21/09/2025
Ebanghelyo sa Domingo
Septembre 21, 2025
Lucas 16:1-13
Ug miingon si Jesus sa iyang mga tinun-an, “Dihay usa ka dato nga may piniyalan ug gisuginlan siya nga ang iyang salapi giusik-usikan lamang sa iyang piniyalan. Busa iyang gitawag ang piniyalan ug giingnan, ‘Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan kay sukad karon dili ka na piniyalan.’ Busa miingon sa iyang kaugalingon ang piniyalan, ‘Papahawaon na ako sa akong agalon, unsa na may akong buhaton? Wala akoy igong kusog sa pagtrabaho ug bug-at ug maulaw usab ako nga magpakilimos. Ah, mao kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.’ Busa iyang gitawag ang tanang mga utangan sa iyang agalon. Ang una iyang gipangutana, ‘Pila bay utang nimo sa akong agalon?’ ‘Usa ka gatos ka taro nga lana,’ mitubag ang tawo. ‘Ania ang imong bali. Lingkod ug 50 lang ang isulat,’ matod sa piniyalan. Ug giingnan niya ang usa, ‘Ug ikaw, pila may imong utang?’ ‘Usa ka libo ka bakid nga trigo,’ mitubag ang tawo. ‘Ania ang imong bali; 800 lang ang isulat,’ miingon ang piniyalan. Ang agalon niining tikasan nga piniyalan midayeg kaniya tungod sa iyang inantigo nga buhat kay ang mga tawo niining kalibotana mas maantigo modumala sa ilang buluhaton kay sa mga tawo nga iya sa kahayag.”
Ug si Jesus mipadayon sa pag-ingon, “Busa sultihan ko kamo: pagbaton kamog mga higala pinaagi sa mga bahandi niining kalibotana aron inigkahurot na niini, dawaton kamo didto sa walay kataposang puloy-anan. Kinsa kadtong kasaligan sa gagmayng butang, kasaligan usab sa dagko. Ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi niining kalibotana, kinsay mopiyal kaninyo sa tinuod nga bahandi? Ug kon dili kamo kasaligan sa mga butang sa uban, kinsay mohatag kaninyo sa mga butang nga inyo?
“Walay tawo nga mahimong ulipon sa duha ka agalon kay iyang dumtan ang usa ug ang usa iyang higugmaon; unongan niya ang usa ug ang usa iyang tamayon. Dili kamo mahimong magpaulipon sa Dios ug sa salapi.”
+ + + + + + + + +
PAMALANDONG:
"Pagbaton kamog mga higala pinaagi sa mga bahandi niining kalibotana aron inigkahurot na niini, dawaton kamo didto sa walay kataposang puloy-anan."
Gihatagan kita sa Dios sa tanan natong gikinahanglan aron kita makalahutay niining kalibotana ug aron makapangandam alang sa atong kalag nga motabok ngadto sa kinabuhing walay kataposan.
Daghan kaayo nato nga naningkamot nga madato aron nga mabuhat ang tanang kalingawan ug kahilayan niining kalibotana. Og kini na hinuon ang makadala ngadto sa kaalaotan kay kon madato na makalimot naman hinuon sa Dios kay nalingaw na sa mga kahilayan nga gidala sa kwarta.
Dili daotan ang kwarta, ang daotan mao ang paggamit sa kwarta sa dili insakto. Naay nangadato nga namalit og daghan kaayong mahalon nga mga sakyanan nga dili na gani nila masakyan ang uban, pero wala makahatag sa saktong suhol sa mga trabahante nila nga maoy naghago sa ilang negosyo. Ang kwarta nga gigamit alang sa pagpakitag gugma ug kaluoy ngadto sa uban mao ang saktong paggamit sa bahandi aron makasulod sa Gingharian sa Langit.
"Maayo pa ang mga kabus kay manggihatagon pa sa isigkatawo kumpara sa mga dato, kay nakasabot man sila sa kalisod sa uban."
Ampingan nato ang mga butang nga gihatag sa Dios kanato, magamay man o madako, ug gamiton ta kini alang sa kadayganan sa Ginoo nga atong Dios!
Amen.
