AUDIO FIX Channel

AUDIO FIX Channel The AFC is a Masbate-based social media channel that delivers informative concept videos.

The AUDIO FIX CHANNEL is a Masbate-based social media channel that delivers informative concept videos from local topics and events throughout the province. AFC's goal is to serve diverse audiences by discussing important issues and providing a more comprehensive overview through video presentations.

HIGIT ₱1.5 MILYON NA DROGA, NASAMSAM SA MASBATE CITYTinatayang aabot sa higit ₱1.5 milyon halaga ng hinihinalang shabu a...
17/09/2025

HIGIT ₱1.5 MILYON NA DROGA, NASAMSAM SA MASBATE CITY

Tinatayang aabot sa higit ₱1.5 milyon halaga ng hinihinalang shabu ang nakumpiska ng kapulisan sa isang operasyon kontra droga sa Brgy. Pating, Masbate City nitong Setyembre 16, 2025.

Sa bisa ng search warrant na inisyu ni Hon. Jose Ronald M. Bersales, Executive Judge ng RTC Branch 47, Masbate City, naaresto ang isang High Value Individual (HVI) na kinilala sa alyas na “Alex”, 40-anyos, repairman, at residente ng nasabing barangay.

Dakong alas-5:20 ng hapon nang salakayin ng pinagsanib na pwersa ng Masbate City Police Station, Masbate PPO PIU-PPDEU, Masbate MARPSTA, at sa koordinasyon ng PDEA RO5 ang bahay ng suspek. Narekober mula rito ang tinatayang 222 gramo ng shabu na may street value na humigit-kumulang ₱1,509,600.

Isinagawa ang tamang dokumentasyon kabilang ang pagmamarka, imbentaryo, at pagkuha ng larawan ng mga ebidensya sa presensya ng mga itinalagang saksi. Ang suspek at mga nakumpiskang droga ay nasa kustodiya na ng Masbate City Police Station para sa kaukulang disposisyon.

Samantala, muling nanawagan si PCOL Jefferson B. Araojo, Provincial Director ng Masbate Police Provincial Office, sa publiko na makiisa sa laban kontra ilegal na droga sa pamamagitan ng pagbibigay ng impormasyon na makatutulong sa mga awtoridad sa pagkakaaresto ng mga sangkot sa ilegal na gawain.

📷: Masbate PPO

Please Like, Follow & Share!

HANDOG NG PANGULO, NAGHATID NG HIGIT ₱8 MILYONG PROYEKTO SA MGA MANGINGISDA SA BICOLNakiisa ang Bureau of Fisheries and ...
14/09/2025

HANDOG NG PANGULO, NAGHATID NG HIGIT ₱8 MILYONG PROYEKTO SA MGA MANGINGISDA SA BICOL

Nakiisa ang Bureau of Fisheries and Aquatic Resources (BFAR) Bicol sa programang “Handog ng Pangulo – Serbisyong Sapat Para sa Lahat” nitong Setyembre 13, kung saan mahigit ₱8.6 milyon halaga ng proyekto at tulong ang ipinagkaloob upang palakasin ang kabuhayan ng mga mangingisda sa anim na probinsya ng rehiyon.

Kabilang sa mga ipinamahagi ang Bottom Set Gill Net (BSGN), Tuna Handline, Freshwater Gill Net, 22-footer Fiberglass Reinforced Plastic (FRP) boat na may kumpletong accessories at 7.5HP marine engine, 62-footer FRP boat na may Tuna Handline, 12HP at 13HP marine engine, bangus feeds, at 20,000 pirasong sex-reversed tilapia fingerlings.

Layunin ng programa na maipadama sa mga mamamayan, lalo na sa mga nasa malalayong komunidad, ang agarang benepisyo ng serbisyo ng pamahalaan bilang bahagi ng adbokasiya ng administrasyon para sa pag-angat ng kabuhayan, seguridad sa pagkain, at inklusibong pag-unlad.

