17/10/2025
TULO KA MGA SUSPEK, DAKPAN SA KAPULISAN SA PRO 10; ₱1.02 MILLION NGA KANTIDAD SA DRUGANG SHABU, NASAKMIT SA CAGAYAN DE ORO
Tingkagol sa presohan ang tulo ka mga suspek sa ilegal nga druga human nadakpan sa duha ka operasyon sa kapulisan sa Police Regional Office 10 (PRO10) nga nagresulta sa pagkakumpiska sa kapin ₱1.02 million nga kantidad sa gituohang shabu niadtong Oktubre 15 ug 16, 2025 sa Cagayan de Oro City.
Ang unang operasyon sa Zone 7, Mahayahay, Bayabas, misangpot sa pagdakop kang alyas “Pipe,” 42 anyos, ug alyas “Nori,” 35 anyos, pulos negosyante, ug nakuhaag walo ka pakete sa drugang shabu nga motimbang og gramos, nagkantidad og ₱612,000, uban ang ilang sakyanan, cellphone, ug buy-bust money.
Sa ikaduhang operasyon sa Barangay Macasandig, nadakpan usab ang usa ka High-Value Individual (HVI), mao si alyas “Yan Gals,” 30 anyos, drayber ug narekober gikan sa iyang panimalay ang 40 ka pakete sa gituohang shabu, motimbang og 60 gramos, nagkantidad og ₱408,000, lakip na ang mga drug paraphernalia.
Sa pagkakaron, ang mga suspek anaa na sa kustodiya sa COCPO PS4 ug PS9 samtang gihikay na ang kaso batok kanila ilawom sa RA 9165 kun Comprehensive Dangerous Drugs Act of 2002.
