https://dwokfm1079.wixsite.com/website

DWOK FM 107.9 - Ang Bigwas Station, Purok Sandiwa Brgy. Tiniguiban, Puerto Princesa (2025)

13/06/2025

COMELEC, "NO COMMENT" SA PAHAYAG NI VP SARA DUTERTE TUNGKOL SA DAYAAN NOONG ELEKSYON

"No comment" ang tugon ng Commission on Elections (Comelec) sa pahayag ni Vice President Sara Duterte na nagkaroon umano ng dayaan sa nakaraang eleksyon noong Mayo 12.

Ayon kay Comelec Chairman George Garcia, iginagalang nila ang pahayag ni VP Sara at naniniwala silang malaya ang sinuman na magpahayag ng kanilang opinyon bilang bahagi ng demokrasya.

Ito ay matapos sabihin ng Pangalawang Pangulo na may tatlong nanalong miyembro ng kanilang partidong PDP-Laban na tumakbo sa pagka-senador. Kabilang umano rito sina Jayvee Hinlo, Jimmy Bondoc, at Richard Mata.

Sa isang pahayag, inatasan ni VP Sara ang partido na kwestiyunin ang naging proseso sa nagdaang eleksyon.

13/06/2025

ROQUE, ITINANGGI ANG PAGKAKATABLA NG KANYANG ASYLUM REQUEST SA NETHERLANDS

Mariing itinanggi ni dating presidential spokesperson Harry Roque ang mga ulat na tinabla ang kanyang asylum request sa Netherlands.

Si Roque ay kasalukuyang nahaharap sa kasong qualified human trafficking na may kinalaman sa Lucky South 99 POGO sa Angeles, Pampanga.

May umiiral na warrant of arrest laban sa kanya kaugnay ng natagpuang ebidensiya ng torture, kidnapping, at s*x trafficking sa nasabing POGO hub.

Pinabulaanan din ni Roque ang ulat na isinangguni sa Germany ang kanyang kaso o na doon galing ang kanyang Schengen visa.

13/06/2025

PNP CHIEF NICOLAS TORRE III, NANGUNA SA 3RD PNP PRESS CORPS INVITATIONAL SHOOTFEST

Pinangunahan ni Philippine National Police (PNP) Chief, Police General Nicolas Torre III ang ikatlong PNP Press Corps Invitational Shootfest ngayong umaga sa Quezon City Police District (QCPD) Firing Range sa Kampo Karingal, Quezon City.

Isinagawa ang aktibidad matapos ang pormal na pagtatapos ng ipinatupad na gun ban ng Commission on Elections (COMELEC) noong Mayo 11, bilang bahagi ng mga panuntunan kasunod ng katatapos na halalan.

Kabilang sa mga dumalo at nakibahagi sa aktibidad sina National Police Commission (NAPOLCOM) Vice Chairperson at Executive Director Atty. Ralph Vincent Calinisan, QCPD Director Police Colonel Glenn Silvio, at mga opisyal ng PNP Press Corps.

13/06/2025

MALACAÑANG: MARCOS JR. HINDI HUMAHADLANG SA DAGDAG-SAHOD PARA SA MGA MANGGAGAWA

Nilinaw ng Palasyo ng Malacañang na si Pangulong Ferdinand “Bongbong” Marcos Jr. ay hindi tutol sa panukalang pagtataas ng sahod para sa mga manggagawang Pilipino. Ito ang tugon ng Malacañang sa mga pahayag ng Kabataan Party-list na umano’y si Pangulong Marcos ang dahilan ng pagkabigo ng wage hike bill at mas pinapaboran ang “rich boys club.”

Sa isang pahayag, binigyang-diin ni Palace Press Officer Undersecretary Atty. Claire Castro na ang pagtataas ng sahod ay sumusunod sa isang proseso at alinsunod sa umiiral na batas at regulasyon.

Sa kabila ng pagkakapasa ng Senado noong Pebrero 2024 sa panukalang ₱100 daily minimum wage hike, hindi ito naisama sa bicameral conference committee bago matapos ang sesyon ng 19th Congress. Ito ay dahil sa pagtutol ng Kamara de Representantes na tanggapin ang bersyon ng Senado.

Ipinaabot ni Senate President Migz Zubiri ang kanyang pagkadismaya para sa mga manggagawa, ngunit idiniin niyang ginawa ng Senado ang lahat upang maipasa ang dagdag-sahod.
Samantala, sinabi ni Senate Committee on Labor Chairman Joel Villanueva na bagama't ipinahayag ng Kamara ang posibilidad na i-adopt ang bersyon ng Senado, walang pormal na komunikasyon silang natanggap hanggang sa huling sandali ng sesyon.