Gayunman, sa kabila ng mga proyektong handog ng gobyerno, nananatiling hamon ang usapin ng illegal fishing sa ilang bahagi ng Bicol, partikular sa Masbate. Ayon sa maliliit na mangingisda, patuloy na namamayagpag ang iligal na gawain na nagiging banta sa kanilang kabuhayan at sa yamang dagat.

Nagpahayag sila ng pangamba na maaaring masayang ang mga tulong at proyektong ibinibigay kung hindi agad maaaksyunan ang problema. Hinihiling nila na higit pang pagtutok at mahigpit na pagpapatupad ng batas ang gawin upang matigil ang illegal fishing at masiguro ang patas na pakinabang para sa lahat ng mangingisda.

📷: BFAR Bicol

Please Like, Follow & Share!

13/09/2025

ILLEGAL FISHING SA MASBATE, MULING NAMAYAGPAG?

Nagpahayag ng pangamba ang ilang residente ng mga barangay Jintotolo at Cantil sa bayan ng Balud, Masbate matapos na mamataan ang isang malaking fishing vessel na pinaniniwalaang gumagamit ng ipinagbabawal na zipper fishing.

Noong Setyembre 9, isang video ang in-upload sa social media kung saan makikita ang naturang barko na nagsasagawa umano ng operasyon sa karagatan ng Balud. Ayon sa ilang lokal na mangingisda, ang ganitong paraan ng pangingisda ay nakakaapekto hindi lamang sa yamang dagat kundi pati na rin sa kanilang kabuhayan.

Sa isang post mula sa Barangay Cantil, binanggit na may mga pagtatangka nang pumasok sa kanilang protektadong karagatan ang mga gumagamit ng ipinagbabawal na pamamaraan ng pangingisda. Hinikayat din nito ang mga mamamayan na magtulungan upang mapanatili ang kaligtasan at kasaganaan ng kanilang dagat.

Samantala, umaasa ang mga residente na mabibigyang-pansin ng lokal na pamahalaan at ng mga kaukulang ahensya ang nasabing usapin upang masiguro ang pangmatagalang proteksyon ng yamang dagat at ang kabuhayan ng mga taga-Balud.

Please Like, Follow & Share!

SUBSTATION REHABILITATION PROJECT NG ALECO, BINISITA NG AKO BICOLBumisita si dating Ako Bicol Party-list Representative ...
13/09/2025

SUBSTATION REHABILITATION PROJECT NG ALECO, BINISITA NG AKO BICOL

Bumisita si dating Ako Bicol Party-list Representative Atty. Jil Bongalon sa tanggapan ng Albay Electric Cooperative (ALECO) noong Setyembre 11, 2025 upang silipin ang kalagayan ng unang batch ng mga substation rehabilitation projects na pinondohan sa ilalim ng government subsidy na isinulong nina Rep. Zaldy S. Co at Bongalon.

Sa presentasyong isinagawa, nagbigay ng ulat sa nasabing proyekto sina Acting General Manager Engr. Wilfredo Bucsit at Engr. Mark Jessan “Macoy” Lucilo, Head of Technical Services.

Ipinabatid ng ALECO na 15% na ang nagagawa sa Cullat Substation (1–20 MVA Daraga Substation) at 3.5% naman sa 2–20 MVA Ligao Substation, kasunod ng pagpapalabas ng pondo ngayong taon.

Paliwanag ni Engr. Lucilo, inaasahang matatapos ang mga pasilidad sa Mayo 2026. Karaniwang tumatagal ng siyam na buwan ang pagtatayo ng substation, samantalang anim na buwan ang kinakailangan para sa line installation.

Nakatalaga ang Php120.65 milyon para sa Daraga Substation na may double circuit lines mula Brgy. Cullat, Daraga patungong Bicol International Airport at Brgy. Ilawod, Camalig. Sa Php153.10 milyon namang pondo para sa Ligao Substation, kasama ang 69kV sub-transmission line extension at double circuit lines na mag-uugnay sa Ligao City at Guinobatan.

