https://www.facebook.com/1607001082963872/

The Marian Pages, Meycauayan (2025)

24/08/2025

𝗘𝗗𝗜𝗧𝗢𝗥𝗬𝗔𝗟 | 𝗪𝗶𝗸𝗮𝗻𝗴 𝗕𝘂𝗵𝗮𝘆, 𝗗𝗶𝘄𝗮𝗻𝗴 𝗣𝗶𝗹𝗶𝗽𝗶𝗻𝗼

"Ang wika ay kaluluwa ng bayan." Isang pahayag na nagmula kay Lope K. Santos. Ito ay isang munting paalala tungkol sa sariling pagkakakilanlan ng bansa, at ang kahalagahan nito sa paghubog ng pagkakaisa ng bawat mamamayan. Noong Hunyo 28, 2013, iniutos ng Commision on Higher Education (CHED) sa ilalim ng Memorandum Order No. 20, Series of 2013, na baguhin ang General Education Curriculum (GEC) para sa antas ng kolehiyo. Kasama sa pagsasaayos ay ang pagtanggal ng Filipino at Panitikan bilang mga pangunahing asignatura sa kolehiyo. Ngunit sa pagtanggal ng mga ito sa kolehiyo, tila pinatay ang nagbigay ng buhay, inalis ang mismong hininga ng pagka-Pilipino, at pinagtaksilan ang sarili nating bansa. Sa isang bansang ipinanganak sa himig ng sariling salita, tila higit na pinapahalagahan ang wikang banyaga kaysa sa sariling atin.

Hindi masama ang maging mahusay sa Ingles—ito ay mahalaga sa pakikipag-kompetensya sa buong mundo. Ngunit hindi solusyon ang pagtanggal ng wikang Filipino sa kolehiyo upang tayo'y umusad.

Una, ang pagkawala ng bisa ng komunikasyon sa ating kapwa Pilipino. Sa pagtanggal ng Filipino sa kolehiyo, hindi natuturuan ang kabataan sa mataas na antas ng paggamit ng sariling wika. Sa halip na lumalim ang talino sa Filipino, mas lalo pang nababawasan ang kakayahan nilang makipag-ugnayan sa mga ordinaryong mamamayan. Ang komunikasyon ang tulay ng pagkakaisa. Ngunit kung ito ay tinanggal, hahantong lamang ito sa pagbubukod-bukod ng bawat Pilipino.

Ikalawa, ang kawalan ng trabaho sa mahigit 10,000 na g**o ng Filipino. Hindi lamang ito usaping wika, kundi usaping kabuhayan. Libu-libong mga propesor ng Filipino sa buong bansa ay nanganganib na mawalan ng trabaho, o sapilitang lumipat ng ibang larangan. Kung maraming Pilipino ang hirap sa kabuhayan, mas lalong pinapalala ang problema sa pamamagitan ng pag-alis ng asignaturang Filipino, na nagbibigay trabaho sa ating mga g**o.

Ikatlo, Filipino ang susi para sa intelektwal na pag-iisip. Maaaring gamitin ang mga wikang banyaga upang maging daan para sa pandaigdigang ugnayan, ngunit ang tunay na lalim ng kritikal na pag-iisip ay higit na nahuhubog sa sariling wika. Sa resulta ng Programme for International Student Assessment o PISA, mahina ang intelektwal na pag-iisip ng mga Pilipino. Kung ikukumpara sa ibang mga bansa, ang Pilipinas lamang ang hindi humiling na isalin ang pagsusulit sa unang wika na naging sanhi sa mababang marka.

Ang pagtanggal sa wikang Filipino sa kolehiyo ay hindi lamang simpleng isyu sa kurikulum, kundi isang suliranin sa kultura, kabuhayan, at pagkatao ng Pilipino. Sa pagwawaksi ng asignaturang Filipino bilang isa sa mga pangunahing asignatura sa kolehiyo, unti-unti na ring nawawalan ng pakikipag-unawaan ang bawat isa, ng libo-libong trabaho ng mga g**o, at ng pagkakakilanlan bilang isang Pilipino. Hindi ang pagtanggal ng Filipino at Panitikan sa kolehiyo ang solusyon sa ating intelektwal na pag-unlad, kundi ang pagpapalakas sa wikang Filipino bilang bahagi ng ating edukasyon. Kung ninanais natin na manatiling buo ang ating pagka-Pilipino, dapat tayong magkaisa upang ipaglaban na ang Filipino ay manatili—hindi bilang opsyon, kundi bilang pangunahing sandigan ng ating bayan.

