Romblon Sun Online

12/08/2026

11/08/2026

Motorsiklo bumangga sa kongkretong barrier, drayber at angkas tumilapon, patay

CALATRAVA, Romblon – Hindi na umabot ng buhay sa ospital ang drayber at babaeng angkas ng motorsiklo na bumangga sa concrete barrier at nahulog sa seawall pasado 11:00 ng gabi ng Agosto 9 sa Barangay San Roque, Calatrava, Romblon.

Base sa ulat ng Calatrava Municipal Police Station, sakay ng kulay itim na motorsiklong ICON 110 Mitsukoshi ang dalawa na minamaneho ng lalaki na hindi pa batid ang pangalan kasama ang angkas nito na siyang may-ari ng motorsiklo at residente ng Barangay Pangulo, Calatrava, Romblon.

Binabaybay umano ng mga biktima ang national road galing ng bayan ng San Agustin, Romblon patungo sa direksyon ng San Andres.

Pagsapit sa kurbadang bahagi ng kalsada malapit sa Fetalino Malayo Elementary School, ay nawalan umano ng kontrol sa motorsiklo ang drayber dahil sa bilis ng pagpapatakbo nito at diretsong bumangga sa concrete barrier sa gilid ng kalsada ang sasakyan.

Sa lakas ng pagkasalpok sa kongkretong barrier ay tumilapon ang dalawa at bumagsak sa sementadong causeway.

Nagtamo ng malubhang tama sa iba’t-ibang bahagi ng katawan ang dalawa na agad na isinugod sa San Andres Municipal Hospital para malapatan ng kaukulang lunas.

Sa kasawiang palad, dineklarang “dead on arrival” (DOA) ng sumuring doctor ang dalawang biktima.

Patuloy pang iniimbestigahan ng kapulisan ang naturang pangyayari.

Ang sangkot na motorsiklo sa aksidente ay isinailalim sa kustodiya ng Calatrava MPS. (RSun Staff)

03/08/2026

MARKET DAY
Ganito ang eksena na makikita mo tuwing Market Day lalo na sa umaga ng Linggo sa
Odiongan Public Market, Odiongan, Romblon.
Tara, ikot tayo.

29/07/2026

BAGONG TALA: KING COBRA (Ophiophagus sp.),
NA-KUMPIRMA SA TABLAS ISLAND; PUBLIKO,
PINAG-IINGAT!

ODIONGAN, ROMBLON — Opisyal nang nakumpirma ang kauna-unahang pormal na tala ng King Cobra (Ophiophagus sp.) sa Tablas Island.

Bagaman mayroong nakaraang tala ng uri ng ahas na ito sa Romblon Island noong 2013, ito ang kauna-unahang pagkakataon na nakumpirma ang pag-iral nito sa Isla ng Tablas.

Ang pagtiyak ay isinagawa matapos suriin ang ahas na nahuli noong Hulyo 21, 2026 sa Sitio Siok, Brgy. Libertad, Odiongan. Sa pagtutulungan nina G. Jimmy “Jimboy” Uy Tan, LGU Odiongan-MENRO Raymund G. Inocencio, at ng Herpetologist na si G. Emerson Y. Sy, nakumpirma na ito ay isang King Cobra dahil sa kapansin-pansing occipital scale sa ulo nito.

Palaalalang Pang-agham (Scientific Note):

Ginagamit sa kasalukuyan ang scientific name na Ophiophagus sp. para sa mga natatagpuan sa Tablas at Romblon sapagkat pinag-aaralan pa ang eksaktong species nito. Ang dating katawagang Ophiophagus hannah ay itinuturing nang lumang pangalan sa kasalukuyang klasipikasyon.

⚠️ UMIIRAL NA PAALALA AT BABALA SA PUBLIKO
MAHALAGANG PAALALA MULA KAY G. EMERSON Y. SY
• Panahon ng Pagpisa (Hulyo): Ngayong buwan ng Hulyo nagpipisaan ang mga itlog ng King Cobra.
• Iba ang Hitsura: Magkaiba ang kulay at padron (pattern) ng baby King Cobra kumpara sa adult—kaya madalas silang mapagkamalang ibang uri ng ahas.
• Makamandag Kahit Maliit: Kahit bagong pisa pa lamang (hatchlings), taglay na ng mga ito ang nakamamatay na kamandag.

⛔BABALA: Huwag na huwag lalapitan, hahawakan, o titingnan nang malapitan ang mga pisa na ahas o ang mga natagpuang shell ng itlog. Agad itong ipagbigay-alam sa inyong Barangay Office o sa MENRO.

28/07/2026

Governor Trina Firmalo-Fabic tutol sa pagmimina sa Sibuyan

ROMBLON GOVERNOR TRINA FIRMALO-FABIC TUTOL SA MINING SA SIBUYAN, NANAWAGAN NG PAGPROTEKTA SA KALIKASAN

Mariing ipinahayag ni Romblon Governor Trina Firmalo-Fabic ang kanyang pagtutol sa pagmimina sa Sibuyan, kasunod ng pag-apruba ng Sangguniang Bayan ng San Fernando sa resolusyong nag-eendorso sa aplikasyon ng Altai Philippines Mining Corporation (APMC).

