Ang Naguenian, Naga City (2025)

25/07/2025

𝐏𝐚𝐦𝐚𝐦𝐚𝐡𝐚𝐲𝐚𝐠 𝐧𝐚 𝐌𝐚𝐥𝐚𝐲𝐚 𝐚𝐭 𝐌𝐚𝐩𝐚𝐠𝐩𝐚𝐥𝐚𝐲𝐚

Namumulat, nakikinig, at nagpapahayag—ang isang mamamahayag ay hindi lamang simpleng tagapaghatid ng balita, bagkus isang mamamayang marunong makiramdam, kumilatis, at magpalaganap ng katotohanan.

Sa parehong larangan, hindi nalalayo ang gampanin ng mga pahayagang pangkampus. Bawat boses ng kabataan ay bumubuo sa isang bansang katotohanan ang namamayagpag. Subalit, tulad ng mga propesyonal na mamamahayag, hindi rin nakakatakas ang mga kabataang mamamahayag sa tanikalang pumipigil sa pagkamit ng malayang pamamahayag.

Gayunpaman, ang alab ng katotohanang bumabalot sa bawat kabataang mamamahayag ang siyang dapat tumupok sa katiwalian at paninikil ng kasinungalingan. Kaya naman, ngayong araw, sa pagdiriwang ng National Campus Press Freedom Day na pinagtibay ng Republic Act 11440 upang itaguyod, protektahan, at pangalagaan ang karapatan sa kalayaan sa pamamahayag, ating igunita at alalahanin ang pinaglalaban ng bawat kabataang mamamahayag—ang tunay na pagkamit sa malayang pamamahayag.

Mag-usisa, magsulat, at magbalita. Ang tanikala ng pagpapatahimik at pang-aapi ay dapat nang putulin at ang karapatan ng bawat mamamahayag ay dapat kilalanin. Patuloy na lumaban, tumindig, at makiisa nang sa gayon ay ating makamtan ang pamamahayag na mapagpalaya.

Mabuhay ang kabataang tagapagtaguyod ng malayang pamamahayag!

24/07/2025

𝐖𝐀𝐋𝐀𝐍𝐆 𝐏𝐀𝐒𝐎𝐊 | Ayon sa anunsiyo ni Department of the Interior and Local Government (DILG) Secretary Jonvic Remulla, suspendido pa rin ang klase sa lahat ng antas ng paaralan sa buong Camarines Sur bukas, Hulyo 25, bunsod ng epekto ng Habagat at Bagyong Emong.

Dagdag pa rito, kanselado rin ang trabaho sa mga tanggapan ng pamahalaan, maliban sa mga frontline personnel at ilang ahensyang nagpapatupad ng hybrid work setup, alinsunod sa patakaran ng kani-kanilang tanggapan.

Ayon kay Mayor Leni Robredo, magpapatuloy sa Lungsod Naga bukas ang trabaho sa tanggapan ng pamahalaan na may kinalaman sa kalusugan, civil registry, social welfare, disaster response, public safety, at iba pang kinakailangang gawaing administratibo.

23/07/2025

𝐏𝐚𝐧𝐮𝐧𝐮𝐦𝐛𝐚𝐥𝐢𝐤 𝐧𝐠 𝐊𝐚𝐦𝐚𝐨𝐧𝐠 𝐌𝐚𝐛𝐚𝐠𝐬𝐢𝐤

𝐾𝑎𝑙𝑎𝑏𝑎𝑤 𝑙𝑎𝑛𝑔 𝑎𝑛𝑔 𝑡𝑢𝑚𝑎𝑡𝑎𝑛𝑑𝑎.

Sa kabila ng paglipas ng mga taon, muling pinatunayan ni Manny “Pacman” Pacquiao na hindi hadlang ang edad sa puso at determinasyon ng isang tunay na kampeon.

Nitong Hulyo 20, sa harap ng libo-libong manonood sa MGM Grand Garden Arena, Las Vegas, USA, muling umakyat sa bakbakan si Pacquiao upang harapin ang mas batang si Mario Barrios para sa WBC Welterweight Championship — isang labanang puno ng tensiyon, bilis, at palitan ng mabibigat na suntok, na nagtapos sa isang majority draw.

Labing-anim na taon man ang pagitan ng kanilang edad, 46 taong gulang si Pacquiao habang 30 anyos si Barrios, ngunit hindi ito naging hadlang sa ipinakitang tikas at husay ng Pambansang Kamao. Buo ang kaniyang footwork, malakas ang katawan, at nananatili ang talas ng kaniyang mga bitaw na waring muling ibinalik ang kaniyang kabataan.