Kasama rin sa pondong inilaan sa Batch 1 ang mga sumusunod:

Php4.88 milyon – SCADA System ng Daraga Substation

Php17.08 milyon – SCADA System ng main control at Ligao Substation

Php9.3 milyon – Pag-upgrade ng Bare Primary Lines patungong Insulated Primary Lines (Sto. Domingo–Bacacay)

Php48.26 milyon – Distribution line enhancement sa Guinobatan

Kabuuang Php353.29 milyon ang pondo para sa unang yugto ng proyekto.

Ayon kay Engr. Lucilo, ang modernisasyon ay magpapalawak sa kapasidad ng ALECO, magpapahaba ng buhay ng mga transformer, at magbabawas ng problema sa low voltage at madalas na power interruption.

Kasunod nito, ang Batch 2 na nagkakahalaga ng Php2.1 bilyon ay sasaklaw sa pagtatayo ng karagdagang substations sa iba’t ibang bayan ng Albay.

Ang ALECO rehabilitation project ay nakikitang malaking ambag sa pagbibigay ng mas maaasahan at matatag na suplay ng kuryente para sa mga taga-Albay.

📷: Firefly Winter

Please Like, Follow & Share!

BAGONG HANAY NG MGA OPISYAL NG LEAGUE OF MAYORS-MASBATE, NAIPROKLAMA NAMay bago nang pamunuan ang League of Mayors sa La...
13/09/2025

BAGONG HANAY NG MGA OPISYAL NG LEAGUE OF MAYORS-MASBATE, NAIPROKLAMA NA

May bago nang pamunuan ang League of Mayors sa Lalawigan ng Masbate matapos ang matagumpay na eleksyon na ginanap noong Biyernes, Setyembre 12, 2025 sa Provincial Legislative House, Capitol Building.

Nahalal bilang Pangulo si Mayor Mark R. Antonio ng Pio V. Corpus. Siya ang mangunguna sa bagong set ng mga opisyal na inaasahang magtataguyod ng mga programa at patakaran para sa kapakinabangan ng mga bayan at mamamayan ng Masbate.

Narito ang kumpletong listahan ng mga bagong halal na opisyal:

President: Mayor Mark R. Antonio
Vice President: Mayor Alvin C. Adoptante
VP for Operation: Mayor Jeffrey Justin T. Talisic
VP for External Affairs: Mayor Marco Martin M. Cam
VP for Internal Affairs: Mayor Arvin Virtucio
VP for Special Concerns: Mayor Roscelle A. Eramiz
General Legal Council: Mayor Maria Vida E. Bravo
Secretary General: Mayor Michael Demph D. Naga
Treasurer: Mayor Kristine Salve H. Kho
Auditor: Mayor Zakarina A. Lazaro
Public Relations Officer: Mayor Karen M. Ballesteros
Business Manager: Mayor Natividad Isabela R. Magbalon

Board of Directors:

- Mayor Edgar S. Condor
- Mayor Rodolfo O. Estrella Jr.
- Mayor Marites C. Dela Rosa
- Mayor Glenda L. Villahermosa
- Mayor Felipe U. Sanchez
- Mayor Francisco P. Altarejos

Ayon sa mga opisyal, sisikapin ng bagong liderato na higit pang palakasin ang ugnayan ng bawat lokal na pamahalaan at magsulong ng mga inisyatiba na makatutulong sa pag-unlad ng Masbate.

📷: CTTO

Please Like, Follow & Share!

BATUAN, MASBATE: PINALALAKAS ANG SERBISYONG PANGKALUSUGANPatuloy na pinalalakas ng Lokal na Pamahalaan ng Batuan, Masbat...
04/09/2025

BATUAN, MASBATE: PINALALAKAS ANG SERBISYONG PANGKALUSUGAN

Patuloy na pinalalakas ng Lokal na Pamahalaan ng Batuan, Masbate sa pamumuno ni Mayor Marco Cam ang sektor ng kalusugan sa bayan. Sa kanyang opisyal na pahayag, ipinahayag niya ang mainit na pagtanggap at pagbati sa mga bagong doktor ng Rural Health Unit (RHU) na sina Dra. Jackie Arevalo at Dr. Roger Ariel Sibayan.

