94.9 FMR Cagayan

03/08/2026

Cagayan Vice Gov. Mamba, sinuspinde ng 90 araw

Pinatawan ng 90-araw na preventive suspension si Cagayan Vice Governor Manuel Mamba ng Regional Trial Court (RTC) Branch 17 ng Batac City.

Sa Order na may petsang Hulyo 28, 2026, pinagbigyan ng korte ang Motion to Suspend Accused Pendente Lite na inihain ng prosekusyon at ibinasura ang Motion to Quash Information ng depensa.

Nahaharap si Mamba sa kasong paglabag sa Section 3(i) ng Republic Act No. 3019 o Anti-Graft and Corrupt Practices Act.

Ayon sa korte, balido ang Information laban sa bise gubernador sa anyo at nilalaman, kaya dapat ituloy ang paglilitis.

Nag-ugat ang mosyon sa pagpapalabas ng korte ng Warrant of Arrest laban kay Mamba noong Marso 26, 2026 matapos makitaan ng probable cause ang kaso. Nakapagpiyansa siya sa pamamagitan ng cash bond noong Marso 30, 2026.

Noong Abril 21, 2026, humiling ang prosekusyon na suspindihin si Mamba alinsunod sa Section 13 ng RA 3019, na nag-aatas ng mandatory preventive suspension kapag balido ang information at naisilbi na ang warrant.

Inatasan ng korte si Mamba na huwag munang gampanan ang anumang pampublikong tungkulin sa loob ng 90 araw.

03/08/2026

03/08/2026

🌧️ | REGION II, MAGHANDA!

Nasa ilalim na ng Tropical Cyclone Wind Signal No. 1 ang ilang bahagi ng Cagayan Valley.

Mga kababayan, ngayon ang tamang panahon para maging HANDA — BAGO, HABANG, at PAGKATAPOS ng bagyo.

Tandaan: Ang maagap na paghahanda ang pinakamabisang proteksyon ng bawat pamilya. Huwag nang hintayin lumakas pa ang ulan at hangin.

I-charge ang cellphone, ihanda ang go-bag, at manatiling nakatutok sa opisyal na abiso.

Mag-ingat po tayong lahat! 🙏

03/08/2026

7 kaso ng alitan sa lupa sa Cagayan Valley, naresolba sa isang araw dahil sa ADR on Wheels ng DENR

Mas mapapabilis na ang pagkakaroon ng titulo ng lupa ng mga pamilya sa Cagayan Valley.

Ito'y matapos maresolba sa pamamagitan ng amicable settlement ang pito sa 39 na kaso ng sigalot sa lupa sa isinagawang Alternative Dispute Resolution o ADR on Wheels ng Department of Environment and Natural Resources.

Dahil sa ADR, nalinaw ang mga isyu at napagkasunduan ng magkabilang panig ang mga susunod na hakbang para maipagpatuloy ang proseso ng pagpapatitulo.

Isinagawa ang aktibidad kahapon, Hulyo 31, sa DENR Regional Office sa Tuguegarao City sa pangunguna ng DENR Legal Service sa ilalim ni Atty. Anthony Raymond Velicaria, katuwang ang DENR Cagayan Valley.

Mahigit 200 DENR personnel at mga kliyente mula sa Cagayan, Quirino, Nueva Vizcaya, at Isabela ang dumalo sa proceedings.

Tumayong mediator ang 35 land management officers, investigators, at abogado ng DENR mula sa iba't ibang rehiyon na mga bagong nagtapos ng Basic Skills Training on ADR-Batch 18. Bahagi ng kanilang practicum ang aktuwal na pamamagitan sa mga kaso.

Ayon kay Director Velicaria, na kumatawan kay Assistant Secretary at ADR Chairperson Norlito Eneran, layunin ng aktuwal na mediation na maipraktis ng trainees ang kanilang natutunan para mas mapabilis ang resolusyon sa mga usapin sa lupa.

Pinuri naman ni DENR Region 2 Regional Executive Director Atty. Ismael Manaligod ang programa at hinikayat ang mga ADR officer sa rehiyon na makiisa sa mga susunod pang ADR proceedings.

Source : DENR Region 02

02/08/2026

MAGAT DAM, NORMAL PA RIN ANG WATER LEVEL SA KABILA NG BAGYONG LUIS

Nananatili pa rin sa normal na antas ang tubig sa Magat Dam sa kabila ng masamang panahong dala ng Bagyong Luis.

As of 5:00 AM ngayong August 3, 2026, ayon sa NIA-MARIIS, nasa 164.05 meters above sea level pa lang ang reservoir water level ng Magat Dam. Malayo pa ito sa 179.06 masl na rule curve o normal na lebel nito.

Pumalo naman sa 111.41 cubic meters per second ang inflow o tubig na pumapasok sa dam, habang 10.00 cms lang ang outflow.

Nananatili ring sarado ang lahat ng spillway gate ng dam at zero pa rin ang discharge ng 388MW Magat Hydro Power Plant.