13/06/2025

Tunghayan!! Ang parada ng makukulay na float ng bawat munisipyo sa lalawigan ng Palawan

Kasama din sa parada ang mga grupo sandatahang lakas ng Pilipinas, Mata ng Masa Task Force , Bureau of Fire Protection at Philippine National Police

12/06/2025

SENATE PRESIDENT ESCUDERO: SENADO AY HUKUMAN, HINDI KATUMBAS NG KAMARA SA IMPEACHMENT PROCESS

Nilinaw ni Senate President Chiz Escudero na sa ilalim ng proseso ng impeachment, ang Senado ay tumatayong impeachment court o hukuman, habang ang Kamara de Representantes ay gumaganap bilang tagapagsakdal o prosecutor, kaya’t hindi sila magkapantay sa usaping ito.

Ayon kay Escudero, ang desisyon ng Senado na ibalik sa Kamara ang Articles of Impeachment laban kay Vice President Sara Duterte ay hindi nangangahulugang ibinasura ito, kundi bahagi ng proseso ng impeachment court. Ipinunto niyang ang hakbang ay naaayon sa kapangyarihang taglay ng Senado bilang tagapaghukom sa mga ganitong kaso.

Binigyang-diin din niya na hindi maaaring balewalain ng Kamara ang anumang kautusan o kilos ng Senado kapag ito ay tumatayo bilang impeachment court. May karapatan din umano ang bawat senador na maghain ng mosyon o magbitiw bilang hukom, ayon sa kanilang sariling pagpapasya.

Kanselado na ang presentasyon ng mga Articles of Impeachment na nakatakda sana noong Hunyo 11, at ngayon ay inaabangan ang magiging opisyal na tugon ng Kamara, lalo’t patapos na ang sesyon ng ika-19 na Kongreso sa Hunyo 13.

12/06/2025

KMU AT IBANG MILITANTENG GRUPO, MARIING KINONDENA ANG PAGHARANG SA ₱200 WAGE HIKE SA GITNA NG ARAW NG KALAYAAN

Mariing kinondena ng Kilusang Mayo Uno (KMU) at iba pang militanteng grupo ang umano’y pagharang sa ₱200 legislated wage increase para sa mga manggagawa sa pribadong sektor, kasabay ng kanilang kilos-protesta ngayong Hunyo 12, sa paggunita ng ika-127 anibersaryo ng Araw ng Kalayaan.

Ayon sa KMU, ang naturang wage hike ay dapat sana’y nagsilbing kauna-unahang legislated wage increase sa mahigit tatlong dekada ng pakikibaka ng mga manggagawa para sa makatarungan at sapat na sahod.

Ipinahayag ng grupo na ang pagkakabigo sa pagpasa ng panukala, sa kabila ng pagsang-ayon ng Kamara, ay isang anyo ng pagkakait sa karapatan ng mga manggagawa, lalo na sa gitna ng mataas na inflation at tuloy-tuloy na pagtaas ng presyo ng mga bilihin.

Nanawagan ang mga grupo sa Senado na itaguyod ang panukala at tiyakin ang agarang pagpasa at implementasyon ng ₱200 wage hike bilang hakbang patungo sa pagkakapantay-pantay, dignidad sa paggawa, at kagalingan ng uring manggagawa.

12/06/2025

COMELEC KINOKONSIDERA ANG ONLINE NA PAGLALATHALA NG SOCE PARA SA MAS MALINAW NA TRANSPARENSIYA

Ipinahayag ng Commission on Elections (Comelec) na posibleng i-upload online ang mga Statement of Contributions and Expenditures (SOCE) ng mga kandidato, party-list groups, at political parties upang palakasin ang transparency at accountability sa halalan.

Ayon kay Comelec Chairman George Garcia, maaaring ilathala sa website ng Comelec ang mga SOCE sa loob ng dalawang linggo, ngunit hinihintay pa ang approval ng Department of Information and Communications Technology (DICT) para sa vulnerability assessment ng online platform.

Ang deadline ng pagsusumite ng SOCE para sa mga tumakbo sa May 12, 2025 midterm elections ay noong Hunyo 11.

Batay sa pinakahuling datos ng Comelec:
• 25 sa 64 na senatorial candidates
• 10 sa 28 na political parties
• 64 sa 154 na party-list groups
ang nakapagsumite pa lamang ng kanilang SOCE.

Nagbabala si Garcia na ang mga kandidatong hindi makapagsusumite ng SOCE sa dalawang magkasunod na halalan ay maaaring ma-disqualify permanently mula sa pagtakbo sa anumang posisyon sa gobyerno. Bukod dito, ang kabiguang ito ay maaari ring humantong sa mga kasong administratibo at kriminal.

12/06/2025

VP SARA DUTERTE NANAWAGAN: ‘HUWAG ISUKO ANG KALAYAAN SA MGA TRAYDOR AT WALANG MALASAKIT SA BANSA’

Nanawagan si Vice President Sara Duterte sa sambayanang Pilipino na huwag isuko ang kalayaan ng bansa sa mga aniya’y “traydor” at sa mga walang malasakit sa bayan.

Sa kanyang pahayag habang nasa Malaysia para sa isang personal na biyahe kasama ang kanyang pamilya, iginiit ni Duterte na ang kalayaang tinatamasa ngayon ng mga Pilipino ay bunga ng sakripisyo at pagmamahal ng mga bayani para sa bansa.