Ayon kay Mayor Cam, handang-handa ang kanilang RHU Family na magsilbi para sa mga pangunahing pangangailangang medikal ng mga Batueño. Bahagi ito ng mas pinaigting na suporta at pagpapalakas sa healthcare workforce upang matiyak na may sapat na serbisyong medikal na maihahatid sa bawat barangay.

Kasabay nito, naghatid din ng karagdagang supply ng mga gamot at medical essentials para sa mas mabilis na tugon sa mga nangangailangan. Ipinakita rin sa mga larawan ang ilang kahon ng gamot gaya ng Cetirizine at iba pang pangunahing gamot para sa mga pasyente.

“Para sa Diyos at para sa Bayan” ang panawagan ni Mayor Cam at ng buong RHU Family habang patuloy nilang pinapalakas ang serbisyong pangkalusugan sa Batuan.

LALAKI, ARESTADO SA KASONG PAGLABAG SA R.A. 9165 SA PLACER, MASBATEIsang lalaki ang naaresto sa bisa ng search warrant o...
01/09/2025

LALAKI, ARESTADO SA KASONG PAGLABAG SA R.A. 9165 SA PLACER, MASBATE

Isang lalaki ang naaresto sa bisa ng search warrant operation na isinagawa sa bayan ng Placer, Masbate noong gabi ng Agosto 31, 2025.

Ang operasyon ay pinangunahan ng pinagsanib na puwersa ng Placer Municipal Police Station sa ilalim ng pamumuno ni PMAJ Michael S. Albania, Officer-in-Charge, katuwang ang Masbate Police Provincial Drug Enforcement Unit at sa pakikipag-ugnayan ng Philippine Drug Enforcement Agency (PDEA) Regional Office V.

Nasamsam mula sa operasyon ang hinihinalang shabu na tinatayang may bigat na 1.3 gramo at nagkakahalaga ng humigit-kumulang ₱8,500.00.

Isinagawa ang paghahalughog alinsunod sa legal na proseso, sa presensya ng akusado at ng mga itinalagang kinatawan bilang mga mandatoryong saksi, alinsunod sa umiiral na batas.

Ang suspek ay mahaharap sa kasong paglabag sa Republic Act 9165 o ang Comprehensive Dangerous Drugs Act of 2002.

Ayon sa mga awtoridad, ang matagumpay na operasyon ay bunga ng mas pinaigting na kampanya kontra iligal na droga at ng aktibong pakikiisa ng mga mamamayan upang mapanatili ang kaayusan at kaligtasan sa komunidad.

📸Placer MPS

Please Like, Follow & Share!

ENGKWENTRO SA MOBO: 2 REBELDE AT ISANG SUNDALO NASAWINauwi sa karahasan ang sagupaan sa pagitan ng tropa ng pamahalaan a...
01/09/2025

ENGKWENTRO SA MOBO: 2 REBELDE AT ISANG SUNDALO NASAWI

Nauwi sa karahasan ang sagupaan sa pagitan ng tropa ng pamahalaan at armadong grupo ng New People’s Army (NPA) sa magkahiwalay na insidente sa Barangay Marintoc at Barangay Balatucan nitong Sabado, Agosto 30, na nagresulta sa pagkamatay ng dalawang rebelde at isang sundalo.

Ang mga namatay na rebelde ay kinilalang sina alyas “Lito” at “Roco.” Narekober sa pinangyarihan ng labanan ang mga baril, bala, at iba pang kagamitan na iniwan ng mga miyembro ng NPA matapos umatras sa sagupaan.

Samantala, bukod sa nasawing sundalo, dalawa pa ang nagtamo ng sugat at agad dinala sa pagamutan. Ayon sa ulat, patuloy ang kanilang paggaling habang nagpapatuloy ang military operations sa paligid upang masiguro ang seguridad ng komunidad.

