02/09/2026
FIRST GEN MIHATAG SA KANTIDAD NGA P39.97 MILLION NGADTO SA LEYECO V PARA SA ER 1-94 SHARE
ORMOC CITY, LEYTE-- Ang renewable energy company nga First Gen miusab pagpasalig sa suporta ngadto sa Leyte V Electric Cooperative (LEYECO V) para sa mga proyekto niini pinaagi sa paghatag sa P39.97M Geothermal Energy Funds kini karong semanaha.
Pinaagi kini sa geothermal arm sa First Gen nga Energy Development Corporation (EDC). Ang maong remittance naglangkob sa geothermal operations gikan sa tuig 2018 ngadto sa ikaduhang quarter niining tuig 2026.
Gipaabot nga gamiton kini sa LEYECO V para mas palig-onon ang mga linya sa kuryente, ug mag-supply sa kuryente ngadto sa mga hilit nga lugar sa ginsakupan niini.
Ang First Gen mituman sa paghatag niining maong benepisyo ngadto sa mga komunidad nga maoy host sa geothermal operations sa Ormoc City, ug sa lungsod sa Kananga.
Ang ER 1-94 mandato sa Department of Energy nga nagsiguro nga tanang host communities dunay bahin sa kita gikan sa limpyo nga kuryente.
Kining maong pag-release sa pondo gikan sa EDC ngadto sa LEYECO V nagsubay usab sa bag-ong kasugoan sa DOE nga tas-an ngadto sa 3 sentabos gikan sa kanhi 1 sentabo per kilowatthour sales ang bahin sa mga host communities. Apil niini ang host electric cooperative.
Ang maong pag-release gipangunahan ni Engr. Estanislao Pialago, Jr., Head sa Asset Maintenance and Leyte Site sa EDC—ug ni Jennifer Wenceslao, Head sa Corporate Relations Department sa EDC-Leyte.
Ang tseke gidawat ni LEYECO V General Manager Atty. Jannie Ann J. Dayandayan, inubanan sa iyang management team.
"Our commitment to LEYECO V goes beyond power supply agreements and is rooted in a shared mission to uplift the communities of Ormoc City and Kananga," pahayag ni Engr. Pialago.
Nasayran gikan sa LEYECO V nga ang maong pondo gamiton sa pagpalambo sa mga linya sa kuryente, pagpalig-on sa mga poste hasta sa mga kagamitan, paghatag sa panginabuhian sa tibuok franchise area sa LEYECO V.
Ang mga lugar nga sakop sa LEYECO V mao ang Ormoc City, Kananga, Albuera, Calubian, Isabel, Leyte (Leyte-Leyte); Matag-ob, Merida, Palompon, San Isidro, Tabango, Villaba.
Ang LEYECO V dunay 157,725 nga kabalayan nga konektado sa ilang mga linya sa kuryente. Pinakadaghan kini sa tanang 11 ka mga electric cooperatives sa tibuok Eastern Visayas [Region 8].
Sumala sa records, ang LEYECO V nag-supply sa kinatibuk-an nga 45 megawatts nga kuryente sa iyang tibuok franchise area. Ang pinakataas nga panginahanglan sa maong lugar moabot ngadto sa 49.77 megawatts, ang maong report nag-ingon. [With a report from GoodPage Weekly Research Team]
