sandy channel

07/10/2025

Kalooy sa mga Bata, sa mga Bata nga perming nag siniaw sa ginikanan tan- awa ni ninyo.

25/09/2025

Ebanghelyo sa Biernes
Septembre 26, 2025
Lucas 9:18-22

Usa ka higayon niana, nag-ampo si Jesus nga nag-inusara samtang diha lamang sa duol ang iyang mga tinun-an. Unya nangutana siya kanila, “Kinsa man kuno ako sumala sa sulti sa mga tawo?”

Nanubag sila, “Nag-ingon ang uban nga ikaw mao si Juan nga Magbubunyag. Nag-ingon usab ang uban nga ikaw mao si Elias samtang ang uban pa gayod nag-ingon nga ikaw usa sa mga propeta kaniadto nga nabanhaw.”

“Apan kamo, unsa may inyong ikasulti? Kinsa man ako?” nangutana siya kanila.

Mitubag si Pedro, “Ikaw mao ang Mesiyas nga pinadala sa Dios!”

Apan gipasidan-an sila ni Jesus nga dili gayod manugilon niini kang bisan kinsa. Ug miingon siya, “Ang Anak sa Tawo kinahanglan nga mag-antos pag-ayo ug isalikway sa mga pangulo sa mga Judio, sa mga kadagkoan sa mga pari ug sa mga magtutudlo sa Balaod. Patyon siya ug banhawon sa ikatulo ka adlaw.”

+ + + + + + + + +

PAMALANDONG:
Ginoo, hatagi kami sa grasya nga makaila kanimo nga among Mesiyas ug Dios.

Luwasa kami Ginoo gikan sa mga katalagman labi na sa bagyong Opong nga karon naghulga sa ubang dapit sa among nasud. Preteksyoni ug luwasa ang mga tawo sa lugar nga agian sa bagyo. Ilikay sila sa kadaot labi na sa kadaot sa kinabuhi. Taliwala sa mga pagsulay mahinumdom unta kami nga wala kami mahimo Ginoo kon wala ikaw sa among kinabuhi. Pasayloa kami Ginoo sa tanan namong mga sala ug kalapasan.

"Kining tanan among gipangayo pinaagi sa ngalan sa imong Anak, among Ginoong Jesukristo."

Amen.

21/09/2025

Pilgrimage 2025 ❤️❤️❤️

21/09/2025

Ebanghelyo sa Domingo
Septembre 21, 2025
Lucas 16:1-13

Ug miingon si Jesus sa iyang mga tinun-an, “Dihay usa ka dato nga may piniyalan ug gisuginlan siya nga ang iyang salapi giusik-usikan lamang sa iyang piniyalan. Busa iyang gitawag ang piniyalan ug giingnan, ‘Unsa man kining akong nadungog mahitungod kanimo? Hatagi akog hingpit nga husay sa imong pagdumala sa akong katigayonan kay sukad karon dili ka na piniyalan.’ Busa miingon sa iyang kaugalingon ang piniyalan, ‘Papahawaon na ako sa akong agalon, unsa na may akong buhaton? Wala akoy igong kusog sa pagtrabaho ug bug-at ug maulaw usab ako nga magpakilimos. Ah, mao kini ang akong buhaton aron kon papahawaon na ako sa akong trabaho, may mga higala unya ako nga mopasaka kanako sa ilang balay.’ Busa iyang gitawag ang tanang mga utangan sa iyang agalon. Ang una iyang gipangutana, ‘Pila bay utang nimo sa akong agalon?’ ‘Usa ka gatos ka taro nga lana,’ mitubag ang tawo. ‘Ania ang imong bali. Lingkod ug 50 lang ang isulat,’ matod sa piniyalan. Ug giingnan niya ang usa, ‘Ug ikaw, pila may imong utang?’ ‘Usa ka libo ka bakid nga trigo,’ mitubag ang tawo. ‘Ania ang imong bali; 800 lang ang isulat,’ miingon ang piniyalan. Ang agalon niining tikasan nga piniyalan midayeg kaniya tungod sa iyang inantigo nga buhat kay ang mga tawo niining kalibotana mas maantigo modumala sa ilang buluhaton kay sa mga tawo nga iya sa kahayag.”