Ayon sa Office of the Vice President (OVP), nakatakdang dumalo si Duterte ngayong araw sa selebrasyon ng Araw ng Kalayaan sa Malaysia at makilahok sa consultation program kasama ang mga overseas Filipino workers (OFWs) sa nasabing bansa.

10/06/2025

SEN. PADILLA KINUMPIRMANG MAY SARILING RESOLUSYON PARA IBASURA ANG IMPEACHMENT CASE NI VP DUTERTE

Kinumpirma ni Senador Robin Padilla nitong Lunes, Hunyo 9, na gumawa siya ng hiwalay na resolusyon na layong ibasura ang impeachment case laban kay Vice President Sara Duterte.

Ayon kay Padilla, siya pa lamang sa ngayon ang tanging may-akda ng naturang resolusyon, ngunit umaasa siyang susuportahan ito ng kanyang mga kasamahan sa Senado, lalo na mula sa tinatawag na ‘Duterte-bloc’.

Nang tanungin kung isasama sa draft resolution ni Senador Ronald “Bato” Dela Rosa ang kanyang bersyon, sinabi lamang ni Padilla na, “I’m still waiting for them.”

Matatandaang nauna nang sinabi ni Dela Rosa na gumawa rin siya ng draft resolution na naglalayong ideklara ang “de facto dismissal” ng impeachment case ni VP Duterte, sa gitna ng kakulangan umano ng oras para isakatuparan ang paglilitis.

10/06/2025

WAGE HIKE BILL HINDI PRAYORIDAD NG LEDAC — ESCUDERO

Sinabi ni Senate President Francis “Chiz” Escudero nitong Lunes, Hunyo 9, na hindi kabilang sa mga prayoridad ng Legislative-Executive Development Advisory Council (LEDAC) ang panukalang batas na layong magdagdag ng arawang minimum wage para sa mga manggagawa.

Ito ay sa kabila ng pag-apruba ng Kamara sa bersyon ng legislated P200 wage hike, na mas mataas kumpara sa P100 dagdag sahod na inaprubahan ng Senado.

Ayon kay Escudero, magkakaroon ng bicameral conference committee sa oras na matanggap ng Senado ang opisyal na kopya ng House bill, na ipinasa sa ikatlo at huling pagbasa noong Hunyo 4.

Gayunpaman, binigyang-diin ng Senate President na hindi pa tiyak kung i-aadopt ng Senado ang bersyon ng Kamara o ikokompromiso ang halaga ng umento upang hindi umano maapektuhan ang ekonomiya.

Nitong Lunes, nagtipon sa Senado ang mga labor group na Partido Manggagawa at Nagkaisa Labor Coalition upang igiit ang agarang pagbuo ng bicameral committee para sa pinal na bersyon ng wage hike measure.

Mayroon lamang hanggang Hunyo 13 ang dalawang kapulungan ng Kongreso upang pagkaisahin at iratipika ang reconciled version ng panukala bago maipadala sa Pangulo para sa lagda.

Kung hindi ito maisusulong sa takdang panahon, kailangang muling ihain ang panukala sa susunod na Kongreso.

10/06/2025

6 NA TAONG TERMINO PARA SA BARANGAY AT SK OFFICIALS APRUBADO NA SA KONGRESO

Inaprubahan ng House of Representatives nitong Lunes, Hunyo 9, sa ikatlo at huling pagbasa ang House Bill No. 11287, na layong palawigin mula tatlo hanggang anim na taon ang termino ng mga barangay at Sangguniang Kabataan (SK) officials.

Nakakuha ang panukala ng 153 affirmative votes, 4 negative votes, at 1 abstention.

Layunin ng panukalang batas na bigyang-stabilidad at mas mahabang panahon ng paglilingkod ang mga opisyal sa barangay at SK, kasabay ng transitory provision na nagpapahintulot sa lahat ng incumbent officials na nahalal noong Oktubre 30, 2023 na manatili sa puwesto hanggang sa susunod na eleksyon sa Mayo 2029, maliban na lamang kung sila ay maaalis o masususpinde batay sa umiiral na batas.

Itinatakda rin ng panukala ang two-term limit para sa barangay officials at one-term limit para sa SK officials.

Kapag naisabatas, isasagawa ang synchronized barangay at SK elections tuwing anim na taon, tuwing ikalawang Lunes ng Mayo, simula sa taong 2029.

Samantala, itinakda pa rin ang nakabinbing barangay at SK elections ngayong taon sa Disyembre 1, 2025.

DWOK FM 107.9 - Ang Bigwas Station

13/06/2025

13/06/2025

13/06/2025

13/06/2025

13/06/2025

12/06/2025

12/06/2025

12/06/2025

12/06/2025

10/06/2025

10/06/2025

10/06/2025

Address

Telephone

Website

Alerts

Contact The Business

Shortcuts

Share

Category

Our Story