Ang Pagsibol

15/02/2026

ANG PAGSIBOL | BALITA

KNHS Dance Club, Nag-uwi ng Panalo!

Pinatunayan ng Kalumpang National High School Dance Club ang kanilang talento matapos magwagi ng Ikatlong Pwesto laban sa walong paaralan ng Lungsod ng Marikina sa katatapos na 2026 Division Festival of Talents(DFOT) noong Pebrero 13 - 14, 2026 sa Marikina Sports Center.

Layunin ng taunang paligsahan ng DFOT na maipamalas ng mga mag-aaral ang kani-kanilang talento at kasanayan sa iba't ibang masining na gawain tulad ng sayaw at pananaliksik, gabay ang temang "Empowering Filipino Youth: Unleashing Potentials in Creative Industries in the Era of Artificial Intelligence"

Panalo ng Ikalawang Pwesto sa Exhibition at Ikatlong pwesto sa Kabuuan ang KNHSDC sa kategoryang Balye sa Kalye - kombinasyon ng tradisyonal at modernong koreograpiya ng sayaw, maging ng makukulay na kasuotan.

Ayon kay Aime Kristine Paminiano, isa sa mga Dance Master ng grupo, "Nakaramdam po kami ng kaba, pero mas nangibabaw ang eagerness naming maipakita ang lahat ng pinaghirapan namin. Sinamahan namin ng mabigat na emosyon sa bawat galaw—isang galit, isang sigaw, at isang prinsipyo."

"Hindi lang araw—ngunit ilang buwan kaming nag e-ensayo at nagpapractice para lang mabuo ang aming sayaw, marami pa kaming napagdaanan—isa na rito ang mga pagsubok na aming hinarap dahil sa mga taong hindi naniniwalang importante ang sayaw, ngunit kami ay lumaban at sumayaw nang may paninindigan para sa paaralan", pagbabahagi naman ni Karla Santiago, ikalawang Dance Master ng grupo.

Ibinahagi naman ni Bb. Marisol Joy Tingson, tagapayo ng KNHSDC na "disiplina sa loob at labas ng training, continuous training bago pa ang competition, teamwork at pag-include sa students sa buong process ng pagbuo ng sayaw" ang naging sikreto nila upang makamit ang panalo.

✍️ Aime Paminiano Karla Santiago
📷 Maffin Tablante Damian

10/02/2026

ANG PAGSIBOL | BALITA

Iba’t Ibang Patimpalak, Tampok sa Math Month!

Hindi lang chalk at calculator ang bida, kundi tula, musika, sayaw, sining at emosyon ng tagumpay at pagkatalo. Noong Pebrero 6, 2026, ganap na 1:00 ng hapon sa KES Gym, naging sentro ng saya at talino ang pagdiriwang ng Math Month sa pamamagitan ng Mathematics Culminating Program, kung saan ipinamalas ng mga mag-aaral ang kanilang galing sa matematika sa malikhaing paraan.

Layunin ng programa na ipagdiwang ang Math Month ayon sa temang "Mathematics and Hope: Empowering Minds for a Changing World" at ipakita na hindi lamang ito limitado sa mga numero at solusyon, kundi maaari ring pagsanibin ang sining, musika, panitikan at sayaw. Naging posible ito sa pagtutulungan ng mga mag-aaral, g**o at ng Mathematics Department sa pangunguna ni Gng. Wina Mae Q. Pangilinan.

Isa sa mga pinakatampok na kompetisyon ang Math Quiz Bee, kung saan pinarangalan ang mga mag-aaral na may kahusayan sa Analytical Thinking. Unang Gantimpala sina Peter John S. Santos, Joaquin Andrei S. Creer, John Isaac E. Carrera, at Hope Gabriel P. Caranza. Ikalawang Gantimpala naman sina Narciso M. Llagas III, Antonio Rhai L. Guinocor, Rafael Simon U. Cariño, at Xian Lyn C. Aliangan, habang Ikatlong Gantimpala sina Eiron Reijay O. Santos, Cassandra L. Cruz, Althea Jeanne S. Bonita at Maxwell Kurt S. Senga.