"His stamina, he can still crack. Strong as hell. And his timing ruins everything. He’s still a very awkward fighter,” pahayag ni Barrios.

“The plan was to make him feel old, but Manny has good legs,” dagdag pa niya.

Sa unang bahagi ng laban ay agad na bumungad ang bilis ni Pacquiao — kombinasyon ng maliksi at agresibong galaw. Samantala, sinikap ni Barrios na kontrolin ang laban sa pamamagitan ng kaniyang jab upang mapanatili ang distansiya ni Pacquiao.

Pagsapit ng championship rounds, hindi bumitaw si Pacquiao. Patuloy ang kaniyang pagbitiw ng mabibigat na hook at jab, patunay na kahit sa edad na 46 ay mayroon pa siyang sapat na lakas para makipagsabayan sa mas batang boksingero.

Batay sa opisyal na tala, pumukol si Pacquiao ng kabuoang 577 suntok, kung saan 110 ang tumama, habang nagpakawala naman si Barrios ng 658 suntok, ngunit 120 lamang ang tumama.

Isang hurado ang nagbigay ng 115-113 pabor kay Barrios, habang ang dalawa ay nagtala ng 114-114 na naging dahilan ng majority draw.

“It was a close fight. My opponent was very tough. It was a wonderful fight,” pahayag ni Pacquiao matapos ang sagupaan.

Sa pagtatapos ng mainit na bakbakan, muling pinatunayan ni Manny Pacquiao na ang apoy ng isang tunay na kampeon ay hindi kailanman namamatay, kahit pa sa harap ng lumalaking hamon ng panahon at mga kabataang kalaban.

Tunay ngang ang kasabihang “Kalabaw lang ang tumatanda” ay hindi senyales ng paghina, kundi isang paalala na ang tapang, disiplina, at dedikasyon ay hindi nasusukat sa edad.

23/07/2025

𝐖𝐀𝐋𝐀𝐍𝐆 𝐏𝐀𝐒𝐎𝐊 | Batay sa inilabas na abiso mula sa Department of the Interior and Local Government (DILG), mananatiling suspendido ang pasok sa lahat ng antas ng paaralan at trabaho sa gobyerno sa buong Camarines Sur bukas, Hulyo 24, dahil sa inaasahang pananalasa ng Tropical Storm Emong.

Samantala, kinumpirma naman ni Mayor Leni Robredo na sakop ng nasabing suspensyon ang Lungsod Naga.

22/07/2025

𝐖𝐀𝐋𝐀𝐍𝐆 𝐏𝐀𝐒𝐎𝐊 | Alinsunod sa Memorandum Circular No. 90 na ipinalabas ng Malacañang, suspendido ang pasok sa lahat ng antas ng paaralan maging sa mga ahensiya ng gobyerno sa 37 lugar, kasama ang Camarines Sur, bukas, Hulyo 23.

Kasunod nito, nagpalabas din ng abiso si Mayor Leni Robredo na kabilang ang Lungsod Naga sa suspensiyon bunsod ng malakas na buhos ng ulan dala ng Habagat.

18/07/2025

𝐒𝐢𝐦𝐛𝐨𝐥𝐨𝐧𝐠 𝐌𝐚𝐲 𝐌𝐞𝐧𝐬𝐚𝐡𝐞

Sa modernong panahon kung saan patuloy na umuusbong ang teknolohiya at social media, mas lumalawak din ang modernong komunikasyon. Kasabay ng pagpapahayag natin ng ating mga naiisip at nadarama gamit ang mga letra sa digital na mundo, gumagamit rin tayo ng mga simbolo na kumakatawan sa mga ito— ang mga emoji.

Ang ‘emoji’ ay mula sa salitang hapon na “e” larawan at "moji" naman bilang karakter. Ang mga ito ay grupo ng mga digital na imahe o standardized na mga larawang kumakatawan sa mga ekspresyon ng mukha ng tao, iba't ibang mga hayop, bagay, pagkain, isports at marami pang iba.

Tuwing Hulyo 17, taon-taon ay ipinagdiriwang ang World Emoji Day simula 2014 sa pangunguna ni Jeremy Burge, tagapagagtatag ng emojipedia. Ito ang napiling petsa dahil ito ang araw na ipinakita sa Apple’s IOS bagama’t orihinal itong dinisenyo ni Shigetaka Kurita noong 1999 habang nagtatrabaho sa kumpanya ng telekomunikasyon na NTT DoCoMo sa Japan.