✍🏼| 𝗕𝗔𝗧𝗨𝗧𝗘
✏️| 𝗧𝗢𝗨𝗞𝗢𝗪𝗕𝗬
🖼️| 𝗞𝗔𝗬𝗟𝗔 𝗗𝗔𝗥𝗜𝗟𝗔𝗚, 𝗥𝗔𝗖𝗛𝗘𝗟𝗟𝗘 𝗥𝗘𝗖𝗢𝗖𝗢 & 𝗝𝗢𝗛𝗔𝗡𝗡𝗔 𝗖𝗢𝗥𝗢𝗡𝗘𝗟

24/08/2025

𝗟𝗔𝗧𝗛𝗔𝗟𝗔𝗜𝗡 | 𝗦𝗮𝘆𝗮𝘄 𝗻𝗴 𝗕𝗮𝘆𝗮𝗻

Sa buwan ng Agosto ay ipinagdiriwang natin ang Buwan ng Wika, isang mahalagang okasyon kung saan binibigyang-pansin natin ang ating wika, kultura, kasaysayan, at pagkakakilanlan bilang mga Pilipino. Isa sa mga tampok ng pagdiriwang ay ang mga sayaw na katutubo o mas kilala rin sa tawag na "folk dance", kung saan sa bawat indak at galaw ay naipapakita ang tradisyon at pagkakaisa natin bilang isang bayan.

Ang mga nagtanghal ng katutubong sayaw ay ang mga estudyanteng mula sa elementarya at high school, kung saan sila ay nagpakitang-gilas at nagkaisa sa pagsayaw ng Subli at Bulaklakan Festival.

Sa paghahanda ng mga estudyante para sa kanilang pagtatanghal, nasasalamin nila ang buhay na diwa at kultura nating mga Pilipino. Habang sila ay nag-eensayo, ipinapakita rin nila ang bayanihan o pagkakaisa ng bawat miyembro upang maitawid at maitanghal nang maayos ang sayaw. Kapansin-pansin din ang mga makukulay at tradisyonal na kasuotan ng mga estudyante na nagpapakita ng mayamang kultura at kaugalian ng mga Pilipino.

Sa pagtatanghal ng mga katutubong sayaw, hindi lamang galaw at indak ang ipinapakita sa mga manonood kundi pati ang mayamang kultura at tradisyon ng ating bayan, na nagsisilbing pagkakakilanlan sa ating kasaysayan. Kaya’t sana ay huwag nating kalimutan ang mga alaala ng ating kasaysayan na iniwan ng ating mga ninuno upang patuloy na yumabong ang ating tradisyon at kultura.

✍🏼| 𝗚𝗘𝗡𝗘𝗦𝗜𝗦 𝗦𝗘𝗠𝗜𝗡𝗜𝗔𝗡𝗢
🖼️| 𝗞𝗔𝗬𝗟𝗔 𝗗𝗔𝗥𝗜𝗟𝗔𝗚 & 𝗘𝗟𝗟𝗔 𝗥𝗘𝗖𝗢𝗖𝗢

22/08/2025

𝗙𝗢𝗖𝗨𝗦 𝗙𝗥𝗜𝗗𝗔𝗬 | No’n

No’n, salitang maikli ngunit dagat ng damdamin,
Saya’t lungkot, halakhak, hagulgol na malalim.
Isang pangyayaring nagdulot ng liwanag at guhit,
Bagong yugto’y umusbong, sa puso’y nakaukit.

No’n, may mga pintong bukas na tila nag-aanyaya,
Balikan ang mga nakaraan at ang mga alaala,
Ngunit may mga pintong kailangang i-sarado na.
Bagamat paano sisikat ang araw sa silangan,
Kung yakap pa rin ang takipsilim sa kanluran?

Hindi paglimot ang wagas na paglisan,
Kundi pagtanggap na tapos na ang laban.
Sa bawat wakas ay may simula ring kaagapay,
Sa bawat pagbitaw, may bukas na maghihintay.

No’n ang haligi, ngayon ang tulay,
Patungo sa bukas na handog na alay.
Matutong magpaalam, tanggapin ang tapos,
Sapagkat sa dulo, may bagong buklod.
At kung iiwan mo ang kahapon nang buo,
Mas matibay ang bukas na sasalubungin mo.