Pinamunuan ng 2nd at 96th Infantry Battalion ang operasyon, kasabay ng pinaigting na kampanya ng militar kontra-insurhensya at pagbibigay ng tamang impormasyon sa mga mamamayan sa tulong ng lokal na pamahalaan.

Sa isang pahayag, binigyang-diin ni Major General Aldwine I. Almase, kumander ng 9th Infantry Division, ang kahandaan ng kanilang hanay na wakasan ang armadong pakikibaka sa lalawigan.

Nagpaabot din siya ng pasasalamat sa mga residente na tumutulong sa pamamagitan ng pagbibigay ng impormasyon, at muling tiniyak na magpapatuloy ang operasyon hanggang sa ganap na mawala ang banta ng NPA sa Masbate.

📸: 9th Infantry Division, PA

Please Like, Follow & Share!

PROYEKTO PARA SA BAGONG PALIPARAN SA MASBATE, INILALAPIT NA SA DOTrPinaplantsa na ng pamahalaang panlalawigan ang mga ha...
30/08/2025

PROYEKTO PARA SA BAGONG PALIPARAN SA MASBATE, INILALAPIT NA SA DOTr

Pinaplantsa na ng pamahalaang panlalawigan ang mga hakbang para maisulong ang planong bagong paliparan sa Masbate.

Nakipagpulong si Governor Richard Kho kasama sina Congressman Engr. Antonio T. Kho ng Unang Distrito at Congressman Wilton Kho ng Ikatlong Distrito kay Department of Transportation (DOTr) Secretary Vince Dizon upang ilapit ang proyekto.

Isa sa pangunahing dahilan ng panukala ang limitadong kapasidad ng kasalukuyang Masbate Airport, na hindi na kayang mag-accommodate ng mas malalaking eroplanong kailangan para sa turismo at kalakalan.

Bilang tugon, nag-atas si Secretary Dizon na magsagawa ng site inspection sa mga posibleng lokasyon ngayong ikalawang linggo ng Setyembre.

Inaasahan ng pamahalaang lokal na ang bagong paliparan ay magsisilbing daan tungo sa mas mataas na antas ng pag-unlad para sa mga Masbateño.

📷: Richard Kho

Please Like, Follow & Share!

MASBATE, ITINAAS SA RED ALERT DAHIL SA BANTA NG LPA AT HABAGATNgayong araw, isinagawa ang Pre-Disaster Risk Assessment (...
26/08/2025

MASBATE, ITINAAS SA RED ALERT DAHIL SA BANTA NG LPA AT HABAGAT

Ngayong araw, isinagawa ang Pre-Disaster Risk Assessment (PDRA) ng City Disaster Risk Reduction and Management Council (CDRRMC) katuwang ang iba’t ibang frontline agencies ng lungsod bilang paghahanda sa epekto ng Low Pressure Area (LPA) at Habagat.

Batay sa abiso ng Regional DRRM Council, kabilang ang probinsya ng Masbate sa mga idineklara na nasa Red Alert Status. Sa ilalim ng nasabing lebel, pinapayuhan ang lahat na maging handa sa posibleng pagbaha at pagguho ng lupa. Nakaantabay din ang mga ahensya ng pamahalaan para sa agarang pagresponde sakaling magkaroon ng emerhensiya.

Ayon kay Rizza Bartolata ng DOST-PAGASA Masbate, ang maagap na pagsasagawa ng PDRA ay isang kritikal na hakbang lalo na’t mataas ang tubig-dagat at nasa yellow category ang Masbate kung saan inaasahan ang 50 hanggang 100 millimeters ng pag-ulan ngayong araw.

Pinapaalalahanan ang publiko na manatiling alerto at subaybayan ang mga pinakahuling update hinggil sa binabantayang LPA at Habagat.

📷: Masbate City Information Office

Please Like, Follow & Share!

