08/08/2026
PAMALANDONG SA EBANGHELYO | Mateo 14:22-33
Usahay, ang atong kinabuhi sama sa sakayan sa mga tinun-an.
Naa ta sa sulod sa sakayan, nagpadayon sa atong kinabuhi, nagtrabaho, nag-atiman sa pamilya, nagserbisyo, nagplano sa kaugmaon. Apan kalit lang, moabot ang unos—problema sa pamilya, pinansyal nga kabalaka, relasyon nga naguba, kapakyasan, kahadlok sa kaugmaon, o usa ka problema nga dili nato makita kung kanus-a matapos.
Ang mas lisod pa, usahay mobati ta nga wala si Hesus sa atong sakayan.
Apan tan-awa pag-ayo ang Ebanghelyo:
Wala diay biyae ni Hesus ang mga tinun-an.
Samtang sila nakigbisog sa balod, si Hesus nag-ampo. Ug sa tukmang panahon, miduol Siya kanila ibabaw sa tubig.
Mao usab kini sa atong kinabuhi.
1. Ang presensya sa problema dili pasabot nga wala ang Ginoo.
Usahay moingon ta:
“Ginoo, nganong gitugotan man Nimo ni?”
“Ngano nga bisan nag-ampo ko, naa gihapon ang problema?”
“Ngano nga murag wala man Ka?”
Apan ang Ebanghelyo nagtudlo kanato nga ang presensya sa unos dili ebidensya sa pagkawala sa Diyos.
Posible nga anaa Siya, apan dili nato Siya makita tungod sa kusog sa atong kahadlok.
Ang mga tinun-an nakakita kang Hesus apan abi nila multo Siya. Ang ilang kahadlok nakapugong kanila sa pag-ila kung kinsa ang anaa sa ilang atubangan.
Usahay mao usab kita.
Ang tubag sa atong pag-ampo mahimong moabot sa porma nga wala nato damha.
2. Ang “Come” ni Hesus usa ka tawag sa pagsalig.
Miingon si Pedro:
“Ginoo, kung Ikaw kana, sugoa ko nga moduol Kanimo ibabaw sa tubig.”
Ug mitubag si Hesus:
“Come.”
Wala Siya miingon kang Pedro, “Pedro, hulata nga mohunong una ang hangin.”
Wala usab Siya miingon, “Hulata nga malinawon na ang tubig.”
Ang Iyang gisulti mao lamang:
“Come.”
Usahay gusto nato nga tangtangon una sa Ginoo ang problema bago ta mosunod Kaniya.
“Ginoo, kung mawala na ni akong problema, mosalig ko.”
“Kung maayo na ang akong kahimtang, mosimba ko.”
“Kung klaro na ang akong kaugmaon, mosunod ko.”
Apan usahay ang Ginoo moingon:
“Ayaw hulata nga mohunong ang unos. Lakaw uban Kanako bisan naa pa ang unos.”
Mao kana ang faith—dili ang pagsalig nga walay problema, kondili ang pagsalig nga bisan naa ang problema, dili ta pasagdan sa Ginoo.
3. Nakalakaw si Pedro sa tubig samtang ang iyang mga mata naa kang Hesus.
Sa sinugdan, nakalakaw si Pedro.
Ngano? Kay kang Hesus iyang gitutokan.
Apan sa dihang iyang gitan-aw ang kusog nga hangin, nahadlok siya.
Mao kini ang usa ka dakong leksyon:
Kung atong tutokan ang problema, modako ang kahadlok.
Kung atong tutokan si Hesus, modako ang atong pagtuo.
Ang problema mahimong pareho ra gihapon.
Ang bayranan pareho ra gihapon.
Ang sitwasyon sa pamilya pareho ra gihapon.
Ang uncertainty sa kaugmaon pareho ra gihapon.
Apan lahi ang atong kasingkasing tungod kay lahi na ang atong gitan-aw.
Ayaw tugoti nga ang problema mahimong mas dako sa imong panan-aw kaysa sa Diyos nga imong gisaligan.
4. Ang labing nindot nga bahin: bisan napakyas si Pedro, wala siya pasagdi ni Hesus.
Nagsugod siya pagkalunod.
Ug unsa iyang gibuhat?
Wala siya magpakaaron-ingnon nga kaya pa niya.
Wala siya miingon, “Kaya ra nako ni.”
Misinggit siya:
“Lord, save me!”
Ug diha-diha dayon gituy-od ni Hesus ang Iyang kamot ug gigunitan siya.
Mao tingali kini ang pinakalawom nga mensahe sa Ebanghelyo:
Dili kinahanglan nga perpekto ang imong pagtuo aron luwason ka ni Hesus.
Bisan gamay ang imong faith.
Bisan nagduhaduha ka.
Bisan nahadlok ka.
Bisan napakyas ka.
Kung makasinggit ka lang:
“Ginoo, luwasa ko.”
Ang kamot ni Hesus anaa gihapon.
Mao usab ang gipasiugda ni Pope Francis: sa panahon sa atong pinakalisod ug pinakangitngit nga mga higayon, kinahanglan nato tawagon si Hesus ug dawaton Siya sa atong sakayan.
🙏 Pangutana alang sa akong kaugalingon
✅️ Unsa man ang “unos” sa akong kinabuhi karon?
Ug mas importante:
✅️ Asa nako gitutok ang akong mga mata—sa akong problema o kang Hesus?
Tingali ang Ginoo wala pa magkuha sa imong unos. Apan tingali nag-ingon Siya kanimo karon:
“Courage. It is I. Do not be afraid.”
Ayaw kahadlok. Dili man pasabot nga walay problema. Ang pasabot mao:
“Bisan unsa pa kadako sa balod, dili ka mag-inusara. Ania Ako.”
🕊️ Mubo nga pag-ampo:
Ginoong Hesus, sa mga panahon nga kusog ang hangin sa akong kinabuhi, tabangi ko nga dili motan-aw sa akong kahadlok kondili Kanimo.
Kung maluya ang akong pagtuo, lig-ona ako.
Kung magsugod ko pagkalunod, tugoti ko nga makasinggit: “Ginoo, luwasa ko!” Ug kung dili pa mawala ang unos, hatagi ako og grasya nga mosalig nga anaa Ka sa akong sakayan. Kupti ang akong kamot, Ginoo. Ug tudlui ako nga magpadayon sa paglakaw uban Kanimo bisan ibabaw sa tubig nga dili nako masabtan.
Amen. 🙏