✍🏼| 𝗚𝗜𝗟𝗟𝗜𝗔𝗡 𝗔𝗠𝗜𝗢
✏️| 𝗔𝗞𝗜𝗦𝗛𝗔 𝗟𝗔𝗚𝗨𝗡𝗦𝗔𝗗

22/08/2025

𝗙𝗢𝗖𝗨𝗦 𝗙𝗥𝗜𝗗𝗔𝗬 | Mata ng Bagyo

Hindi na kakaibang konsepto ang bagyo
Kung ikaw ay isang karaniwang Pilipino
Maaaring dahil sa dalas nitong nagaganap
Minsa’y ang sakuna na ang hinahanap-hanap
Sa kadahilanang sarado ang paaralan
O napapagaan ang kanilang damdamin ng ulan
Marami ng bagay ang naiisip bilang positibo
Upang mapalampasan ang sakunang ito

Ngunit huwag sana tayong makalimot
Na bawat bagyo’y siguradong magdudulot
Ng pinasala’t kawalang maaaring mahirap bawiin
Mga pinaghirapang kinakailangang ulitin
Lahat ng ito’y epekto ng isang sakuna
At kailanma’y hindi nararapat na ikatuwa
Tayo’y makuntento sa ating kaligtasan
Na tayo ay biniyayaan ng isang tuyong tahanan.

Maaaring para sayo’y lumipas lang ang isang araw
Ng pahinga habang humihigop ng mainit na sabaw
Ngunit ibang-iba ang reyalidad
Ng mga nahihirapang mabuhay sa mababang kalidad
Mga pamilyang pinagkait ng bagyo ang tirahan
Mga magsasakang nasalanta ang palayan
Sila ang sumasalo ng masasamang epekto
At pinagkaitan ng pribilehiyong maging protektado

Sa bawat bagyong dumadaan at dadaan
Ang pagiging optimisto ay isang magandang katangian
Subalit buksan natin ang ating puso
Para sa ating mga kababayang nabigo
Ng sistemang hindi sila nailigtas mula sa lunos
Sa dinanas sana nating hirap na sila ang tumubos
Huwag nating sayangin ang lakas ng ating mga kapwa-Pilipino
Sila’y pahalagahan at ibangon sa mga dadaan pang bagyo

✍🏼| 𝗭𝗬𝗔 𝗕𝗨𝗟𝗔𝗧𝗔𝗢
✏️| 𝗔𝗟𝗔𝗜𝗡𝗘 𝗙𝗥𝗜𝗟𝗟𝗘𝗦

21/08/2025

𝗟𝗔𝗧𝗛𝗔𝗟𝗔𝗜𝗡 | “The Filipino is Worth Dying For”

Agosto 21, 1983 naganap ang asasinasyon ng dating senador na si Benigno "Ninoy" Aquino Jr. Binaril siya sa Manila International Airport na kalaunang pinangalanang "Ninoy Aquino International Airport" sa kaniyang karangalan.

Bago siya mamatay, ang kaniyang mga binitawan na salita ay kinikilala bilang mapagmahal at kahanga-hanga hanggang ngayon. Pauwi ng Pilipinas upang tumutol sa diktadura, sinabi nya ang sikat na "The Filipino is worth dying for." Ito'y pinanindigan ng kaniyang buong pagkatao noong siya ay binaril ilang segundo pagbaba niya ng eroplano.

Ang kamatayan ni Ninoy Aquino ay nagsiklab ng nasyonalismo sa sambayanan at siyang tumulong sa Pilipinas na magkaisa. Malungkot man itong trahedya, nagsilbi itong katalista para sa People Power Revolution na tumapos sa malupit na diktadura ng dating pangulong Marcos Sr..

20 na taon malipas ang kaniyang kamatayan, kinilala ang Agosto 21 bilang "Ninoy Aquino Day." Ito ay pormal na idineklara noong Pebrero 25 , 2004 ni Gloria Macapagal Arroyo, ang tagapangasiwa ng taon na iyon. Mula noon, kinilala na ng bansa ang araw ng kamatayan niya bilang isang araw ng paggunita sa kaniyang mga naggawa.

Si Ninoy Aquino ay isang simbolo ng kagitingan at sakripisyo. Ipinararangal at tinatandaan natin ang kanyang pamana na kasaysayan. Lubos nyang minahal ang kaniyang bayan hanggang sa puntong ipinagpalit niya ang buhay niya para dito.