Ug si Jesus mipadayon sa pag-ingon, “Busa sultihan ko kamo: pagbaton kamog mga higala pinaagi sa mga bahandi niining kalibotana aron inigkahurot na niini, dawaton kamo didto sa walay kataposang puloy-anan. Kinsa kadtong kasaligan sa gagmayng butang, kasaligan usab sa dagko. Ug kinsa kadtong limbongan sa gagmayng mga butang, limbongan usab sa dagko. Busa kon kamo dili kasaligan sa inyong paggamit sa bahandi niining kalibotana, kinsay mopiyal kaninyo sa tinuod nga bahandi? Ug kon dili kamo kasaligan sa mga butang sa uban, kinsay mohatag kaninyo sa mga butang nga inyo?
“Walay tawo nga mahimong ulipon sa duha ka agalon kay iyang dumtan ang usa ug ang usa iyang higugmaon; unongan niya ang usa ug ang usa iyang tamayon. Dili kamo mahimong magpaulipon sa Dios ug sa salapi.”

+ + + + + + + + +

PAMALANDONG:
"Pagbaton kamog mga higala pinaagi sa mga bahandi niining kalibotana aron inigkahurot na niini, dawaton kamo didto sa walay kataposang puloy-anan."

Gihatagan kita sa Dios sa tanan natong gikinahanglan aron kita makalahutay niining kalibotana ug aron makapangandam alang sa atong kalag nga motabok ngadto sa kinabuhing walay kataposan.

Daghan kaayo nato nga naningkamot nga madato aron nga mabuhat ang tanang kalingawan ug kahilayan niining kalibotana. Og kini na hinuon ang makadala ngadto sa kaalaotan kay kon madato na makalimot naman hinuon sa Dios kay nalingaw na sa mga kahilayan nga gidala sa kwarta.

Dili daotan ang kwarta, ang daotan mao ang paggamit sa kwarta sa dili insakto. Naay nangadato nga namalit og daghan kaayong mahalon nga mga sakyanan nga dili na gani nila masakyan ang uban, pero wala makahatag sa saktong suhol sa mga trabahante nila nga maoy naghago sa ilang negosyo. Ang kwarta nga gigamit alang sa pagpakitag gugma ug kaluoy ngadto sa uban mao ang saktong paggamit sa bahandi aron makasulod sa Gingharian sa Langit.

"Maayo pa ang mga kabus kay manggihatagon pa sa isigkatawo kumpara sa mga dato, kay nakasabot man sila sa kalisod sa uban."

Ampingan nato ang mga butang nga gihatag sa Dios kanato, magamay man o madako, ug gamiton ta kini alang sa kadayganan sa Ginoo nga atong Dios!

Amen.

17/09/2025

Ebanghelyo sa Huwebes
Septembre 18, 2025
Lucas 7:36-50

Unya may usa ka Pariseo nga midapit kang Jesus sa pagpangaon. Busa miadto si Jesus sa balay sa Pariseo ug nakigsalo kaniya. Niadtong lungsora may usa ka babaye nga daotag kinabuhi. Sa iyang pagkadungog nga si Jesus nagkaon didto sa balay sa Pariseo, miadto siya dala ang usa ka tibod nga alabastro nga puno sa pahumot. Samtang diha siya sa luyo sa tiilan ni Jesus, mihilak siya ug nahumod sa iyang mga luha ang mga tiil ni Jesus. Unya gipahiran niya sa iyang buhok ang mga tiil ni Jesus ug gihagkan ug gibuboan sa pahumot. Sa pagkakita niini sa Pariseo nga nagdapit kang Jesus, miingon siya sa iyang kaugalingon, “Kon tinuod pa nga propeta kining tawhana, makaila unta siya kon kinsa kining babaye nga mihikap kaniya ug unsa kadaotan ang iyang kinabuhi!”

Apan miingon si Jesus kaniya, “Simon, aduna akoy isulti kanimo.”

Si Simon mitubag, “Sigi, Magtutudlo, sultihi ako.”

Miingon si Jesus, “May duha ka tawo nga nakautang sa usa ka tigpahulam ug kuwarta. Ang usa nakautang ug 500 ka denario ug ang usa 50 ka denario. Apan kay silang duha dili man makabayad, gipapas na lamang sa nagpahulam ang ilang mga utang. Karon, kinsa man sa duha ang labaw nga mahigugma sa nagpahulam kanila?”
Mitubag si Simon, “Sa akong hunahuna, kadtong dakog utang.”

“Husto ang imong tubag,” matod ni Jesus. Unya milingi siya sa babaye ug miingon kang Simon, “Nakita mo ba kining bayhana? Mianhi ako sa inyo ug wala mo ako hatagig tubig aron ihugas sa akong mga tiil apan gihugasan niya ang akong mga tiil sa iyang mga luha ug gipahiran sa iyang buhok. Wala mo ako hagki sa imong pagdawat kanako apan siya nagsigig halok sa akong mga tiil sukad sa akong pag-abot. Wala mo dihogi ug lana ang akong ulo apan iyang gidihogan ug pahumot ang akong mga tiil. Busa sultihan ko ikaw nga ang daghan niyang mga sala gipasaylo. Tungod niini, dako ang gugma nga iyang gipakita. Apan kinsa kadtong gipasaylo sa diyutay lamang nga mga sala nagpakita ug diyutay usab nga paghigugma.”
Unya giingnan ni Jesus ang babaye, “Gipasaylo na ang imong mga sala.”
Ug ang uban nga didto sa kan-anan nakapangutana sa ilang kaugalingon, “Kinsa ba kining tawhana nga nagpasaylo man gani ug mga sala?”