Ayon kay Gov. Trina, bagama't ang naturang endorsement ay bahagi pa lamang ng proseso at hindi pa pinal na pag-apruba sa proyekto, hindi ito dapat minamadali at kailangang dumaan sa masusing pagsusuri at tunay na konsultasyon sa mga mamamayan.

Binigyang-diin ng gobernador na ang natatanging biodiversity at ecological significance ng Sibuyan ay hindi maaaring ipagsapalaran kapalit ng isang proyektong maaaring magdulot ng pangmatagalang pinsala sa kalikasan at kabuhayan ng mga Romblomanon.

"Ang tunay na kaunlaran ay hindi nasusukat lang sa dami ng mga proyektong naipatutupad, kundi sa kakayahan nating tiyakin na ang pag-unlad ay hindi isinasakripisyo ang kalikasan na siyang pinagmumulan ng buhay at kabuhayan ng ating mga mamamayan," pahayag ng gobernador.

Muling iginiit ni Gov. Trina na nananatiling matatag ang kanyang paninindigan laban sa pagmimina sa Sibuyan at patuloy na isusulong ng pamahalaang panlalawigan ang mga polisiya at desisyong inuuna ang pangangalaga sa kalikasan at ang pangmatagalang kapakanan ng bawat Romblomanon.

"Ang pag-unlad ng Romblon ay dapat laging kaagapay ng pangangalaga sa ating kalikasan," dagdag ng gobernador.

26/07/2026

Isang Prayer Rally ang isinagawa ngayon hapon, Hulyo 26 sa Odiongan, Romblon sa pangunguna ng Iglesia Filipina Independiente (IFI) bilang pakikiisa sa laban sa pagmimina sa isla ng Sibuyan sa lalawigan ng Romblon.

Ito ay nilahukan ng mga miyembro ng IFI, mga kabataan, at mga concerned citizens.

Ang kanilang sigaw, "No to Mining in Sibuyan, Ipamana, 'wag ipamina!"

25/07/2026

Lalaki arestado sa buy-bust operation ng ilegal na droga sa Odiongan, Romblon

ODIONGAN, Romblon - Diretso sa kulungan ang isang 36 anyos na lalaki matapos itong arestuhin ng kapulisan sa matagumpay na buy-bust operation laban sa ilegal na droga kaninang 3:40 ng hapon, Hulyo 25, 2026 sa Barangay Dapawan, Odiongan, Romblon.

Ang suspek ay kinilala na 36 taong gulang, may-asawa, walang trabaho, at residente ng Barangay Liwanag, Odiongan, Romblon.

Sa ulat ng Odiongan Municipal Police Station, isang pinagsamang buy-bust operation ang ikinasa laban sa ilegal na droga sa pangunguna ng Municipal Drug Enforcement Unit (MDEU) - Odiongan MPS katuwang ang RPMFC at PDEA Romblon PO sa koordinasyon ng PDEA MIMAROPA na nagresulta sa pagkahuli sa suspek.

Isang tauhan ng Odiongan MPS - MDEU ang nagpanggap na poseur buyer ang nakabili sa suspek ng isang pirasong sachet na naglalaman ng pinaghihinalaang ilegal ng droga kapalit ang halagang isang libong piso (P1,000.00) na "marked money".

Nakumpiska rin sa suspek ang tatlo pang piraso ng sachet na pinaghihinalaang "shabu", pera na ginamit sa buy-bust, coin purse, isang rolyo ng aluminum foil, lighter, kaha ng sigarilyo, at isang motorsiklong Rusi.

Ang pag imbentaryo, pagkuha ng mga ebidensya at pagmarka ay isinagawa sa naturang lugar, sa harap ng suspek at sinaksihan ng isang halal na opisyal ng Barangay Dapawan, Odiongan, Romblon at kinatawan mula sa media.

Tinatayang may bigat na humigit kumulang sa 1.2 grams ang nakuhang ilegal na droga sa suspek na nagkahahalaga ng P8,160.00.

Ang suspek at ang nakuhang ilegal na droga ay dadalhin sa Romblon Provincial Crime Laboratory Office para sa isagawang pagsusuri.

Isinailalim sa kustodiya ng ng Odiongan MPS ang lalaking suspek.

Kasong paglabag sa Section 5 and 11 Article II of RA 9165 (The Comprehensive Dangerous Drugs Act of 2002) ang inihahandang isampa ng Odiongan MPS sa Tanggapan ng Piskalya sa Odiongan, Romblon laban sa suspek. (RSun Staff)

25/07/2026

Lalaki arestado sa buy-bust operation laban sa ilegal na droga sa Odiongan, Romblon

Kulong ang 36 taong gulang na lalaki matapos mabilhan ng ilegal na droga sa ikinasang buy-bust operation laban sa ilegal na droga kaninang 3:40 ng hapon. Hulyo 25, sa Brgy Dapawan, Odiongan, Romblon.

