24/08/2026
PANTIYON UG LUNGON SA BAG-OHAY LANG GILUBONG GIBUHO-AN
Dili lang pantiyon ang gibuslotan, apil mismo ang lungon sa namatay nga ilang minahal nga nipanaw na.
Mao kini ang nakapaguol ug nakapasubo sa usa ka pamilya sa Ubay, Bohol human nadiskobrehan nga gilungagan ug giguba ang lubnganan sa ilang namatay nga paryente.
Nadiskubrihan ang makalilisang nga kahimtang sa lubnganan ni Ligaya niadtong Agosto 21, 2026, human kini makit-i sa iyang pag-umangkon.
Base sa gipatik sa igsoon sa namatay sa social media, dako ang ilang kasuko ug kasakit sa dihang ilang nakita nga adunay naguba ug gibuhatan og lungag ang pantiyon, lakip na ang lungon sa namatay.
Matud pa nga murag nakapaminsar ang mga suspek nga adunay mga mahalon nga butang ang gipadala sa namatay.
Lakip ang pipila sa iyang paboritong sinina, mga alahas, bag ug duha ka cellphone.
Usa sa mga cellphone, matud sa paryente, mokabat og 15 mil pesos ang kantidad.
Matud pa niya, bisan mahalon ang maong mga butang, iyang gipili nga ilakip kini sa lubnganan tungod kay iya kadto sa iyang sister ug gusto niyang madala ngadto sa lubnganan sa namatay ang mga butang nga iyang gihigugma.
Apan wala sila magdahom nga paglabay sa panahon, adunay manghilabot ug moguba sa lubnganan.
Tungod niini, mihangyo ang pamilya sa mga otoridad nga maimbestigahan ang insidente ug mailhan ang mga responsable.
Samtang, pinaagi sa iyang post, gipagawas sa paryente ang iyang kasuko ug dakong kasakit sa nahitabo, apan mipahayag usab siya nga iyang gisalig sa Ginoo ang hustisya alang sa iyang sister.
Sa pagkakaron, wala pa mailhi ang mga responsable sa pagguba sa lubnganan ug wala pa usab matino kung unsa ang ilang eksaktong tuyo sa maong paglapas.
Padayon ang panawagan sa pamilya alang sa hustisya ug hustong aksyon sa mga otoridad.
Photos: Lydia Excell