Sa Math and Poetry, hindi lamang talino kundi damdamin ang umangat. Nagwagi si Peter John S. Santos ng Unang Gantimpala, sinundan ni Maxwell Kurt S. Senga sa ikalawa, at Yuna Knicole S. Enriquez sa ikatlo. Ayon kay Maxwell Kurt S. Senga, “Masaya at proud ako sa sarili ko kasi nanalo ako. Naramdaman ko yung excitement at saya, at naging confident ako sa sarili ko.”

Ibinahagi naman ni Yuna Knicole S. Enriquez ang kanyang karanasan bilang isa sa mga nagwagi, “Sobrang saya ko dahil hindi ko inaasahang makukuha ko ang Pangatlong Pwesto. Ang maipapayo ko lang ay huwag kabahan pagdating sa mga paligsahan para mas gumanda ang performance mo.”

Hindi rin naging hadlang ang pagkatalo upang ipakita ang tunay na diwa ng paligsahan. Ayon kay Alyana Shannel C. Malipot, isa sa mga lumahok sa Math Poetry, “Nakaramdam ako ng lungkot dahil di ako nasama sa top 3, pero ok lang at proud ako sa sarili ko dahil ginawa ko pa rin ang best ko sa labang iyon.” Ipinakita ng kanyang pahayag ang sportsmanship at determinasyon ng mga kalahok.

Samantala, sa Math and Music, nagwagi ang Pangkat 8–Cheerful bilang Unang Gantimpala, sinundan ng 8–Artful sa ikalawa at 8–Careful sa ikatlo. Umagaw rin ng pansin ang Math and Art, kung saan maraming mag-aaral ang kinilala, kabilang ang mga tumanggap ng People’s Choice Award dahil sa pambihirang pagkamalikhain.

Sa Math and Dance, ipinamalas ng iba’t ibang Pangkat ang sigla at koordinasyon, na pinangunahan ng 10–Amiable bilang kampeon. Sa Rubik’s Cube Competition, namukod-tangi si Jaspher L. Enriquez sa bilis at husay, na sinundan nina Miguel Antonio C. Pasco at Rafael Antonio G. Bael.

Binigyan din ng Certificates of Appreciation ang mga Sipnayan Club officers bilang pagkilala sa kanilang pamumuno at dedikasyon sa tagumpay ng programa. Ang buong kaganapan ay pinangunahan nina Ms. Jamica A. Enriquez, Sipnayan Club President, at Ms. Wina Mae Q. Pangilinan, Math Coordinator, sa suporta ni Ms. Nerissa S. Estrella, punongg**o.

Sa kabuuan, pinatunayan ng Mathematics Culminating Program na ang matematika ay hindi lamang tungkol sa panalo, kundi pati sa pagkatuto, tiwala sa sarili, at lakas ng loob na sumubok—panalo man o talo.

✍️ Yunna Pajarillaga
✔ Photo Lay-out Maffin Tablante Damian

22/01/2026

15/12/2025

ANG PAGSIBOL | MOBILE JOURNALISM (PAMAMAHAYAG MOBIL)

Panoorin at mamangha sa kahusayan at kasanayang ipinamalas ng mga mag-aaral sa 2 minutong pagbabalita, shooting at pag-eedit na dapat magawa ng iisang tao lamang.

Wagi sa Ikatlong Pwesto si Rhian Mae Desonia ng 10-Admirable at Ikalimang Pwesto si Rycel Loraine Dela Cruz ng 10-Amiable sa ginanap na 25th Division Schools Press Conference and Contests noong Nobyembre 08, 2025 sa SSS Village Elementary School, SSS Village Lungsod ng Marikina.

27/11/2025

27/11/2025

ANG PAGSIBOL | BALITA

Sa Dibisyon ng Marikina, bida ang mga Batang Mamamahayag!

Kahusayan at disiplina ang nanaig sa bawat batang mamamahayag na lumahok sa ginanap na 25th Division Schools Press Conference and Contests sa SSS Village Elementary School, Marikina noong Nobyembre 8 at 15, 2025.

Sa temang "Shaping Influencers and Vanguards of Truth in
Schools, Media Platforms, and Communities Through Campus Journalism", dinaluhan ng humigit-kumulang 1,500 na mga batang mamamahayag mula sa lahat ng pampubliko at ilang pribadong paaralan sa Dibisyon ng Marikina.

