal na pamahalaan ng bayang ito sa pamumuno ni Mayor Ate Charo Sy-Alvarado Mendoza kahapon Agosto 17, 2026.

Sa tuloy-tuloy na paglingap ng liderato ng Lady Mayor ngayong panahon ng kalamidad, nagsagawa ng relief operation sa Brgy. San Pascual at Sta. Cruz upang makatugon sa araw -araw na pangangailangan ng mga residente.

Ang bayan ng Hagonoy ang Isa sa mga coastal town sa Bulacan na laging nakalubog sa tubig-baha at hightide na kailangan talaga ng agarang tulong ng mga residente lalo pa nga at dumarating ang mga bagyo at bagsik ng habagat.

Kaya naman sa gitna ng kontrobersya kaugnay sa isyu ng flood control program ng pamahalaan, sinisikap ng Hagonoy LGU na tugunan ang pangangailangan ng mga mamamayan na nagtitiis araw-araw sa paglusong sa tubig-baha at ang iba naman ay iniwan pansamantala ang kanilang tahanan upang manatili sa mga evacuation site.

Mula sa pondo ng munisipyo ay isa - isang binibiyayaan ng family food packs ang mga Hagonoeño upang makatawid sa araw-araw. Hangad ni Ate Charo na maisalba ang kalam ng sikmura ng kanyang mga kababayan sa gitna ng kalamidad. #

📸 Ate Charo Sy- Alvarado FB Page

16/08/2026

Pandi LGU umalalay sa mga biktima ng habagat

(Ulat ni: Rommel Manahan)

PANDI, Bulacan- Batid ng mga lokal na opisyal sa bayang ito na ang tanging makakapagpagaan ng loob ng mga mamamayan sa gitna ng kalamidad ay ang madamayan sila sa lahat ng oras at maipadama na may gobyernong kakalinga sa kanila ng mabilisan.

Sa bayan ng Pandi, agarang ibinaba sa mga residente ang paglingap ng pamahalaan matapos bayuhin ng mga bagyo at habagat ang buong lalawigan.

Sa pangunguna ni Mayor Rico Roque, kasama ang mga konsehal ng bayan, LDRRMO at MSWDO, inilatag nila ang relief operation sa mga komunidad ng bayang ito upang mabigyan ng kaukulang tulong ang mga biktima ng kalamidad.

Bitbit ng mga opisyal ang mga food packs na magsisilbing pantawid-gutom ng mga residente kung saan nakaranas sila ng mga pagbaha at pagkasira o pagkapinsala ng kanilang mga tahanan.

Ayon kay Mayor Rico, ang pagbabayanihang tulad nito ay malaki ang maitutulong upang maibsan ang kalungkutan ng kanilang mga kababayan. Hangad ng kanyang liderato na ipakitang may gobyernong aalalay sa bawat residente anumang pagsubok ang dumating sa kanilang buhay.

Labis ang pasasalamat ng mga Pandienyos dahil namalas nilang muli ang kaisahan ng mga lokal na opisyal upang magtaguyod ng makabuluhang programa para sa kanila. Handa rin sila sa posibleng maging dulot pa ng epekto ng climate change sa mga susunod na araw . #

📸 Mayor Rico Roque FB Page

14/08/2026

Tagumpay ng Bulacan Dreamers Softball Team, tagumpay ng buong bansa--GDF
(ni: Florence A. Manahan)

LUNGSOD NG MALOLOS, Bulacan- Nagtala ng pandaigdigang karangalan ang itinuturing na 'Bulacan Pride ' sa larong Softball na nag-uwi ng di-matatawarang tagumpay dahil sa husay at dedikasyon na ipinamalas ng koponan kapag larangan ng palakasan ang pag-uusapan.

Kaalinsabay ng paggunita ng Ika-448 Anibersaryo ng pagkakatatag ng lalawigan ng Bulacan, binigyan ng plake ng pagkilala at pagpapahalaga ng Pamahalaang Panlalawigan ang Bulacan Dreamers Softball Team na isa sa inspirasyon ngayon ng mga atletang Bulakenyo.

Sa pangunguna nina Gobernador Daniel Fernando, Bise Gobernador Alex Castro kasama ang buong puwersa ng Sangguniang Panlalawigan, isa-isang pinagkalooban ng sertipiko ang mga manlalaro dahil sa iniuwi nilang karangalan sa Bulacan.

Sa isinagawang 2026 Senior League Softball World Series, nakamit ng Bulacan Dreamers ang Asia Pacific Region's first Bronze Medal kung saan sila ang nagrepresenta sa bansang Pilipinas.