Ngayong Agosto 21, 2025 ginugunita natin ang ika-42 na araw ng kamatayan ni Ninoy Aquino. Ang araw na ito ay tumatayong tanda ng isang makasaysayang pangyayari, na humubog sa panahon at naghatid ng pagbabago.

Respetuhin natin ang aral na bigay ng kwento at debosyon niya sa bansa. Kilalanin natin muli ang pinanindigan ni Ninoy, ipagpatuloy ng bansa ang pagbuo ng isang mas mabuting komunidad. Isang bansa kung saan ang hinaharap ay maliwanag, kasama ng pagkakapantay-pantay at ng kapayapaan.

✍🏼| 𝗠𝗔𝗥𝗜𝗫𝗔 𝗙𝗜𝗡𝗘𝗟𝗟𝗘 𝗨𝗥𝗕𝗔𝗡𝗢
🖼️| 𝗝𝗜𝗔 𝗠𝗔𝗚𝗦𝗔𝗬𝗢 & 𝗖𝗛𝗟𝗢𝗘 𝗠𝗜𝗟𝗟𝗔𝗥𝗘𝗦

18/08/2025

𝗟𝗔𝗧𝗛𝗔𝗟𝗔𝗜𝗡𝗚 𝗔𝗚𝗛𝗔𝗠 | Tatlong Bagyo, Isang Bansa

Tatlong magkakasunod na bagyo ang pumasok sa Philippine Area of Responsibility (PAR) noong Hulyo 2025—ang Bagyong Crising, Dante, at Emong.

Si Bagyong Crising ay pumasok noong Hulyo 3 bilang isang tropical depression na may lakas ng hangin na 45 kph at bugso na hanggang 60 kph. Bagamat mahinang bagyo, nagdulot ito ng light to moderate rainfall sa mga rehiyon ng Visayas at Mindanao. Pagkalipas ng isang linggo, pumasok si Bagyong Dante noong Hulyo 10 bilang isang tropical storm na may lakas ng hangin na 75 kph at bugso na 90 kph. Nagdala ito ng moderate to heavy rainfall sa Luzon at Visayas. Naging sanhi ito ng ilang landslide at kanselasyon ng klase sa mga apektadong lugar..Noong Hulyo 22, pumasok naman si Bagyong Emong bilang isang severe tropical storm na may lakas ng hangin na 95 kph at bugso na 115 kph. Bagamat hindi direktang tumama sa kalupaan, nagpalakas ito ng southwest monsoon o habagat, na nagdulot ng heavy to intense rainfall sa kanlurang bahagi ng Luzon. Ilang bahagi ng Metro Manila at CALABARZON ang nakaranas ng matinding pagbaha, dahilan upang suspendihin ang klase at ilang pampublikong biyahe. Agad namang naglabas ng mga babala ang mga lokal na Disaster Risk Reduction and Management Offices (DRRMOs) upang maiwasan ang pinsala.

Itinuturing ang Hulyo 2025 bilang isa sa mga buwan ng taong ito na may pinakamaraming naitalang aktibong bagyo. Ayon sa mga eksperto, patuloy na dapat maging handa ang mga mamamayan sa posibilidad ng mas malalakas pang bagyo sa susunod na buwan. Sa tulong ng maagang babala, tamang impormasyon, at pagtutulungan ng bawat isa, mas mapagtatagumpayan natin ang mga darating pang hamon ng kalikasan..

✍🏼| 𝗡𝗜𝗡𝗔 𝗠𝗜𝗞𝗔𝗘𝗟𝗔 𝗙. 𝗘𝗦𝗧𝗥𝗘𝗟𝗟𝗔
🖼️| 𝗞𝗔𝗬𝗟𝗔 𝗗𝗔𝗥𝗜𝗟𝗔𝗚 & 𝗥𝗔𝗖𝗛𝗘𝗟𝗟𝗘 𝗥𝗘𝗖𝗢𝗖𝗢

17/08/2025

𝗟𝗔𝗧𝗛𝗔𝗟𝗔𝗜𝗡𝗚 𝗣𝗔𝗠𝗣𝗔𝗡𝗔𝗡𝗔𝗠𝗣𝗔𝗟𝗔𝗧𝗔𝗬𝗔 | Dakilang Paanyaya ng Diyos

Ang Pag-alala; Ang pagkakaron ng anim na araw na pagtratrabaho ng mga tao at ang pag-iling sa ikapitong araw ng Linggo, sapagkat ito ang Sabbath o Ang Araw ng Pamamahinga. Ang saligang teolohikal na ito ay mahahanap at mababasa sa libro ng Exodo 20:8, ang ika-apat sa Sampung Utos ng Diyos.