Tiniyak ng NIA-MARIIS Dam and Reservoir Division na patuloy nilang mino-monitor ang sitwasyon ng dam at manatiling nakaalerto lalo na't inaasahan pa ang mga pag-ulan na dala ng bagyo.

Wala pa namang dapat ikabahala ang publiko, lalo na ang mga nasa low-lying areas.

02/08/2026

POSIBLENG MAG-LANDFALL SA NORTHERN LUZON MAMAYANG GABI ANG BAGYONG LUIS; HALOS BUONG CAGAYAN NASA SIGNAL NO. 1 NA

Posibleng mag-landfall o dadaan nang malapit sa Northern Luzon ang Bagyong Luis hanggang mamayang gabi o bukas ng umaga, Agosto 4.

Batay sa Tropical Cyclone Bulletin No. 7 ng DOST-PAGASA na inilabas kaninang alas-5:00 ng umaga, huling namataan ang sentro ng bagyo sa layong 130 kilometro Silangan-Timog-Silangan ng Casiguran, Aurora kaninang alas-4:00 ng madaling araw. Halos hindi ito gumagalaw at taglay pa rin ang lakas ng hangin na 55 kilometro kada oras at pagbugsong aabot sa 70 kilometro kada oras.

Dahil dito, isinailalim na sa Signal No. 1 ang halos buong Cagayan, kabilang ang Central at Eastern portion na kinabibilangan ng Abulug, Allacapan, Aparri, Alcala, Amulung, Baggao, Ballesteros, Buguey, Pamplona, Camalaniugan, Enrile, Piat, Sto. Niño, Tuao, Lal-lo, Gonzaga, Sta. Teresita, Solana, Rizal, Sta. Ana, Iguig, Lasam, at Tuguegarao City.

Nakataas din ang Signal No. 1 sa Isabela, Quirino, silangan at timugang bahagi ng Apayao na kinabibilangan ng Flora, Sta. Marcela, Conner, Pudtol at Luna, silangang bahagi ng Kalinga tulad ng Tabuk City, Tanudan, Pinukpuk at Rizal, silangang bahagi ng Mountain Province at Ifugao, hilagang bahagi ng Aurora, Polillo Islands, at hilagang bahagi ng Camarines Norte.

02/08/2026

31/07/2026

Mas Napalapit ang Serbisyong Rehabilitasyon sa mga Batang may Kapansanan sa Cagayan sa Pamamagitan ng DARE CAREvan

Mas maraming batang may kapansanan sa lalawigan ng Cagayan ang nabigyan ng pagkakataong makatanggap ng libreng pagsusuri, rehabilitasyon, at iba pang mahahalagang serbisyo sa pamamagitan ng Developmental Assessment, Rehabilitation, and Empowerment for Children with Disabilities (DARE) CAREvan na isinagawa noong Hulyo 29 hanggang 30 sa Capitol Gymnasium sa Tuguegarao City.

Malaking ginhawa ang naidulot ng DARE CAREvan sa mga pamilya dahil hindi na nila kailangang bumiyahe nang malayo o gumastos nang malaki upang makapagpakonsulta sa mga espesyalista. Sa loob ng dalawang araw, nagkaroon ng access ang mga bata sa mga developmental pediatrician, speech-language pathologists, physical therapists, at occupational therapists na nagsagawa ng komprehensibong pagsusuri at kaukulang interbensyon.

Isa sa pinakamahalagang benepisyo ng programa ang maagang pagtukoy sa developmental conditions ng mga bata, na nagbibigay-daan sa agarang rehabilitasyon at tamang paggamot. Dahil dito, mas tumataas ang posibilidad na mapaunlad ang kanilang kakayahang matuto, makihalubilo sa komunidad, at magkaroon ng mas magandang kalidad ng pamumuhay.

Aktibong tumulong ang mga social worker ng DSWD Field Office 2 sa pagsusuri ng mga kliyente, case management, at pag-uugnay sa mga pamilya sa iba pang programang maaaring makatulong sa kanilang pangmatagalang pangangailangan.

Ayon kay DSWD Field Office 2 Regional Director Lucia Suyu-Alan, mahalagang matiyak na ang bawat batang may kapansanan ay nabibigyan ng pantay na pagkakataong umunlad sa pamamagitan ng mga serbisyong madaling maabot at tumutugon sa kanilang pangangailangan.

Binigyang-diin naman ni Assistant Regional Director for Operations Franco G. Lopez na patuloy na palalakasin ng DSWD ang pakikipagtulungan sa iba't ibang ahensya upang matiyak na walang batang may kapansanan ang maiiwan sa pagtanggap ng kinakailangang suporta at proteksyon.

Sa pamamagitan ng DARE CAREvan, mas nailalapit sa mga komunidad ang mga espesyal na serbisyong medikal at rehabilitasyon, na nagbibigay ng pag-asa sa mga bata at kanilang mga pamilya tungo sa mas malusog, mas produktibo, at mas inklusibong kinabukasan.

Source: DSWD Region II