17/01/2026
Sto. Niño ug ang Sinugdanan sa Kristiyanismo sa Pilipinas
Ang Kristiyanismo wala lang kalit nga mitungha sa Pilipinas. Kini usa ka misyon nga nagsugod pa sa mga Apostoles, nga gisugo mismo sa atong Ginoong Hesukristo.
Sa Jerusalem, gisugo ni Hesus ang mga Apostoles nga ipakaylap ang Maayong Balita (“Kamo mahimong akong mga saksi sa Jerusalem… ug hangtod sa kinatumyan sa yuta” (Buhat 1:8). Apan sumala sa Kasulatan, wala dawata si Kristo sa iyang kaugalingong lungsod (“Miabot si Hesus sa iyang kaugalingong katawhan, aron ihatag ang kaluwasan, apan daghan sa ila wala modawat kaniya” – Juan 1:11). Tungod niini, ang iyang misyon milapad ug mipadayon gawas sa Jerusalem, aron ang Ginhharian sa Dios ipasa ngadto sa katawhan nga mamunga niini (Mateo 21:43). Busa gisulatan ko kamong tanan nga taga‑Roma, gihigugma sa Dios ug gitawag aron mahimong iyang katawhan - hatagan unta kamog grasya ug kalinaw gikan sa Dios atong Amahan ug sa Ginoong Jesu‑Cristo (Roma 1:7). Gikan didto, miabot ang Kristiyanismo sa Rome, nga nahimong sentro sa Iglesia ug pinasikad sa pagpadala sa mga misyonaryo sa tibuok kalibutan (“Ug sa katapusan, miabot kami sa Roma” – Buhat 28:14–16).Dinhi mitubo ang Iglesia ug nahimong sentro sa apostolic mission.
Si Paul the Apostle mismo nagtinguha nga mo-adto sa Spain (“Nagalaum ako nga makita ko kamo sa akong pag-adto sa Espanya” - Roma 15:24; 15:28), timaan nga ang Ebanghelyo gitumong sa pinakalayo nga mga nasod sa ilang panahon.
Gikan sa Spain, sa paglabay sa mga siglo, miabot ang Kristiyanismo sa Pilipinas. Niadtong 1521, uban sa ekspedisyon ni Ferdinand Magellan, miabot ang pari nga si Pedro de Valderrama, nga nagpahigayon sa unang Misa ug nagdala sa Sto. Niño, ang hulagway sa Bata nga Hesus. Ang Sto. Niño nahimong pinakaunang debosyon sa mga Pilipino ug unang simbolo sa atong pagdawat kang Kristo.
Sumala kang Sonia M. Zaide sa iyang libro nga Philippine History, ang imahe sa Sto. Niño epektibo kaayo sa catechesis tungod kay kini usa ka visual catechism - dili lang pulong kundili hulagway. Ang Sto. Niño nagpakita nga ang Dios mipakatawo, nahimong Bata, aron mapaduol sa katawhan. Tungod niini, sayon sabton, malumo, ug sayon dawaton sa kasingkasing sa mga Pilipino ang mensahe sa Kristiyanismo.
Busa, ang Sto. Niño dili lang hulagway sa usa ka Bata, kundili timaan sa padayon nga misyon sa Iglesia - gikan sa Jerusalem, paingon sa Roma, ngadto sa Espanya, ug hangtod sa Pilipinas - nga nagapadayag nga ang gugma sa Dios moabot bisan asa, hangtod sa kinatumyan sa kalibutan ( Mateo 28:19–20).
Ug kini nagapamatuod nga ang Simbahan nga gitukod sa atong Ginoong Hesukristo, mao ang Simbahang Roman Catholic, pinaagi sa mga Apostoles, nagpadayon hangtod karon, ug kini nagpabilin nga tinuod sa pagtudlo, sakramento, ug misyon nga gisugdan ni Kristo ug sa iyang mga Apostoles.
Viva Pit Señor!