Iniimbitahan tayong makaalala, upang hindi natin makalimutan ang mga nagawa at pagpapala ng Panginoon para sa atin; Ito rin ay mahahanap sa Bagong Tipan na tinatawag na Huling Hapunan—kung saan binanggit ng Panginoon ang mga katagang: "Gawin ninyo ito, bilang pag-alaala sa akin"; Simbolo ng kahalagahan ng pag-alala sa kaniyang grasya at sakripisyo.

Ang Paglugod; Iniimbitahan tayong malugod na ipagdiriwang ang paglikha, dahil ang Araw ng Pamamahinga ay minamarkahan ang Pitong Araw na Pagkalikha, kung kailan natapos at namahinga ang Diyos sa paglikha ng mundo. Isang araw upang ipagdiwang ang kanyang mga inilikha, ay isang dahilan upang magsaya at magpasalamat.

Ang paglugod rin ay binanggit hindi lamang sa Luma, kundi sa Bagong Tipan, kung saan isinaad ni Hesukristo na siya ang Panginoon ng Banal na Araw (Mar. 2:28).

Ang Pagsisisi; Iniimbitahan tayong magtubos sa ating mga sala. Ito ang simbolo na nagpapaala-ala sa buong sansinukob ng walang sawang pagmamahal at sakripisyo ng Panginoon sa mga tao, sa pamamagitan ng pagpasan niya ng krus sa dalan ng kapaitan (Juan 3:16). Ang paglalaan ng oras upang magmuni-muni at humingi ng kapatawaran sa Diyos, ay nagsisilbing panahon upang ipagdiwang ang pagbabago.

✍🏼| 𝗕𝗔𝗜𝗟𝗘𝗬 𝗕𝗘𝗥𝗧𝗜𝗦
🖼️| 𝗝𝗜𝗔 𝗠𝗔𝗚𝗦𝗔𝗬𝗢

17/08/2025

𝗙𝙞𝙣𝗗𝙞𝙣𝙜𝙨🛎️ | 𝙈𝙖𝙮 𝙠𝙖𝙠𝙖𝙞𝙗𝙖𝙣𝙜 𝙣𝙖𝙣𝙜𝙮𝙖𝙧𝙞 𝙨𝙖 𝙎𝙞𝙩𝙞𝙤 𝘽𝙪𝙠𝙞𝙙 𝙨𝙖 𝙥𝙖𝙜𝙞𝙩𝙖𝙣 𝙣𝙜 𝙙𝙖𝙡𝙖𝙬𝙖𝙣𝙜 𝙖𝙧𝙖𝙬...

Kaya mo bang hanapin ang limang bagay na nakalihim at nakatago?

𝙃𝙖𝙡𝙞𝙣𝙖'𝙩 𝙢𝙖𝙜 "𝗙𝙞𝙣𝗗𝙞𝙣𝙜𝙨🛎️" 𝙩𝙖𝙮𝙤!

Ibahagi ang inyong sagot at abangan ang resulta sa mga susunod na araw. Kita-kits next week, mga ka-𝗙𝙞𝙣𝗗𝙞𝙣𝙜𝙨! 😉

✍🏼| 𝗞𝗘𝗡𝗧 𝗠𝗔𝗡𝗚𝗬𝗔𝗢 & 𝗠𝗔𝗥𝗜𝗔𝗡𝗘 𝗗𝗘𝗟𝗢𝗦 𝗦𝗔𝗡𝗧𝗢𝗦
🖼️| 𝗘𝗟𝗟𝗔 𝗥𝗘𝗖𝗢𝗖𝗢 & 𝗞𝗔𝗬𝗟𝗔 𝗗𝗔𝗥𝗜𝗟𝗔𝗚
✏️| 𝗦𝗛𝗔𝗡𝗘𝗟𝗟𝗘 𝗕𝗔𝗬𝗢𝗡𝗔

15/08/2025

𝗙𝗢𝗖𝗨𝗦 𝗙𝗥𝗜𝗗𝗔𝗬 | Tinig ng Mundo

Wika’y ilaw sa dilim ng pag-iisa,
Tumutulong upang tayo’y magkaunawa.
Sa bawat titik, damdamin ay naglalakbay,
Tulay ng puso na di kailanman magwawalay.

