01/08/2025
"Sayaw na Walang Tugma"
Paano ko iibigin ang di naging akin,
Isang multo sa silid na walang alaala’t lambing,
Walang kamay na hinawakan, walang halik na dumampi,
Ngunit bakit ikaw pa rin ang laging humahapdi,
Walang pangakong binitawan, walang sumpang nasira,
Walang alaala ngunit puso’y may kirot pa rin pala,
Sa mga panaginip lang kita nilikha’t minahal,
Paano ko kakalimutan ang di naging akin kailanman,
Ngumiti ka na tila tadhana ang may gawa,
Habang ako’y naiwan sa aninong di makatawid sa pag-ibig na tila bula,
Isinulat kita sa pahinang di ko nasambit,
Isang pusong hiniram mo pero kailanma’y di mo inangkin,
Bawat halakhak na di ko narinig mula sa’yo,
Bawat sulyap na ninakaw ko kahit di mo ito ginusto,
Isang pag-ibig na sigaw ngunit sa katahimikan nakatago,
Paano ko kakalimutan ang sa isip ko lang nabuo,
Di ka naging masama, ni ako’y bulag sa totoo,
Sumayaw lang tayo sa saliw na di tugma ang tugtugin at tempo,
Ngunit ang bigat ng pagkawala mo’y tila paalala’t tanong,
(Paano ko iibigin ang di naging akin?)
-DaVinciQuotes
