08/05/2026
𝗢𝗣𝗜𝗦𝗬𝗔𝗟 𝗡𝗔 𝗣𝗔𝗛𝗔𝗬𝗔𝗚 𝗡𝗚 𝗗𝗘𝗣𝗔𝗥𝗧𝗔𝗠𝗘𝗡𝗧𝗢 𝗡𝗚 𝗪𝗜𝗞𝗔, 𝗣𝗔𝗡𝗜𝗧𝗜𝗞𝗔𝗡, 𝗔𝗧 𝗔𝗥𝗔𝗟𝗜𝗡𝗚 𝗣𝗜𝗟𝗜𝗣𝗜𝗡𝗢 𝗵𝗶𝗻𝗴𝗴𝗶𝗹 𝘀𝗮 𝗥𝗘𝗙𝗥𝗔𝗠𝗘𝗗 𝗚𝗘𝗡𝗘𝗥𝗔𝗟 𝗘𝗗𝗨𝗖𝗔𝗧𝗜𝗢𝗡 𝗖𝗨𝗥𝗥𝗜𝗖𝗨𝗟𝗨𝗠 (𝗥𝗚𝗘𝗖) 𝗻𝗴 𝗖𝗼𝗺𝗺𝗶𝘀𝘀𝗶𝗼𝗻 𝗼𝗻 𝗛𝗶𝗴𝗵𝗲𝗿 𝗘𝗱𝘂𝗰𝗮𝘁𝗶𝗼𝗻 (𝗖𝗛𝗘𝗗)
Ang Departamento ng Wika, Panitikan, at Araling Pilipino (DWPAP) ay naglalayong makapaglinang ng mga mag-aaral na siyentipiko, makabayan, at may kahandaang paglingkuran ang bayan. Ginagamit ang wika at panitikan bilang salamin ng lipunan at kasangkapan sa pagpuna ng samot-saring suliraning panlipunan at mula rito ay maigiya ang mga mag-aaral sa pag-asam at paglikha ng pagbabagong makatutulong sa kanilang kapuwa at sa bansa sa pangkalahatan. Subalit sa inilabas na planong Reframed General Education Curriculum (RGEC) ng Commission on Higher Education (CHED), malinaw na walang puwang ang Disiplinang Pilipino at may makitid na espasyo sa mga makabuluhang larang mula sa Humanidades at Agham Panlipunan. Kung kaya, mariing tinututulan ng DWPAP ang nabanggit na kurikulum sapagkat lilikha lamang ito ng mga mamamayang may kakayahang teknikal sa kanilang tatahaking disiplina subalit hungkag ang kabuoang pagkatao.
Ang General Education ay binubuo ng mga asignaturang kinukuha ng lahat ng mag-aaral anuman ang kanilang kurso, na may layuning malinang ang kritikal na pag-iisip, hubugin ang mga mapanuring mamamayan, at paunlarin ang kakayahan sa epektibong komunikasyon, pakikipagkapuwa, at malikhaing pag-iisip tungo sa kabuoang pag-unlad ng indibidwal. Gayunpaman, ang RGEC ay tahasang paglihis sa mga layunin at diwa ng pangkalahatang edukasyon.
𝗣𝗮𝗴𝘀𝗮𝘀𝗮𝘄𝗮𝗹𝗮𝗻𝗴-𝗯𝗮𝗵𝗮𝗹𝗮 𝘀𝗮 𝗜𝗻𝘁𝗲𝗹𝗲𝗸𝘁𝘂𝘄𝗮𝗹𝗶𝘀𝗮𝘀𝘆𝗼𝗻 𝗻𝗴 𝗙𝗶𝗹𝗶𝗽𝗶𝗻𝗼
Mula noong 2013, sistematikong inalis na ang Panitikan at Filipino bilang mandatory core courses sa kolehiyo. Sa kasalukuyan, sa ilalim ng Strengthened Senior High School (SHS) Curriculum, higit pang binawasan ang mga yunit ng Filipino sa pamamagitan ng pagtunaw sa mga dating bukod na asignatura sa K-12 (gaya ng Pagbasa at Pagsusuri ng Iba’t Ibang Teksto Tungo sa Pananaliksik at Komunikasyon; at Pananaliksik sa Wika at Kulturang Pilipino) upang pagsamahin na lamang sa isang pangkalahatang asignaturang Mabisang Komunikasyon. Ang ganitong sunod-sunod na polisiya ay lumilihis at sumasalungat sa diwa ng Artikulo XIV, Seksiyon 6-9 ng 1987 Konstitusyon, na nagtatadhana sa pagpapaunlad at paggamit ng Wikang Filipino sa edukasyon at larangang intelektuwal. Sa kabuoan, nararapat na patuloy na manindigan ang akademya sa pagpapayabong sa akademiko at kultural na papel ng Filipino sa sistemang pang-edukasyon.