Sa ulat ng Odiongan MPS, naging matagumpay ang ikinasang buy-bust operation ng mga tauhan ng MDEU- Odiongan MPS katuwang ang Romblon PMFC at PDEA Romblon sa koordinasyon ng PDEA MIMAROPA na nagresulta sa pagkahuli sa suspek.

Nakumpiska rin sa suspek ang tatlo pang piraso ng sachet na naglalaman ng pinaghihinalaang ilegal na droga, isang libong piso na ginamit sa buy-bust, aluminum foil, lighter, coin purse, kaha ng sigarilyo at motorsiklong Rusi.

Nahaharap ang suspek sa paglabag sa Section 5 and 11, Article II of RA 9165.

23/07/2026

Binata na nakahiga sa duyan at naglalaro ng Mobile Legends, binaril

SANTA FE, Romblon – Sugatan na dinala sa pagamutan ang isang 30 gulang na lalaki matapos itong pagbabarilin ng hindi pa nakikilalang gunman na sakay ng motorsiklo bandang 11:10 ng gabi, Hulyo 22, 2026 sa Sitio Guinda, Barangay Pandan, Santa Fe, Romblon.

Base sa ulat ng Santa Fe Municipal Police Station, nakahiga umano sa duyan ang binatang biktima habang naglalaro ng Mobile Legends sa kanyang cellphone nang huminto sa tapat ng kanilang bahay sa nasabing barangay ang isang kulay asul na motorsiklong XRM 125 sakay ang dalawang hindi nakikilalang lalaki.

Isa sa dalawang lalaki ang tatlong ulit na pinaputukan ng baril ang biktima gamit ang hindi pa tukoy na kalibre ng baril sa hindi malamang dahilan.

Pagkatapos ng pamamaril ay tumakas ang mga suspek sakay ng motorsiklo papunta sa direksyon ng Sitio Centro, Barangay Pandan, Santa Fe, Romblon.

Nagtamo ng mga tama ng baril ang biktima na isinugod sa Rural Health Unit ng Santa Fe para sa paunang lunas at dinala sa Romblon Provincial Hospital sakay ng ambulansiya ng Santa Fe LGU.

Agad na nagsagawa ng imbestigasyon ang mga tauhan ng Santa Fe MPS sa lugar ng krimen.

At ikinasa ang hot-pursuit operation para matukoy, makilala at maaresto ang suspek. (RSun Staff)

23/07/2026

Lalaki, pinasok at sinaksak sa loob ng kuwarto ng kanyang bayaw na matadero sa Odiongan, Romblon

ODIONGAN, Romblon – Nahaharap sa kasong Frustrated Homicide ang isang matadero matapos nitong pasukin at pagsasaksakin sa loob ng kuwarto ang kanyang bayaw dakong 8:00 ng gabi ng Hulyo 22, 2026 sa Sitio Tabingdagat, Barangay Panique, Odiongan, Romblon.

Kinilala ang biktima na isang 27 taong gulang, may kinakasama, construction worker, habang ang suspek ay 33 taong gulang, may kinakasama, matadero sa palengke ng Odiongan, Romblon at kapwa nakatira sa iisang bahay sa nasabing barangay.

Base sa imbestigasyon ng Odiongan Municipal Police Station (OMPS), ang suspek at ang kinakasama nito ay nagtatalo umano sa loob ng kanilang kuwarto. Sinaway naman ito ng babaeng biyenan ng suspek at sinabihan silang tumigil na sa kanilang argumento at magpahinga.

Binato umano ng suspek ng unan ang electric fan, at dahilan para pagsabihan ito ng biyenan na sinisira nito ang mga kagamitan sa bahay.

Tinanong ng suspek ang kanyang biyenan kung bakit hindi rin daw nito pinagsasabihan ang biktima tuwing sumasagot ito sa kanya.

Lumabas umano ang suspek at kumuha ng kutsilyo.

Narinig naman ng biktima ang sagutan ng suspek at biyenan nito, at nagsalita ito kung bakit siya napasali sa kanilang usapan.

Nagkaroon ng komprontasyon sa pagitan ng suspek at biktima hanggang sa humantong ito sa mainit na pagtatalo.

Pinasok ng suspek ang kuwarto ng biktima at pinagsasaksak ito ng ilang ulit. Nagtamo ng mga sugat sa iba’t-ibang bahagi ng katawan ang biktima.

Inawat naman ang suspek ng kanyang kinakasama at ng kanyang biyenan, habang ang biktima ay isinugod sa Romblon Provincial Hospital ng nagrespondeng mga tauhan ng MDRRMO Odiongan.

Samantala, ang suspek ay inaresto ng mga nagrespondeng tauhan ng Odiongan MPS at dinala sa kanilang himpilan.

Ang kutsilyo na ginamit sa pananaksak ay narekober ilang metro ang layo sa pinangyarihan ng krimen at kasamang kinustodiya ng Odiongan MPS.

Kasong Frustrated Homicide ang inihahandang isampa ng Odiongan MPS sa Piskalya laban sa suspek sa pamamagitan ng inquest proceedings. (RSun Staff)