Ayon kay Peter S. Santos, isa sa mga kinatawan ng Mataas na Paaralang Nasyonal ng Kalumpang sa paligsahan, "masaya ako sa bagong karanasan at proud na proud ako sa aking mga natutunan mula sa paligsahang ito."

Sa kabuuan, ipinamalas ng bawat batang journalist ang kanilang talento, galing at dedikasyon sa iba’t ibang kategorya ng Pamamahayag - pagsulat man o pagbo-brodkast. Hindi man lahat ay nag-uwi ng panalo, naipakita naman nila ang kanilang husay at pagmamahal sa larangan ng pamamahayag.

✍️ Yuna Pajarillaga
📷 Kinatawan ng Ang Pagsibol DSPC 2025

17/10/2025

ANG PAGSIBOL | AGHAM AT TEKNOLOHIYA

PUMILI NG ISA
Ni: Adele Elene Enriquez (8-Faithful)

Maghanda o magdusa?Kung wala tayong gagawin sa kabila ng mga kalamidad na nangyayari sa kasalukuyan, kailangan na nating pumili ng isa.
Ang trahedyang dulot ng lindol ay nakaaapekto sa libo-libong tao. Bakit? Dahil sa sakunang ito, maraming tao ang nawawalan ng tirahan, at higit sa lahat, ng kanilang buhay. Ang pagdanas ng trahedyang ito ay hindi lamang sa tao nakaaapekto, kundi pati na rin sa ating inang kalikasan. Ang ating inang kalikasan na nagbibigay sa atin ng hanapbuhay, kung paano natin pinahahalagahan ang ating buhay, ay marapat lamang na pahalagahan din natin ang ating inang-kalikasan.

Sa kasalukuyan, maraming lugar sa Pilipinas ang nakararanas ng lindol. Halimbawa na lamang ang nangyari sa Baguio noong Oktubre 9, 2025, sa oras na 10:30 ng umaga, na may lakas na 4.4 magnitude, sumunod naman sa Davao Oriental noong Oktubre 14, 2025, oras na 10:06 ng umaga, na may lakas na 5.8 magnitude. Kinabukasan, niyanig din ng lindol ang Lungsod ng Bogo sa Cebu, sa oras na 12:42 ng tanghali, na may lakas na 4.0 magnitude. Ayon sa pag-aaral ng PHIVOLCS, hindi konektado ang sunod-sunod na paglindol sa sinasabing "The Big One." Gayunpaman, patuloy na hinihikayat ang mga tao na manatiling handa at alerto. Sa Metro Manila, mayroong mga lugar at paaralan na pinaghahanda na ng gobyerno at sinasanay na rin ang mga mag-aaral. Kabilang dito ang pagpapraktis ng earthquake drills at pagbibigay ng mga kagamitan tulad ng hard hat, flashlight, pito at emergency go bag. Mayroon ding batas na nakalaan ang gobyerno para sa mga mamamayan, ang Republic Act 10821 o Children’s Emergency Relief and Protection Act, na naglalayong bumuo ng malawakang plano upang mapangalagaan ang kapakanan ng mga kabataang apektado ng kalamidad at sakuna.

Sa huli, inaanyayahan pa rin tayong maging alerto at handa sa mga sakunang maaaring dumating, dahil hindi natin alam kung kailan at saan tatama ang sinasabing "The Big One." Ngunit, sinisigurado ng gobyerno na mayroon silang nakalaang batas para sa mga naging apektado ng kalamidad. Kaya, huwag lamang tayong umasa sa gobyerno; mainam na bawat pamilya ay gumawa na rin ng emergency plan para sa mga darating na kalamidad. Lahat ay inaasahang magiging bahagi sa paghahanda at pagdadamayan. Kung muli kang papipiliin, maghanda o magdusa? Magtulungan tayo sa pagpapasya.

✍🏾 Adele Elene Enriquez
📰 ANG PAGSIBOL | Pagsulat ng Agham at Teknolohiya
📸 Linda Parta

14/10/2025

Kampeon sa Tinta, KNHS ang Una!