𝗣𝗶𝗻𝗮𝗴-𝗶𝗶𝘀𝗮 𝗮𝗻𝗴 𝗔𝘀𝗶𝗴𝗻𝗮𝘁𝘂𝗿𝗮𝗻𝗴 𝗥𝗶𝘇𝗮𝗹 𝗮𝘁 𝗣𝗵𝗶𝗹𝗶𝗽𝗽𝗶𝗻𝗲 𝗦𝘁𝘂𝗱𝗶𝗲𝘀
Ang Philippine Studies o Araling Pilipino ay isang malawak na larangan ng pag-aaral na nakatuon sa kasaysayan, kultura, lipunan, at pagkakakilanlang Pilipino. Sa ilalim ng panukalang RGEC, isinusulong ang pagsasama nito sa kursong The Life and Works of Jose Rizal bilang iisang asignatura sa GE Curriculum. Taliwas ito sa diwa ng R.A. 1425 na nagtatadhana ng hiwalay at masusing pag-aaral sa buhay, mga akda, at kaisipan ni Dr. Jose Rizal bilang mahalagang bahagi ng pagpapaunlad ng nasyonalismo at makabayang kamalayan.
𝗣𝗮𝗴𝗸𝗶𝗹𝗶𝗻𝗴 𝘀𝗮 𝗧𝗲𝗸𝗻𝗶𝗸𝗮𝗹 𝗻𝗮 𝗞𝘂𝗿𝗶𝗸𝘂𝗹𝘂𝗺 𝗮𝘁 𝗣𝗮𝗴𝘀𝗮𝘀𝗮𝗻𝘁𝗮𝗯𝗶 𝘀𝗮 𝗛𝘂𝗺𝗮𝗻𝗶𝗱𝗮𝗱𝗲𝘀 𝗮𝘁 𝗔𝗴𝗵𝗮𝗺 𝗣𝗮𝗻𝗹𝗶𝗽𝘂𝗻𝗮𝗻
Ang panukalang RGEC ay nagtatanggal ng ilang mahahalagang kurso sa General Education mula sa Humanidades at Agham Panlipunan na nagsisilbing pundasyon sa pag-agapay sa mga mag-aaral tungo są kritikal na pag-iisip; pansarili, pangkalinangan, pangkasaysayan, at panlipunang kamalayan; at mapanagutan, etikal, at makatarungang pagpapasya at pagkilos. Sa binalangkas na RGEC, nalilimutan na ang isang mahusay na kurikulum ay hindi lamang nakatuon sa paghubog sa mga gradweyt na may kahusayan sa kanilang propesyon, kundi maging ng mga mamamayan na marunong mag-isip, magsuri, at manindigan para sa tama. Sa panahon ng giyera, paglaganap ng trolls, krisis, at walang habas na korapsiyon sa pamahalaan, mas kailangan natin ng mga asignatura sa Humanidades at Agham Panlipunan para maging mulat at mapaglingkod ang mga tao.
𝗣𝗮𝗴𝗽𝗮𝗽𝗮𝗯𝗮𝗯𝗮 𝘀𝗮 𝗛𝗮𝗹𝗮𝗴𝗮, 𝗗𝗮𝗻𝗴𝗮𝗹, 𝗮𝘁 𝗘𝗸𝘀𝗽𝗲𝗿𝘁𝗶𝘀 𝗻𝗴 𝗺𝗴𝗮 𝗚𝘂𝗿𝗼
Ang pagbabawas ng General Education units mula 36 tungong 18 ay nagdudulot ng malalim na pagguho sa halaga at dangal ng mga g**o sa kolehiyo dahil itinatrato ang mga g**o bilang mga numerong puwedeng bawasan sa ngalan ng tinatawag na “efficiency” sa merkado ng mga mag-aaral. Parang sinasabi ng sistema na sila ay mga piyesa lang ng makina na maaaring palitan o itapon anumang oras. Nawawalan ng puwang ang pagkilalang ibinibigay sa kanilang ambag bilang tagapanday ng kritikal na kaisipan at tagapangalaga ng kaalamang akademiko. Ang ganitong kalakaran ay nagbubunga ng kawalang-katiyakan sa trabaho at unti-unting pagkasira ng propesyonal na dignidad. Malinaw na hindi isinaalang-alang ang kapakanakan at kabuhayan ng mga g**o. Kailangang maunawaan na ang mga g**o ay tagahubog at tagapangalaga ng pundasyon ng kalidad at integridad ng edukasyon. Kapag ang mga g**o ay naisantabi, ang edukasyon ay tuluyang manlulupaypay.
Tayo ngayon ay nahaharap sa krusyal na yugto ng ating kasaysayan sa sistemang pang-edukasyon. Sa nilalayong pagbabago sa GE Curriculum sa kolehiyo, malinaw na kasamang naisasangkalan ang katayuan ng maraming g**o. Subalit higit pa rito, isinusugal ng nasabing pagbabago ang sana ay holistikong pagbuo ng bawat mag-aaral na hindi lamang marunong at mahusay sa kanyang tatahaking propesyon kundi marangal, responsable, at mapagmalasakit na mamamayan ng Pilipinas. Kung kaya, ang panawagan ng DWPAP ay ipaglaban ang edukasyong tunay na naglilingkod sa tao at sa bayan at hindi sa kapritso ng merkado.
𝗜𝗽𝗮𝗴𝗹𝗮𝗯𝗮𝗻 𝗮𝗻𝗴 𝗲𝗱𝘂𝗸𝗮𝘀𝘆𝗼𝗻𝗴 𝗺𝗮𝗸𝗮𝗯𝗮𝘆𝗮𝗻!
𝗜𝗽𝗮𝗴𝘁𝗮𝗻𝗴𝗴𝗼𝗹 𝗮𝗻𝗴 𝗮𝗸𝗮𝗱𝗲𝗺𝗶𝗸𝗼𝗻𝗴 𝗸𝗮𝗹𝗮𝘆𝗮𝗮𝗻!
