08/06/2026
IBIBIGAY NA STUDENT ASSISTANCE MULA SA PUERTO PRINCESA CITY GOVERNMENT, P3,000 CASH NA LAMANG AT HINDI NA SCHOOL SUPPLIES AT UNIFORM
Tatlong libong (3,000) pisong cash at hindi na umano school supplies, uniforms at sapatos ang matatanggap ng mga estudyante sa lahat ng mga public schools sa Puerto Princesa City mula sa Student Assistance Program ng City Government.
Ito ang kinumpirma sa media ni City Councilor Victor “Bitoy” Oliveros, Chairman ng Committee on Education sa Sangguniang Panlungsod, sa dahilang hindi na raw kakayanin ng General Services Office (GSO) ng siyudad na mag procure ng mga gamit lalo’t nag umpisa na ang school year.
Kaugnay nito, plano ngayon ng siyudad na masimulan ang pamamahagi ng P3,000 sa buwan ng Agosto ngayong taon para sa tinatayang 72,000 mag-aaral mula sa Kinder hanggang Grade 12 sa ilalim ng DepEd Puerto Princesa.
Ayon pa kay Konsehal Oliveros, titingnan nya ngayon kung kailangan na baguhin ang nilalaman ng ordinansa lalo’t nakasaad dito na mga school supplies and uniform ang ipamimigay sa mga estudyante.
Samantala, humingi naman ng paumanhin at pang-unawa si Oliveros sa pagkaka delay ng pamamahagi ng Student Assistance dahil sa ito'y unang pagkakataon pa lamang umano ng implementasyon at sinabing sa susunod ay titiyakin nang maibibigay ito batay sa nakasaad sa ordinansa. l via Romeo Luzares.