Sa iba’t ibang dila, musika’y maririnig,
May awit ng saya, may himig na tahimik.
Bawat salitang buhat sa puso’t isipan,
Nagpupunla ng pag-ibig sa kapwa’t bayan.

Kahit hadlang ng wika’y sumulpot sa landas,
May tanda, tingin, o galaw na wagas.
Katahimika’y nagiging mensahe rin,
Na sumasayaw sa hangin at damdamin.

Wika’y pintuan ng pagkakaibigan,
Bagong mundo sa bawat pagbubukas.
Ito’y sining, buhay, at ating pagkakaisa,
Tinig ng mundo na di mawawala.

✍🏼| 𝗩𝗔𝗡𝗘𝗦𝗦𝗔 𝗗𝗔𝗬𝗛𝗢𝗣
✏️| 𝗛𝗔𝗭𝗘𝗟𝗬𝗡 𝗖𝗢𝗥𝗢𝗡𝗘𝗟

15/08/2025

𝗙𝗢𝗖𝗨𝗦 𝗙𝗥𝗜𝗗𝗔𝗬 | Lahing Makabayan

Sa bawat titik na aking isinisulat,
ang aking puso’y namumulat.
Sa bawat bigkas ng aking wika,
ang pag-ibig sa lahi’y nagmumutya.

Sa wika ako’y natutong magmahal,
bawat galaw ng dila’y
kay sarap bigyang dangal.
Tuon ng aking dugo’y pasikatin ang bansa,
sa lengguwaheng kamangha-mangha.

Nais ko sana’y pag-ingatan ang nasyon,
sapagkat ang wika’y biyayang tradisyon.
Ang wika’y rason sa pagtibok ng bayan,
Sa wika’y lahat may kalayaan.

✍🏼| 𝗩𝗜𝗔 𝗖𝗨𝗔𝗥𝗘𝗦𝗠𝗔
✏️| 𝗖𝗟𝗔𝗥𝗜𝗦𝗦𝗘 𝗕𝗔𝗟𝗧𝗔𝗢

15/08/2025

𝗠𝗮𝗹𝗶𝗴𝗮𝘆𝗮𝗻𝗴 𝗮𝗿𝗮𝘄 𝗻𝗴 𝗕𝘂𝗹𝗮𝗰𝗮𝗻!📜

Sa dakilang araw na ito, ipinagdiriwang natin ang ika-447 anibersaryo ng pagkatatag ng lupain ng mga bayan—ang 𝒑𝒖𝒔𝒐 𝒏𝒈 𝒌𝒂𝒔𝒂𝒚𝒔𝒂𝒚𝒂𝒏 𝒂𝒕 𝒌𝒂𝒃𝒂𝒚𝒂𝒏𝒊𝒉𝒂𝒏. Ito ang kalikha ng mayamang kulturang ipinama at pagkakaisa ng bawat Bulakenyo. Nawa’y maging inspirasyon ang ating mga ninuno sa pagtuloy na pag-unlad ng ating minamahal na lalawigan.

✍🏼| 𝗞𝗘𝗡𝗧 𝗠𝗔𝗡𝗚𝗬𝗔𝗢
🖼️| 𝗔𝗟𝗜𝗔𝗛 𝗔𝗟𝗠𝗢𝗝𝗨𝗘𝗟𝗔, 𝗟𝗛𝗜𝗡𝗗𝗦𝗔𝗬 𝗗𝗘𝗟𝗔 𝗖𝗥𝗨𝗭 & 𝗔𝗟𝗧𝗛𝗘𝗔 𝗖𝗢𝗥𝗘𝗘𝗡

14/08/2025

𝗛𝗮𝗽𝗽𝗶𝗲𝘀𝘁 𝗕𝗶𝗿𝘁𝗵𝗱𝗮𝘆 𝗦𝗼𝗳𝗶𝗮!

Always praying for your happiness and health. May this new year bring you exciting adventures, success in all your endeavors, and moments you’ll cherish forever. Enjoy your special day🤍💙 - MP

The Marian Pages

24/08/2025

24/08/2025

22/08/2025

22/08/2025

21/08/2025

18/08/2025

17/08/2025

17/08/2025

15/08/2025

15/08/2025

15/08/2025

14/08/2025

Address

Website

Alerts

Shortcuts

Share

Category