May mga simbolo, may mga sikreto!
Noong Oktubre 10, 2025, napuno ng talino at tinta ang KNHS AVR nang gabayan ng mga ekspertong MariSci Copy-editing Tutors ang mga nasa 7-SPJ kung paano paandarin nang mas maayos ang kanilang mga panulat-gamit mismo ang mga mahiwagang simbolo ng copy-editing!
Ang naturang aktibidad ay bahagi ng pagsasanay upang mapaunlad ang kasanayan ng mga batang mamamahayag sa larangan ng copy-editing. Sa tulong ng mga mag-aaral mula sa Marikina Science High School (MariSci), natutuhan ng mga KNHS journalists ang kahalagahan ng mga simbolong ginagamit sa pagwawasto ng artikulo, tulad ng tamang paggamit ng bantas, spelling, at grammar.
Sang-ayon sa mga 7-SPJ, naging masaya at kapaki-pakinabang ang karanasan dahil hindi lamang nila natutuhan ang mga simbolo, kundi naunawaan din nila ang kahalagahan ng disiplina sa pagsusulat at pag edit. “Ang dami naming natutunan! Akala ko dati, basta may tama at mali lang sa pagsusulat. Pero ngayon, alam ko na kung paano gamitin ang mga simbolo para mas maging maayos at propesyonal ang artikulo,” Ayon kay Yunna Pajarillaga, isa sa mga nasa 7-SPJ.
Ibinahagi rin ng isa sa mga MariSci tutors ang kanyang karanasan at saloobin sa pagtuturo. Ayon kay Noel A. Ruffon II, “Noon, nagsimula lang kami sa copy-editing habang nasa bahay. Wala kaming mga taga-train, kaya nakakatuwang makita na ngayon, may mga programa na tulad nito. Parang full circle moment. Dati, kami ang walang nagtuturo, ngayon kami na ang nagtuturo. "
Dagdag pa niya, positibo niyang nakikita ang pagkakaroon ng Special Program in Journalism (SPJ) sa KNHS dahil malaking tulong ito sa pagpapalakas ng kakayahan ng mga kabataan sa pamamahayag. “Mahalaga na may SPJ sa mga paaralan. Sa panahon ngayon na maraming naghahanap ng impormasyon, napakahalaga ng mga batang marunong magpahayag at magsaliksik.”
Gayunman, binanggit din niya ang isang hamon sa aktibidad; ang oras. “Sig**o ang isa lang na medyo nakakapanghinayang ay yung oras. Isang oras lang kasi, kaya medyo bitin. Sana sa susunod, mas matagal pa para mas marami kaming maibahagi sa mga Grade 7 journalists,” dagdag pa ni Rufon II.
Sa kabuuan, ang pagtutulungan ng MariSci tutors at KNHS journalists ay nagpatunay na ang husay sa pamamahayag ay hindi lamang bunga ng talento, kundi ng patuloy na pagkatuto at pagbabahaginan ng kaalaman — tinta man ng karanasan o simbolo ng galing.






✍️ Yunna Pajarillaga
📷 Linda D. Parta

18/09/2025

📢 Science Month Activities Update! 🔬🌱

Heads up, Kalumpang NHS Science enthusiasts! Here are the new schedules for this week’s activities:

📝 Siyensikula & STEMtokperiments
📅 Deadline: Sept. 17, 2025 – 11:59 p.m. (via Google Drive upload)

🎓 STEMazing AGHAMazing Training
📅 Sept. 17, 2025 | 🕑 2:30 – 4:00 p.m. | 📍 KNHS Audio-Visual Room

🧠 Sci-Quiz!
🔹 Grade 8 – Sept. 18, 2025 | 2:30 – 4:00 p.m. | 📍 KNHS Audio-Visual Room

🔹 Grade 10 – Sept. 19, 2025 | 2:30 – 4:00 p.m. | 📍 KNHS Audio-Visual Room

✨ Don’t miss out! Be prepared, be engaged, and let’s make this week sci-mazing! 🚀







📃 : Art Rhylee Alfonso ( Treasurer)
🖋 : Art Rhylee Alfonso ( Treasurer )
🖼 : Art Rhylee Alfonso ( Treasurer )

18/09/2025

ANG PAGSIBOL | LATHALAIN

BULLY-ING
ni Xian Lyn C. Aliangan (8-Faithful)