Ang unang set ng emoji ay binubuo lamang ng 176 karakter ngunit sa paglawak ng paggamit nito, at bunga na rin ng patuloy na pag-unlad ng teknolohiya, patuloy itong nadaragdagan lalo pa’t napabilang na ito sa Unicode system ng mundo sa tulong ng Unicode Consortium. Mula sa mahigit isandaang emoji, ito ay umabot na ng 3, 790 sa kasalukuyan ayon sa tala ng Unicode System noong 2024.

Sa araw-araw nating pakikipag-usap sa social media, naging bahagi na ng pagpapahayag natin ang mga emoji upang ipakita ang ating tunay na emosyon o kaya reaksiyon hinggil sa isang bagay. May mga pagkakataon rin na hindi natin alam kung ano ang sasabihin sa pamamagitan ng mga salita kaya’t dinaraan na lang natin sa paggamit nito. Bagama’t mga simbolo lamang kung iisipin, ngunit tila isang mahika kung paano ito nakatutulong upang maipahayag ang mensaheng nais nating iparating. Ang mga ito ang nagsisilbing biswal na representasyon ng ating mga damdamin at saloobin— tuwa, galak, pagkamangha, galit, pagkabigo, pagtangis, at ilan pang hindi kayang idaan sa letra’t mga salita.

Sa digital na komunikasyon kung saan nais natin ipahayag ang ating mga nadarama at naiisip maliban sa paggamit ng mga letra at salita, ang emoji ay isang bagong anyo ng wika na may malalim na mensaheng nais iparating sa likod ng mga simbolo. Sa mga panahong tila ang mga nais nating sabihin ay mahirap ipaliwanang sa mahabang pangungusap, minsan o madalas pa nga, ang paggamit ng emoji ay sapat na upang ipaunawa ang tunay na nilalaman ng ating puso’t isip. Hindi lamang ito basta simbolo, kundi isang mensahe.

17/07/2025

𝐖𝐀𝐋𝐀𝐍𝐆 𝐏𝐀𝐒𝐎𝐊 | Batay sa anunsiyo ni Mayor Leni Robredo, suspendido pa rin ang klase sa lahat ng antas sa mga pampubliko at pribadong paaralan sa Lungsod Naga ngayong araw, Hulyo 18.

08/07/2025

𝐒𝐚𝐲𝐚𝐧𝐬 𝐒𝐚𝐲𝐬: 𝐀𝐧𝐨𝐧𝐠 𝐎𝐑𝐆𝐀𝐍𝐈-𝐒𝐂𝐈-𝐓𝐈𝐎𝐍 𝐤𝐚?

Muling naghatid ng kasiyahan at nagpakitang-gilas ang 21 organisasyon na kabilang sa ikaanim na taon ng ORGANI-SCI-TION sa Naga City Science High School nitong Hulyo 3 at 4.

Dala ang kanilang talento, nakipagsapalaran ang bawat Naguenian na may hangaring mas mapalago pa ang kanilang kakayahan at mapatunayan na hindi lamang sa akademiko maipapamalas ang natatangi nilang kasanayan.

Ikaw? Anong club ang tumatak sayo? Ibahagi mo ito sa comment section!

Report by Fenny Rose Adorna
Edited by Hans Elopre
Production Team: Brianna Rheese Ascano, Nathaniel Caden, Jan Grace Caceres

06/07/2025

𝐌𝐚𝐥𝐮𝐠𝐨𝐝 𝐧𝐚 𝐩𝐚𝐠𝐛𝐚𝐭𝐢, 𝐦𝐠𝐚 𝐛𝐚𝐠𝐨𝐧𝐠 𝐦𝐚𝐦𝐚𝐦𝐚𝐡𝐚𝐲𝐚𝐠 𝐧𝐠 𝐀𝐧𝐠 𝐍𝐚𝐠𝐮𝐞𝐧𝐢𝐚𝐧!

Ikinagagalak ng Ang Naguenian na batiin ang mga bagong kasapi ng publikasyon na matagumpay na pumasa sa GEARING UP: Naguenian Recruitment Part 2.

Bilang opisyal na bahagi ng publikasyon, nawa’y patuloy na mag-alab at hindi kumupas ang tinta ng inyong panulat sa pagtatanggol ng katotohanan.

Patuloy kayong magsilbing inspirasyon sa masa bilang tapat na tagapag-ulat at tagapagmulat sa mga nangyayari sa lipunan.

Muli, pagbati sa lahat!