Apan miingon si Jesus sa babaye, “Ang imong pagtuo nagluwas kanimo. Pauli nga malinawon.”

+ + + + + + + + +

PAMALANDONG:
Si Jesus Dios nga makapasaylo sa sala. Ang motuo kaniya ug mosunod sa iyang mga sugo makadawat og kaluwasan.

Kining maong ebanghelyo nagdasig kanatong mga makasasala nga dili mawad-an sa paglaom kay ang Dios mahigugmaon kaayo ug dili madinumtanon. Dumtan nato ang sala, maghinulsol, ug modangop sa atong Dios nga labing gamhanan. Itugyan ta ang tanan natong mga pangandoy, mga tinguha, ug mga plano ngadto sa kabubut-on sa atong Ginoo. Bisan unsa kadagtum sa atong kalag tungod sa sala, mahimo kining papution nga sama sa niebe sa atong Ginoo kay siya labing gamhanan sa tanan. Moduol lang kita kaniya! Biyaan ta ang sala ug likayan ta ang mga okasyon sa pagpakasala!

"Salamat sa paglaom nga imong gipakita kanamo Ginoo. Hatagi kami sa kalig-on aron sa pagsagubang sa mga pagsulay, ug hatagi kami sa pagtuo."

Amen.

17/09/2025

Ebanghelyo sa Miyerkoles
Septembre 17, 2025
Lucas 7:31-35

Si Jesus mipadayon pagsulti, “Karon, sa unsa ko itandi ang katawhan niining panahona? Sa unsa sila nahisama? Sama sila sa kabataan nga nagyampungad sa merkado. Ang usa ka pundok mosinggit ngadto sa laing pundok, ‘Nagtugtog kami ug honi apan wala kamo mosayaw! Nag-awit kami ug alawiton sa paglubong apan wala kamo magminatay!’ Mianhi si Juan nga Magbubunyag ug wala siya mokaon ug pan ug wala moinom ug bino unya miingon kamo nga, ‘Giyawaan siya!’ Mianhi ang Anak sa Tawo ug siya mikaon ug miinom unya miingon na usab kamo, ‘Tan-awa, dako siyag kaon ug palahubog! Higala pa gyod siya sa mga maniningil sa buhis ug sa mga makasasala.’ Apan bisan pa niini, ang kaalam sa Dios giila nga tinuod sa tanan nga midawat niini.”

+ + + + + + + + +

PAMALANDONG:
Kadtong naghimog sayop ni Juan ug Jesus mga buang-buang kadto ug dili maalamon sama sa ilang hunahuna. Sa ilang pagkagahi og ulo, ilang gisirad-an ang ilang salabotan ug gibalewala ang kaalam.

Kinsa kadtong mituo ug midawat kang Jesus nahimong maalamon bisan pa sa ilang pagkaubos sa edukasyon. Bisan ang mga makasasala nga naghinulsol, miila, ug mituo kang Kristo nahisakop usab sa pamilya sa kaalam.

Ang tawong naglunang sa mortal nga pagpakasala sama sa pagpanapaw, ug pagpangurakot, makita gayod nga diha sa ilang kinabuhi bisan pa sa kabuhong sa tanang kalibotanong butang ug kalipay, dili sila maalamon sa mga espirituhanong butang. Dili na sila maantigong moila og moralidad. Dili na makaantigong maulaw. Ila na hinuon nga ipakasakto ang daotan nilang binuhatan. Daw sa naulipon na sila sa demonyo sa kaulag ug kahakog. Ang mananapaw dili na maghunahuna kon napakaulawan naba nila ang ilang pamilya ug kaugalingon. Ang kawatan dili na makaantigo moila og higala o pamilya basta kwarta na ang hisgotan, ilaron gihapon aron lamang maiya ang kwarta. Dili na gayod maulaw, baga na kaayo ug nawong! Bagtik pa sa panit sa buaya! Sabagay, nahimo naman lagi silang buaya! 😀

Talikdan ta ang grabeng tinguha sa mga kalibotanong mga butang ug unahon ta ang pagpangita ang gingharian ug kaalam sa Dios!

Amen.

16/09/2025

16/09/2025

16/09/2025