Naranasan mo na ba na magkaroon ng sugat na hindi o mabagal gumaling? Ito ay isang epekto ng pambubully. Ang bullying ay ang pag-aapi sa kapwa, maaari man sa pisikal, emosyonal, mental, sosyal, ispiritwal, edukasyonal at saykososyal. Ito ay nangyayari dahil sa maraming iba’t ibang rason, at minsan, wala naman talagang rason. Madalas itong nangyayari sa paaralan, lansangan at dahil nasa digital era na tayo, social media.
Ang bullying ay isang masamang gawain na tuwiran o di-tuwirang nakasasakit ng isipan at damdamin ng isang tao. Ang bullying ay hindi tinatanggap o pinagbabawal na aksyon na gawin sa iba. Ayon sa DepEd at 2022 datos ng PISA, 1 sa bawat 3 batang Pilipino ang nakararanas ng bullying. Ngayong 2025, maaaring mas dumami pa ang mga kasong nananatiling tahimik, hindi naitatala, at hindi natutugunan.
Ako ay naniniwala na may mas magandang paraan para masolusyunan ang problema o pagkakatalo. Kapag may minamaliit o inaapi, nawawalan ito ng tiwala sa sarili at nagiging mabigat ang kanyang pang-araw-araw na pag-aaral at pamumuhay. Dapat nating tandaan na ang bawat isa ay may karapatang igalang. Ang simpleng pakikinig, pag-unawa, at pagbibigay ng suporta ay nakatutulong sa pagpigil ng pambubully. Kung lahat ay magpapakita ng malasakit, ang ating lipunan ay magiging ligtas at makatarungan para sa lahat. Marami ang natatakot magsalita dahil maaaring magdulot ito ng mas matinding panganib para sa kanila. Hindi dapat binabalewala ang pambubully. Tandaan na kahit maliit na aksyon na nagawa mo o simpleng salitang binitiwan mo ay may malaking epekto sa taong inaapi.
Mahalagang matigil ang bullying upang magkaroon ng ligtas na paaralan at kapaligiran para sa lahat. Kailangang turuan ang bawat kabataan ng pagrespeto at pakikipagkapwa. Ang bawat isa ay may tungkuling magtanggol sa inaapi. Sa huli, kung sama-sama tayong kikilos, mawawala ang takot, ang pagmamahal at kabutihan ay dapat manaig.

18/09/2025

ANG PAGSIBOL | KOLUM

FAKENEWS GUSTO, KATOTOHANAN AYAW?
Ni: Althea Bernardo (8-Careful)

Fake news. Isang gawaing pinapakalat ng mga Marites sa Pilipinas. Hindi manlang inisip ang damdamin ng ibang tao. Fake news dito, fake news doon, paano nga ba natin masusulosyunan ang fake news na ito? Ang fake news ay parang apoy na mabilis kumalat nakasisira ng pagkatao ng isang tao.

Ako bilang kabataan ay naranasan ko na ring maglaganap ng fake news, isang bagay na pinagsisihan ko nang husto. Nalaman kong hindi pala maganda ang resulta nito. Kaya ang maipapayo ko sa mga kabataan at mga chismosa, itigil niyo ang paglalaganap ng fake news sa kapwa niyo. Tandaan niyo na ang maliit na kasinungalingan ay maaaring magdulot ng hindi pagkakaunawaan. Bilang kabataan, tungkulin natin ang maging maingat at responsable sa ating sasabihin at ibinabahagi sa ibang tao. Ang maling balita ay nakakasira hindi lamang sa reputasyon ng isang tao kundi sa pagtitiwala ng tao sa kaniya kung patuloy niyong gagawin ang ganitong Gawain, mas marami pa ang maaapektuhan at masasaktan. Kaya maging maingat sa inyong sinasabi at pinapakalat sa ibang tao alamin muna kung totoo.

Sa kabuuan, wag niyong hayaan ang fake news ay maging parte ng inyong buhay. Ang pag-iwas dito ay makatutulong hindi lamang para sa sarili mo kundi pati na rin sa iba. Tayo bilang kabataan ang maging daan ng katotohanan kaysa sa kasinungalingan, huwag nating hayaan na ang karma ang maningil sa atin. Tayo na mismo ang pumili sa tama. Ayon nga mula sa berso ng Kawikaan 16:28 "Ang mga mapanirang tao ay naghihiwalay sa magkakaibigan at ang tsismoso'y sumisira ng pagkakaibigan."

02/09/2025

📢📢📢📢