08/08/2026
πππ©πππ’π£ππ‘π π¦π§π’π₯π¬ | Dating pulis, arestado matapos umanong barilin ang mag-asawa sa Olongapo
BASAHIN: Isang dating pulis ang naaresto matapos umanong pagbabarilin ang isang mag-asawa sa harap mismo ng kanilang tahanan sa Barangay Old Cabalan, Olongapo City, nitong Biyernes ng gabi, Agosto 7.
Batay sa pinakahuling ulat ng pulisya, kinilala lamang sa alyas na βJerry,β 41-anyos, ang suspek na sinasabing dating dismissed police officer. Naaresto siya matapos mapigilan ng mga residente at mga kaanak ng mga biktima bago pa man tuluyang makatakas sa lugar.
Naganap ang insidente dakong 8:15 ng gabi sa Mulawin Lane, Purok 12, Barangay Old Cabalan.
Ayon sa paunang imbestigasyon ng Police Station 4 ng Olongapo City Police Office, kabababa lamang umano ng sasakyan ng 52-anyos na si βDennisβ upang alisin ang parking sign sa harap ng kanilang gate nang biglang lumapit ang suspek na armado ng baril.
Agad umano itong nagpaputok at tinamaan si Dennis sa kaliwang bahagi ng tiyan.
Muli umanong nagpaputok ang suspek, sa pagkakataong ito ay patungo sa asawa ni Dennis na si βRowena,β 54-anyos, na noo'y nasa passenger seat ng sasakyan. Nakapagduck umano ang biktima kaya minor injury lamang sa ulo ang kanyang tinamo.
Sa gitna ng insidente, napigilan umano ang suspek sa tulong ng mga taong nasa lugar, kabilang ang dalawang anak ng mag-asawa na sina βCharsβ at βMatt.β Dumating din sa lugar ang mga miyembro ng Barangay Peacekeeping Action Team (BPAT) at mga tauhan ng PNP na tuluyang umaresto sa suspek.
Narekober mula sa suspek ang dalawang baril, kabilang ang isang caliber 9mm Luger at isang caliber 9mm Daewoo, na kapwa isinailalim sa kaukulang proseso ng imbestigasyon.
Samantala, isinugod sa Baypointe Medical Center sa Subic Bay Freeport Zone si Dennis para sa agarang lunas. Patuloy namang minomonitor ang kalagayan ng mga biktima.
Inihahanda naman ng mga awtoridad ang mga kaukulang reklamo laban sa suspek, kabilang ang Frustrated Murder, Attempted Murder, at paglabag sa Republic Act 10591 o Comprehensive Fi****ms and Ammunition Regulation Act.
Patuloy ang imbestigasyon ng pulisya upang matukoy ang motibo sa pamamaril, pati na ang iba pang detalye at posibleng pinagmulan ng insidente.