Pubmat ni Allysa Reforsado

05/07/2025

𝐓𝐈𝐍𝐆𝐍𝐀𝐍 | Ipinagpatuloy ang huling bahagi ng interbyu ng Naguenian Recruitment para sa mga magiging bagong miyembro ng publikasyon, kahapon, Hulyo 4.
‎
‎Nakatakdang ilabas ang resulta ng mga pumasang aplikante sa darating na Hulyo 6.

Mga Salita ni Bianca Gonzaga
Mga Litrato nina Jara Cañete at Hermione Tria

03/07/2025

𝐓𝐈𝐍𝐆𝐍𝐀𝐍 | Upang mas makilala ang mga magiging bagong miyembro ng publikasyon, sinimulan na ang interbyu para sa mga nakapasa sa unang bahagi ng Naguenian Recruitment nitong Hulyo 2.
‎
Samantala, inilipat ang huling araw ng panayam sa Hulyo 4 mula 4:00PM hanggang 6:00PM sa Senior High School Building 2, Room 34, kaugnay ng pansamantalang paglipat sa distance learning modality sa hapon.

Mga Salita ni Bianca Gonzaga
Mga Litrato nina Alieyah Alilano at Khristoffe Camalla

01/07/2025

𝐃𝐞𝐩𝐄𝐝 𝐍𝐚𝐠𝐚 𝐢𝐩𝐢𝐧𝐚𝐠𝐝𝐢𝐰𝐚𝐧𝐠 𝐈𝐤𝐚-𝟓𝟎 𝐀𝐧𝐢𝐛𝐞𝐫𝐬𝐚𝐫𝐲𝐨

Sa kabila ng maulang panahon, masiglang sinalubong ng mga kawani ng Kagawaran ng Edukasyon (DepEd) ang ika-50 Anibersaryo ng DepEd Naga sa Camarines Sur National High School (CSNHS) Liboton Campus nitong Hunyo 29.

Sinimulan ang selebrasyon sa isang makulay na foot parade mula sa CSNHS Main Campus patungong Liboton Campus, bilang simbolo ng mahabang paglalakbay ng DepEd Naga sa loob ng 50 taong paglilingkod.

Sinundan ito ng pormal na pagbubukas ng programa at mensahe mula kay Schools Division Superintendent Susan S. Collano, CESO V.

Ayon kay Collano, kahit ipinagpaliban ang selebrasyon noong nakaraang taon, nanatili ang hangaring balikan at bigyang-halaga ang mahalagang yugto ng pagkakatatag ng DepEd Naga.

“It is our duty to look back to the years kung saan sinimulan ang DepEd Naga City—to show you and articulate how—we again give meaning and value to what we have today, as we are celebrating a special milestone,” aniya.

Matapos ang mensahe, agad sinimulan ang Mardi Gras Competition kung saan ipinamalas ng teaching at non-teaching personnel mula sa iba’t ibang distrito ng lungsod ang kanilang galing sa pagsayaw, kasuotan, at diwang sumasalamin sa kasaysayan at bisyon ng DepEd Naga.

Itinanghal na kampeon ang Naga North District 3, sinundan ng Naga South District 1 bilang 1st runner-up, Naga East District 2 bilang 2nd runner-up, Naga West District 2 bilang 3rd runner-up, at nagtapos bilang 4th runner-up ang Naga West District 1 at Naga North District 1.

Samantala, binigyang-diin naman ni Alicia Naag, Head Teacher ng Naga City Science High School (NCSHS) ang aktibong partisipasyon ng mga g**o at mag-aaral, gayundin ang hangarin na mas marami pang makikibahagi sa mga susunod na taon.

“Medyo maulan pero it was very colorful, very successful, and well-participated. Inaasahan namin na sa mga susunod pang mga pagdiriwang ay sana mas marami pang sumali at lahat ng teacher ay makiisa para maging mas makulay,” ani Naag.

Nagtapos ang pagdiriwang sa isang matagumpay na pagbabalik-tanaw sa 50 taong dedikasyon ng mga kawani ng kagawaran sa paghahatid ng dekalidad na edukasyon sa Lungsod Naga.

Mga Salita ni Julia Bianca Avellana
Mga Litrato ni Joel Jr. Reginales

Ang Naguenian

25/07/2025

24/07/2025

23/07/2025

23/07/2025

22/07/2025

18/07/2025

17/07/2025

08/07/2025

06/07/2025

05/07/2025

03/07/2025

01/07/2025

Address

Website

Alerts

Shortcuts

Share

Category