Nakamit rin nila ang pagkapanalo sa 2026 Little League Asia Pacific at Middle East Tournament na ginanap sa Bogor, West Java Indonesia.

Nakakuha rin sila ng puwesto upang makasali ang koponan sa Senior League Softball World Series, kung saan nakalaban nila ang East Region, Latin America Southwest and Delaware D3.

Kahit nabigo sa Delaware D3, nagsikap ang Bulacan Dreamers sa mga sumunod na laban kung saan nakuha nila ang Ikatlong pwesto sa buong mundo laban sa Europe - Africa kaya nasungkit nila ang Bronze Medal Award.

Ayon kay People's Governor Daniel R. Fernando, tunay na di-matatawaran ang ipinamalas ng mga atletang ito na hindi lamang ang lalawigan ang nakinabang kundi ang buong Republika ng Pilipinas.

Solido rin umano ang suporta ng Pamahalaang Panlalawigan sa mga atletang Bulakenyo sapagkat ang iniuuwi nilang karangalan ay nagbibigay ng tagumpay sa Bulacan at nagiging inspirasyon sa lahat ng nangangarap na maging bahagi ng mga palaro maging ito man ay local, national o international. #

14/08/2026

DRT Highway Baliwag, binisita ni Sec. Vince Dizon

(Ulat ni: Rommel D. Manahan)

LUNGSOD NG BALIWAG, Bulacan - Dibdiban ang ginagawang pakikipaglaban ng lokal na pamahalaan ng Lungsod na ito sa pamumuno nina Mayor Mommy Sonia Estrella at Vice Mayor Ferdie Estrella upang mabigyan ng aksyon at solusyon ang sira-sirang kalsada sa kahabaan ng DRT Highway na matagal nang inirereklamo ng mga residente at motorista.

Hangad ng Punong Lungsod at Pangalawang Punong Lungsod ng Baliwag na makompuni agad ang nasabing pambansang lansangan na halos araw-araw ay viral sa social media dahil para kang bumabaybay sa buwan bunga ng malalaking 'uka' ng kalsada na peligroso sa mga motorista.

Nitong mga nakaraang araw, minarapat ni Vice Mayor Ferdie Estrella na tutukan ang tanggapan ng DPWH partikular si Secretary Vince Dizon upang maipakita niya ang suliranin sa kanilang dakilang lungsod pagdating sa national highway.

Mas lumubha pa ang naging pinsala at sira ng kalsada dulot ng walang tigil na pag-ulan sa kasalukuyan.

Nauna nang tumugon ang DPWH 1st BULDEO kung saan ipinaaspalto na ang ilang bahagi ng kalsada nitong mga nakaraang araw.

Masasabing isang malaking pangyayari ang naganap ngayong araw Agosto 14, 2026 kung saan personal na bumisita at nag-inspeksyon sa DRT Highway si Secretary Vince Dizon kasama ang mga lokal na opisyal sa Baliwag.

Ayon kay Dizon, mabibigyan na nila ng kongkretong solusyon ang nasabing problema at sa loob umano ng isang taon ay pipilitin nilang matapos ang rehabilitasyon ng naturang lansangan.

Isang kagalakan naman sa puso ng mga Baliwagenyo lalo na ng mga opisyal ng pamahalaan na sa dami ng nakahanay na iskedyul ng Kalihim ay nagawa nitong dumalaw at silipin ang karaingan ng mga mamamayan rito.

Nabatid na unang isasaayos ang drainage system ng kalsada alinsunod sa ilalatag na Master plan dito kasunod ng mabilisang rehabilitasyon sa buong DRT Highway.

Masasabing kasama na sa mga nakahanay na proyekto ng Kalihim ang nasabing pambansang lansangan upang sa ganon ay magamit ito ng maayos at magkaroon ng maginhawa at kombinyenteng biyahe ang mga motorista. #

📸 Mommy Sonia Estrella FB Page

12/08/2026

Optimistiko si Bulacan Governor Daniel R. Fernando na kapag naisagawa ang Megadike Project na inilatag nila sa Pamahalaang Nasyunal kasama ang mga Gobernador ng Bataan at Pampanga ay ito na ang magiging solusyon sa problema sa hightide at pagbaha sa mga lalawigang ito hanggang Metro Manila.