MIGRATORY BIRD MULA TAIWAN, NAMATAAN SA BALUD, MASBATEIsang migratory bird na may asul na identification band at GPS tag...
25/08/2025

MIGRATORY BIRD MULA TAIWAN, NAMATAAN SA BALUD, MASBATE

Isang migratory bird na may asul na identification band at GPS tag mula Taiwan ang natagpuan sa Barangay Pajo noong gabi ng Agosto 22, 2025.

Unang nakakita rito ang residente na si Ronnie C. Bañez at agad na isinuko ang ibon sa Balud Philippine National Police (PNP) matapos hindi matukoy ang uri at pinagmulan.

Inilipat ng PNP ang pangangalaga sa Municipal Environment and Natural Resources Office (MENRO) sa pamumuno ni Cris E. De Leon. Nasa kustodiya na ngayon ng lokal na pamahalaan ang nasabing ibon.

Ayon sa MENRO, ang GPS tag ay ginagamit sa mga pag-aaral upang masubaybayan ang ruta, distansya, at gawi ng mga migratory bird. Layunin nito ang makakalap ng datos para sa mas epektibong konserbasyon.

Dagdag ng ahensya, karaniwang lumilipat ang mga migratory bird mula sa kanilang breeding grounds patungo sa mga lugar na may mas ligtas na klima at sapat na pagkain tuwing taglamig, at kadalasang bumabalik sa parehong lugar taon-taon.

Nakikipag-ugnayan na ang mga lokal na awtoridad sa Biodiversity Management Bureau ng Department of Environment and Natural Resources (DENR) Regional Office V para sa karagdagang beripikasyon at dokumentasyon.

📷: MENRO Balud

Please Like, Follow & Share!

PROVINCIAL MOST WANTED SA MASBATE, TIMBOG SA OPERASYON SA USONNahuli ng mga operatiba mula sa iba’t ibang yunit ng pulis...
23/08/2025

PROVINCIAL MOST WANTED SA MASBATE, TIMBOG SA OPERASYON SA USON

Nahuli ng mga operatiba mula sa iba’t ibang yunit ng pulisya ang isang pinaghahanap na miyembro ng Communist Terrorist Group (CTG) sa isang operasyon sa Barangay Dapdap, Uson, Masbate noong gabi ng Agosto 22, 2025.

Kinilala ang suspek sa alyas na "Roco", 62 taong gulang, isang magsasaka at residente sa nasabing barangay. Batay sa ulat ng pulisya, miyembro umano ito ng New People's Army (NPA) at kabilang sa listahan ng mga pangunahing pinaghahanap sa buong lalawigan.

Ang pagkakaaresto kay Roco ay isinagawa sa bisa ng warrant of arrest na inilabas ni Hon. Mary Flor D. Tabigue-Logarta, Presiding Judge ng RTC Branch 44 sa Masbate City, kaugnay ng kasong tangkang pagpatay. Nakatakda ang piyansa sa halagang ₱120,000.

Pinangunahan ng Criminal Investigation and Detection Group (CIDG) Masbate PFU ang operasyon katuwang ang RIU5/PIT5, 94th Special Action Company, Masbate MARPSTA, 1st Provincial Mobile Force Company, at Uson Municipal Police Station.

Sa kasalukuyan, nasa kustodiya na ng CIDG Masbate ang suspek habang inaayos ang mga kaukulang dokumento para sa pagsasampa ng kaso sa korte.

Sa pahayag ni PCOL Jefferson B. Araojo, Provincial Director ng Masbate Police Provincial Office, binigyang-diin niyang hindi titigil ang kanilang hanay sa pagtugis sa mga kasapi ng CTG na sangkot sa karahasan at krimen.

📷: Masbate PPO

Please Like, Follow & Share!

Address

Masbate

Telephone

+639517208201

Website

Alerts

Be the first to know and let us send you an email when AUDIO FIX Channel posts news and promotions. Your email address will not be used for any other purpose, and you can unsubscribe at any time.

Contact The Business

Send a message to AUDIO FIX Channel:

Shortcuts

Share

Category