01/09/2026
𝗕𝗮𝗹𝗶𝘁𝗮𝗻𝗴 𝗣𝗮𝗺𝗽𝗮𝗹𝗮𝗸𝗮𝘀𝗮𝗻 | PLDT namayani sa PVL Invitational Title Defense kontra EST Cola, 3-1.
Namayagpag ang pinagsamang puwersa ng PLDT High Speed Hitters matapos bumida ang mga humuhulagpos na spikes at mala-pader na blocks kontra EST Cola mula Thailand, at igupo ang mga ito, 25-23, 25-15, 26-28, 25-14, sa ginanap na PVL Invitational Title Defense sa Smart Araneta Coliseum Agosto 31, 2026.
Hinagupit ng High Speed Hitters sa apat na set nang ipamalas ni Savi Davison ang bagsik at galing upang tuldukan ang sagupaan, matapos magtala ng 30 puntos mula sa 24 attacks, limang blocks, at isang ace, habang kumamada naman si Mika Reyes ng anim na blocks at kabuuang 16 puntos upang tulungan ang koponan na makuha ang 3-1 panalo.
“𝘐 𝘵𝘩𝘪𝘯𝘬 𝘸𝘦 𝘸𝘦𝘳𝘦 𝘶𝘯𝘱𝘳𝘦𝘱𝘢𝘳𝘦𝘥 𝘤𝘰𝘮𝘪𝘯𝘨 𝘪𝘯𝘵𝘰 𝘵𝘩𝘪𝘴 𝘨𝘢𝘮𝘦, 𝘣𝘶𝘵 𝘸𝘦 𝘬𝘯𝘦𝘸 𝘸𝘦 𝘯𝘦𝘦𝘥𝘦𝘥 𝘵𝘰 𝘢𝘥𝘢𝘱𝘵. 𝘛𝘩𝘢𝘪𝘭𝘢𝘯𝘥 𝘪𝘴 𝘢𝘭𝘸𝘢𝘺𝘴 𝘨𝘰𝘯𝘯𝘢 𝘣𝘦 𝘢 𝘴𝘵𝘳𝘰𝘯𝘨 𝘧𝘰𝘳𝘤𝘦 𝘪𝘯 𝘷𝘰𝘭𝘭𝘦𝘺𝘣𝘢𝘭𝘭, 𝘴𝘰 𝘐’𝘮 𝘱𝘳𝘦𝘵𝘵𝘺 𝘨𝘭𝘢𝘥 𝘵𝘩𝘢𝘵 𝘸𝘦 𝘸𝘦𝘳𝘦 𝘢𝘣𝘭𝘦 𝘵𝘰 𝘬𝘪𝘯𝘥 𝘰𝘧 𝘧𝘪𝘳𝘦 𝘧𝘳𝘰𝘮 𝘦𝘷𝘦𝘳𝘺 𝘢𝘯𝘨𝘭𝘦 𝘢𝘯𝘥 𝘨𝘦𝘵 𝘪𝘵 𝘥𝘰𝘯𝘦 𝘪𝘯 𝘧𝘰𝘶𝘳 𝘴𝘦𝘵𝘴,” wika ni Davison matapos ang laro.
Naglalagablab na hampas ng bola at solidong serves mula sa dalawang koponan ang bumungad sa unang set na nagresulta sa tabla, 5-5, na tila walang ibig magpadaig, ngunit ilang sandali pa lamang ay umarangkada na ang last year's MVP na si Kath Arado sa kalagitnaan ng rally upang itabla ang laro sa 12-12.
Sinabayan ito ng matinding depensa ng PLDT sa kalagitnaan ng laro upang makuha ang dalawang puntos na bentahe, 24-22, bago isang service error mula sa EST Cola ang nagsilbing huling tulak para sa mga Pinoy upang isilid ang unang set, 25-23.
Dinomina ng High Speed Hitters ang ikalawang set nang palobohin ang kanilang kalamangan sa pamamagitan ng 10-2 run upang umabante, 10-2, at nagpatuloy ang magandang laro ng PLDT matapos ikasa ang nakalilitong cross-court at off-speed hits sa gitna ng set upang itayo ang 14-7 kalamangan.
Sinubukan namang sabayan ng Thailand ang tindi ng laro ng mga Pinoy, ngunit hindi naging sapat ang kanilang depensa upang pigilan ang running attacks nina Jovy Prado at Reyes, dahilan upang tuluyang lumobo ang kalamangan ng PLDT at kunin ang ikalawang set, 25-15.
Hindi naman naging hadlang kay Aekpatchaya Kantima ang kaniyang ankle injury upang iahon ang EST Cola mula sa pagkabaon sa unang dalawang set, habang umangat ang moral ng Thailand upang maitabla ang laro sa 14-14.
Tinangka ng PLDT na panatilihin ang kanilang estratehiya, subalit bitbit ang kumpiyansa ng Thailand na makabawi, kumamada ang EST Cola ng sunod-sunod na attacks at digs upang mabuo ang dikitang rally at umabot sa 26-26 bago tuluyang sumilat ang Thailand ng set point upang maagaw ang ikatlong set, 28-26.
Pinaandar naman kaagad ni Reyes ang pangontrang spikes, kasama ang nagtutulisang line shots at off-speed hits nina Kianna Dy at Kim Fajardo, upang itayo ang 8-5 bentahe ng PLDT sa ikaapat na set.
Kaagad namang nabasa ng EST Cola ang taktika ng mga Pinoy at sinubukang hadlangan ang hangarin ng PLDT upang makalapit sa 11-12, ngunit bumomba ang mga Pinoy ng sumasadsad na spikes at double blocks mula kina Reyes at Arado upang muling lumayo, 19-12.
Baon ang hangaring tuldukan ang sagupaan, sunod-sunod na attacks at digs ang ipinamalas ng PLDT na pinangunahan ni Prado upang tuluyang payukuin ang Thailand, 25-14, at selyuhan ang 3-1 panalo at matagumpay na depensa sa PVL Invitational title.
Samantala, maglalaro muli ang PLDT High Speed Hitters kontra Nxled para sa unang all-local matchup ng Invitational Conference sa Setyembre 1, 2026.
Isinulat ni Janell Bartido
Inianyo ni RJ Dela Cruz