Ayon kay People's Governor, isinasaayos na sa kasalukuyan ang mga pag-aaral at feasibility study sa nasabing dambuhalang proyekto na inaasahang bibigyan ng atensyon ni DPWH Secretary Vince Dizon. (RDM)

Narito ang pahayag ni GDF:

11/08/2026

Ayuda sa kalamidad, pinamahagi ng Pamahalaang Panlalawigan
(Ulat ni: Rommel D. Manahan)

BULACAN- Naging abala ngayong araw Agosto 11,2026 ang mga opisyal sa Kapitolyo sa pangunguna nina Gobernador Daniel R. Fernando, Bise Gobernador Alex C. Castro kasama ang iba pang department heads sa pamamahagi ng ayuda sa mga nasalanta at naapektuhan ng habagat at masamang panahon.

Subsob sa trabaho ang mga kawani ng Pamahalaang Panlalawigan upang masiguro na mabigyan nila ng pantawid gutom ang mga Bulakenyong binaha at inilikas dahil sa banta ng kalamidad.

Sinimulan ang relief operation sa bayan ng Guiguinto, kasunod ang bayan ng Balagtas at ang panghuli ay ang bayan ng Bocaue kung saan sa pangunguna ni People's Governor ay biniyayaan ng food packs ang mga residente rito at ang ilan sa kanila ay namamalagi pansamantala sa mga evacuation center ng kanilang mga bayan.

Katuwang si PSWDO Chief Rowena Joson-Tiongson, PDRRMO Chief Col. Manuel Lukban, at iba pang kawani ng kapitolyo, nagbayanihan sila sa paglusong sa tubig -baha upang iabot ng personal ang mga food packs sa bawat indibidwal na Bulakenyo.

Nagdagdag din ang Gobernador ng tulong pinansyal sa mga nasalanta upang magamit nila habang nasa evacuation site. Kaakibat din ng relief operation na inilunsad ng Bulacan LGUs na makita at makumusta nila ng personal ang mga Bulakenyo na naapektuhan ng habagat at pagbaha.

"Dagdagan po natin ang panalangin na gumanda na ang panahon at makabalik na kayo sa inyong mga tahanan. Asahan po ninyo na narito palagi ang presensya ng Pamahalaang Panlalawigan ng Bulacan anumang pagsubok ang inyong maranasan. " Pahayag ni Gob. Daniel.

Target ng kapitolyo na marating nila sa mga susunod na araw ang mga coastal areas sa Bulacan upang doon naman nila ibaba ang relief operation na totoong malaki ang naitutulong sa bawat Bulakenyo sa gitna ng pagsubok at kalamidad. #

09/08/2026

Mayor Jocell, nag -ikot sa mga barangay, namahagi ng relief goods sa mga residente
(Ulat ni: RDM)

PLARIDEL, Bulacan - Sa gitna ng masungit na panahon at pananalanta ng bagyong Maymay at habagat, hindi pumayag ang lokal na pamahalaan ng Plaridel na hindi maihatid ng mabilis ang kaukulang tulong at ayuda sa mga residenteng naapektuhan ng sama ng panahon at mga pagbaha.

Sa pangunguna ni Mayor Ate Jocell Vistan , katuwang ang mga kawani ng pamahalaang bayan at mga opisyal ng barangay, isa-isang hinatiran ng food packs ang mga Plaridelenyo upang makatulong at maging karagdagang pantawid ng mga mamamayan habang nakakaranas ng walang tigil na pag-ulan at banta ng pagbaha lalo na sa mabababang lugar.

Agad pinulong ng Lady Mayor ang mga kawani ng pamahalaang bayan upang maisagawa ng mabilis ang relief operation sa mga bahay-bahay sa Plaridel.

Hangad ng liderato ni Mayor Vistan na maipamahagi agad ang mga relief goods sa bawat tahanan ng kanyang mga kababayan. Personal ding kinukumusta ng alkalde ang kalalagayan ng bawat pamilya at inaalam ang kanilang pangangailangan.

May mga residenteng nasa banig ng karamdaman kung saan binibigyan sila ng espesyal na atensyon ng lokal na pamahalaan upang maisaalang-alang ang kanilang kalusugan.

Sa patuloy na pag-iral ng habagat, at pagtaas ng tubig sa ilog dahil sa walang tigil na pag-ulan, handa naman ang Plaridel LGU sa pagtulong at paggabay sa mga residente upang maibsan sila ng alalahanin sa gitna ng kalamidad. #

📸 Jocell Vistan FB Page

REKTA Taliba

21/08/2026

21/08/2026

18/08/2026

16/08/2026

14/08/2026

14/08/2026

12/08/2026

11/08/2026

09/08/2026

Address

Telephone

Website

Alerts

Contact The Business

Shortcuts

Share

Category

Listing takedown request