02/08/2026
‘OMBUDSMAN REMULLA: BASURA, PINAKAMALAKING NEGOSYO UMANO NG MGA ALKALDE; HINIMOK ANG MAS MAHIGPIT NA REPORMA SA WASTE MANAGEMENT’
Inihayag ni Ombudsman Jesus Crispin "Boying" Remulla na ang pamamahala sa basura ang aniya'y "pinakamalaking negosyo" ng mga alkalde sa bansa, kasabay ng panawagan para sa mas mahigpit na pananagutan at reporma sa waste management system.
Sa kanyang programa sa radyo nitong Sabado, sinabi ni Remulla na ang usapin ng basura ay isa sa mga pinakamalalaking pinagkukunan umano ng mga kontrobersiya sa mga lokal na pamahalaan.
"Pinakamalaking negosyo ng lahat ng mayor sa Pilipinas, lahat walang exemption, basura. Baka sa Pasig lang matino," pahayag ni Remulla.
Hindi naman niya tinukoy kung may kasalukuyang isinasagawang imbestigasyon ang Office of the Ombudsman kaugnay ng mga kontrata sa garbage collection at disposal ng mga lokal na pamahalaan.
Bukod dito, binatikos din ni Remulla ang Department of Environment and Natural Resources (DENR), na aniya ay may mga pagkukulang sa pagtugon sa mga isyu kaugnay ng pamamahala ng basura, land titles, at illegal reclamation.
"Ang DENR din, ang laki ng pagkukulang sa basura, sa lahat. Land titles, illegal reclamation," ani ng Ombudsman.
Samantala, sa kanyang ikalimang State of the Nation Address (SONA) noong Hulyo 27, binigyang-diin ni Pangulong Ferdinand "Bongbong" Marcos Jr. ang pangangailangang repasuhin at i-update ang 25 taong gulang na Ecological Solid Waste Management Act upang makaagapay sa makabagong teknolohiya sa pamamahala ng basura.
Ayon sa Pangulo, mahalagang maisama sa mga reporma ang paggamit ng waste-to-energy facilities at iba pang makabagong waste treatment technologies upang mas maging epektibo ang pagtugon sa lumalalang suliranin sa solid waste management sa bansa.
Patuloy namang hinihintay ang mga susunod na hakbang ng mga kinauukulang ahensya hinggil sa mga pahayag ng Ombudsman at sa panukalang reporma sa sistema ng pamamahala ng basura sa Pilipinas.
