15/09/2025
‘ALL IS ALREADY COORDINATED’ Ini an pigtaong asigurasyon ni LTJG Kenny Villafuerte kan Philippine Coast Guard asin namamayo kan Joint Task Group Fluvial sa piggibong final coordination meeting kan Lunes, Setyembre 15.
Segun sa commander kan Coast Guard Station sa Camarines Sur, haman na an deployment plan na magkatuwang na piggibo kan Security Cluster kan Naga City Police Office asin PCG para sa nakatalaan na fluvial procession sa Setyembre 20, alas 3:00 nin hapon.
Sinabi ni Villafuerte na igwa pa sindang ipinagtalaan na final operational briefing sa Byernes tanganing syertuhon an organisado asin magayon na pagbosol kan relehiyosong aktibidad sa Sabado.
Laen kan augmentation force kan Philippine National Police, sinabi ni Villafuerte na ginatos man na dagdag-pwersa an ipapadara kan PCG hali sa syudad kan Legazpi pasirng sa syudad nin Naga tanganing masyerto an sefguridad asin pagiging salbado kan lambang maayon sa fluvial procession.
Sa ibong na lado, sinabi ni Dr. Mario Joey Blasco kan Medical and Health Cluster na pigpapamayuhan ni Dr. Ronnie Amoranto, na haman na man an saindang deployment plan dapit sa pagwarak nin sobra sa 30 na mga ambulansya pu-on sa Naga Metropolitan Cathedral sagkod sa Danlugan.
Sinabi pa kan doktor na magin sa mga approaches kan tulay, igwa nin ambulansya sa tig-ibong na parte kan tulay kan Tabuco, Panganiban, Colgante, asin Magsaysay.
Sa Basilica, sobra sa 50 na mga volunteers kan Philippine Red Cross an nakaantabay sa kamawotan na matawan tolos nin pangenot na medical assistance an mangangaipuhan kaini. An PRC igwa nin maabot sa 600 na volunteers sa gigibohon na fluvial procwssion ngonian na taon laen pa kan mga volunteers gikan sa ibang grupo siring kan Gryphon Bicol Region 5.
Liwat na pigpagiromdom kan coast guard commander na kaipuhan otobon kan lambang saro an guidelines na nagbabawal sa siisay man na bu-ot magpartisipar sa fluvial procession na impluwensyado kan espiritu nin arak o igwa nin balon na nakakaburat na inumon.
Higot na pigbabawal man an paggamit, pag display, o pagwagayway nin ano man na bagay na igwa nin nakasurat na pangaran nin pulitiko o political party. Asin orog sa gabos ipinapangalad na gayo an pagdara nin armas siring kan patarom o badil.
Pig-abisuhan man ni Villafuerte an masarakay sa baroto na magsulot nin life jackets asin syertuhon an sadiring kaligtasan. | via Jason Neola
